Qeveria dhe Bashkia e Tiranës prezantojnë projektin e ri të Kampusit Universitar

Brenda pak kohësh, studentët do të kenë një kamp universitar me 11 godina të reja, salla leximi dhe mjedise moderne për të mikpritur jo vetëm studentët që vijnë nga rrethet, por edhe studentët e huaj në kuadër të shkëmbimeve Erasmus.

Kreu i Bashkisë së Tiranës, Erion Veliaj, së bashku me kryeministrin Edi Rama dhe ministren e Arsimit, Besa Shahini, prezantuan projektin e Kampusit të ri Universitar, ndërsa inspektuan edhe punimet që po kryhen në godinat e “Qytetit Studenti”.

Në prezantimin e projektit, Kryeministri Edi Rama vuri në dukje se puna ka nisur që në vitin 2015, por u pengua si pasojë e zaptimeve që kishin ndodhur aty ndër vite. “Kampusi i ri është një punë e nisur që në vitin 2015. Territori rezultoi një tokë e xanun nga politikanët e partisë që lindi këtu në “Qytetin Studenti”. Morën nga studentët energjinë e madhe dhe ajo që bënë ishte thjeshtë që t’i merrnin edhe pronat. Në “Qytetin Studenti” kanë ndodhur disa ndërhyrje mikroskopike, por nuk është bërë asgjë për të përballuar ndryshimin e madh me rritjen e numrit të studentëve. Në ato godina strehohet një numër i madh studentësh. Simboli i bashkimit është marrja e mensës nga vëllai i Presidentit të Republikës dhe kthimi i saj në lloto. Po ashtu, u zbatuan godina për qëllime personale”, vuri në dukje Rama.

Ai theksoi se bibliotekat dhe sallat e leximit u kthyen në loto apo klube striptizmi dhe u zaptuan godinat për qëllime personale. “U ndërtua pa leje dhe me leje dhe kjo që po them vlen për të kuptuar diçka: Këta nuk janë thjesht zaptues, që mund t’i marrësh e t’i largosh, dhe kjo është arsyeja e vonesës së projektit, pasi këta janë pronarë. Kanë regjistruar prona në “Qytetin Studenti” dhe me legjislacionin tonë, si në gjithë vendet e botës, nuk ka rëndësi si është regjistruar prona, ajo nuk zhbëhet përveçse me lekë në dorë, që do të thotë duke i shpronësuar këta të ashtuquajtur pronarë pasi e përdhunuan “Qytetin Studenti” me loto e me klube”, theksoi kryeministri.

Kreu i qeverisë garantoi se kampusi universitar do të përfundojë brenda mandatit tjetër të kryetarit të Bashkisë. “Brenda këtij mandati të gjitha konviktet do të jenë në situatë katërcipërisht ndryshe dhe ndërkohë, bashkë me Bashkinë e Tiranës do të fillojmë ndërtimin e këtij kampusi dhe brenda mandatit tjetër të kryetarit të bashkisë ne do të përfundojmë kampusin universitar”, tha Rama. Aktualisht, konviktet e Inxhinierisë janë drejt përfundimit, 9 të tjera përfundojnë në Qytetin Studenti me standardet më të larta. Tjetër pjesë e programit është negocimi për një grup tjetër konviktesh.

Duke u ndalur te projekti i Kampusit Universitar, Veliaj tha se krahas rikonstruksionit të godinave aktuale, parashikohet edhe ndërtimi i 11 godinave dhe i hapësirave të tjera moderne komode. “Ajo që konsiston në kampusin e ri ka të bëjë së pari, me shtimin e 11 godinave të tjera në “Qytetin Studenti”. Disa godina janë përtej riparueshmërisë dhe një për shembull që është identifikuar e parikonstruktueshme do të rrëzohet dhe do të ndërtohet nga e para, por në total do të kemi 11 godina të reja, të cilat nuk duam vetëm të përdoren nga studentët këtu në Shqipëri, por nga ata që vijnë me programet Erasmus. Planifikojmë që të ndërtojmë një mega-bibliotekë për Qytetin Studenti. Unë e di që në miniaturë ka salla leximi që po i rikonstruktojmë në secilën prej konvikteve, ama një hapësirë më të madhe sot nuk e kemi dhe planifikohet në Kampusin e ri Universitar. Tjetra është mensa. Pjesa e tretë po aq e rëndësishme ka të bëjë me terrenet sportive dhe me të gjithë hapësirat çlodhëse rreth “Qytetit Studenti””, nënvizoi Veliaj.

Ashtu si me kopshtet dhe çerdhet, Bashkia e Tiranës po zbaton skemën “adopto një konvikt”, për t’u krijuar studentëve kushte më të mira. “Me insistimin e kryeministrit kemi filluar që të lëvizim së pari, me një fond special që qeveria akordoi do të fillojmë edhe prokurimin e atij fondi, por nuk mund të prisnim. Kemi filluar edhe pak më herët me një koncept që ne e provuam me sukses për adoptimin e kopshteve dhe çerdheve të Tiranës. Me insistimin e kryeministrit ishte TIKA që na u përgjigj e para për të filluar një nga konviktet e djemve dhe ndërkohë kanë marrë një angazhim për disa të tjera dhe le të themi sot vetëm në këtë fazë emergjente në gjysmën e konvikteve të “Qytetit Studenti” i kemi kthyer në kantiere pune”, deklaroi kryebashkiaku Veliaj.

Kreu i Bashkisë së Tiranës nënvizoi se gjatë këtyre viteve të tranzicionit janë rreth 14-15 mijë metra katorë të“Qytetin Studenti” të zaptuara nga njerëz të lidhur me politikën. “Rreth 14 -15 mijë metra të këtij terreni janë të zaptuara në atë rrumpallën e viteve ’90 ku çdo pronë publike do të thotë që ishte e hapur për t’u bastisur dhe për t’u gllabëruar nga kush ishte më i fortë sesa studentët që vinin këtu nga familjet modeste të rretheve të ndryshme të Shqipërisë. Kështu, gjëja e parë që do të duhet të bëjmë është të rikuperojmë territorin. Një pjesë e madhe e punës tashmë është bërë për identifikimin e territoreve të okupuara nga IKMT-ja dhe IMT-ja dhe shumë shpejt do të fillojmë një aksion për t’u siguruar që çfarë është e studentëve, mbetet e studentëve”, tha ai, duke sjellë edhe disa raste të abuzimit me këto prona.

“Nuk mund të rri indiferent kur shikoj se një pjesë e madhe e zaptimit ka ndodhur nga njerëz të politikës, nga ministra, nga presidentë, nga njerëz që në një cep tjetër të Tiranës sot po garojnë për poste drejtuese në parti politike, por që sot kanë në hipotekën e tyre vjedhjen në “Qytetin Studenti”. Patjetër që kjo është edhe politike, por unë besoj se në fund të ditës ka rëndësi rezultati dhe rezultati do të jetë me studentët, rezultati do të jetë që pronat e studentëve do t’i kthehen studentëve me çdo kusht edhe me çdo çmim”, tha ai.

Kryebashkiaku u bëri thirrje studentëve që t’i kthehen mësimit për t’i hapur rrugë, gjatë verës, vijimit të punës me kapacitet të plotë, në mënyrë që viti i ri akademik t’i gjejë me mjedise komode dhe të denja për ta. “Llaç e tulla dimë të bëjmë, por çështja është që na duhet një hapësirë sa më e madhe midis 15 korrikut dhe 1 tetorit kur fillon shkolla që në 2 muaj e gjysmë të futemi në një aksion për transformimin e hapësirave. Nëse kjo hapësirë na ngushtohet dhe shkolla vazhdon gjithë korrikun dhe gushtin, na lihet shumë pak kohë”, nënvizoi Veliaj.

Ministrja e Arsimit, Besa Shahini prezantoi edhe një sërë masash që janë marrë për plotësimin jo vetëm të kërkesave të studentëve, por edhe më shumë se sa aq. “Dje filluam zyrtarisht diskutimin mbi “Paktin mbi Univeristetin”. Është pas 6 javësh diskutim, duke i përfshirë të gjithë anëtarët e kabinetit për të zbërthyer problematikat që ngritën studentët, por edhe për të identifikuar zgjidhjet më të mira. Ky dokument është në fazë shumë të hershme, por e kemi hedhur në diskutim pasi nuk mund të përfundohet pa kontributin e të gjithë juve. Konviktet i shërbejnë diku te 27 mijë studentëve, por  infrastruktura nuk i përshtatet nevojave”, tha Shahini dhe shprehu domosdomëshmërinë për ndërtimin e këtij kampusi universitar.