Nënkryetarët

Arbjan Mazniku

Arbjan Mazniku është nënkryetar i Bashkisë së Tiranës që nga shtatori i vitit 2015. Më parë, ai ka qenë zëvendësministër i Arsimit dhe Sportit për periudhën 2 vjeçare. Para se të merrte përsipër këto detyra, Arbjani ka qenë Drejtor Ekzekutiv i Institutit AGENDA, një organizatë në Tiranë që merret me kërkime dhe analiza të politikave publike në Shqipëri, sidomos në fushën e qeverisjes, Integrimit Europian dhe zhvillimit ekonomik dhe social.

Në janar të vitit 2008 Mazniku ka punuar për MJAFT, lëvizja civile më e suksesshme, e cila nxiti reagimin dhe aktivizimin e të rinjve për çështje të ndryshme politike e sociale.

Nga vitet 2005-2007, Arbjan Mazniku ka qenë Drejtor për Politikat e brendshme në MJAFT dhe nga viti 2003-2005 ka qenë Drejtor Komunikimi në MJAFT.

Përpara aktivizimit në MJAFT, Arbjani ka drejtuar Shoqatën Ndërkombëtare të Debateve në Shqipëri për 3 vjet, duke kordinuar programet e debatit për Gjimnazet dhe Universitetet.

Arbjan Mazniku ka studiuar për Gazetari në Universitetin e Tiranës dhe zotëron një Master në Profilin Komunikim Politik nga Universiteti Sheffield në Britaninë e Madhe.

Email: arbjan.mazniku@tirana.al
 

Anisa Ruseti

Anisa Ruseti është Nënkryetare e Bashkisë së Tiranës që prej korrikut të vitit 2019, përgjegjëse për fushën e shërbimeve sociale. 

Ajo ka më shumë se 14 vite përvojë në administratën publike në fushën e shërbimeve sociale. Karriera e saj nisi në vitin 2004 pranë Shërbimit Social Shtetëror, ku edhe punoi për 10 vite, në pozicione të ndryshme. Ruseti ka qenë e angazhuar në mënyrë sistematike në reformën e shërbimeve sociale për përmirësimin e cilësisë së shërbimeve dhe fuqizimin e kapaciteteve të stafeve menaxhuese dhe ofruesve të këtyre shërbimeve.

Në vitin 2014 – 2016, ajo punoi në Ministrinë e Mirëqenies Sociale dhe Rinisë, në Drejtorinë e Kujdesit Social dhe Shërbimeve të Integruara, ku dha kontributin e saj në vlerësimin e shërbimeve dhe nevojave në nivel kombëtar, hartimin e strategjive dhe planeve kombëtare në fushën e mbrojtjes dhe përfshirjes sociale.

Më tej, në vitin 2016, ajo u angazhua në Bashkinë e Tiranës si Drejtor i Drejtorisë së Mbrojtjes dhe Përfshirjes Sociale, e më pas në funksionin e Drejtorit të Përgjithshëm të Shërbimeve Sociale, si një nga kontribueset kryesore në hartimin dhe vendosjen në zbatim të Planit të Zhvillimit të Komunitetit Rom dhe Egjiptian 2017-2020, Planit të Veprimit për Barazinë Gjinore 2018-2020, Planit të Veprimit për Përfshirjen Sociale 2016-2020, Planit Social Vendor të Bashkisë së Tiranës 2018-2020 e një sërë programesh të strehimit social dhe nxitjes së punësimit, me qëllim përmirësimin e kushteve social-ekonomike të kategorive në nevojë. 

Ajo është specializuar në trajnime të ndryshme mbi  zhvillimin e politikave të mbrojtjes dhe përfshirjes sociale në Britaninë e Madhe, Itali, Spanjë  Austri, SHBA etj.  

Ruseti ka përfunduar studimet në Fakultetin e Gjuhëve të Huaja, Universiteti i Tiranës dhe zotëron një master për Politika Sociale dhe Orientimin Strategjik drejt Zhvillimit të Qëndrueshëm të Territorit nga Universiteti i Bolonjës në Itali.

Email: anisa.ruseti@tirana.al
 

Anuela Ristani

Anuela Ristani është Nënkryetarja e Bashkisë së Tiranës për Marrëdheniet me Jashtë. Lindi  në Tiranë në 13 Tetor 1982.

Studimet e shkollës së mesme i nisi në gjimnazin e përgjithshëm Ismail Qemali në Tiranë dhe i përfundoi në Minesota te Shteteve të Bashkuara.

Ristani është diplomuar në Administrim Biznesi dhe Studime Evropiane nga Universiteti Amerikan në Bullgari dhe zotëron Master në Administrim Biznesi dhe Komunikim Strategjik nga Universiteti i Mizurit në Kolumbi,  SHBA.  Në vitin 2002, së bashku me studentë të tjerë shqiptarë që studionin jashtë vendit krijoi Rrjetin e Studentëve Shqiptarë në Botë, një rrjet i cili orientonte të rinjtë shqiptarë që donin të kontribuonin për vendin e tyre pas kthimit nga studimet apo në distancë.

Përvoja e saj profesionale ka qenë e lidhur fillimisht me zhvillimin e biznesit për kompani ndërkombëtare të sapovendosura në Shqipëri dhe më pas e fokusuar në strategji komunikimi dhe marketing.

Në vitet 2008-2010 si eksperte në Bankën Botërore ka drejtuar projektin për reformimin dhe modernizimin e sektorit financiar në Shqipëri duke fituar përvojë në politikbërje dhe hartim legjislacioni.

Anuela Ristani iu bashkua administratës publike në vitin 2014 si Drejtore e Përgjithshme e Shërbimit Kombëtar të Rinisë, ku punoi për ngritjen e RYCO (Regional Youth cooperation Office) si dhe hapi qendrat e para rinore në qytetet kryesore të Shqipërisë.

Ajo u emërua në postin e Drejtores së Kabinetit të Kryetarit të Bashkisë së Tiranës pas zgjedhjeve lokale të vitit 2015, pozicion që mbajti pergjatë katër viteve të mandatit të parë të Kryetarit Veliaj.

Email: anuela.ristani@tirana.al
 

Andi Seferi

Andi Seferi është Zv/Kryetar i Bashkisë së Tiranës që nga shtatori i vitit 2015.

Ai u diplomua fillimisht si jurist në Fakultetin e Drejtësisë, në Universitetin e Tiranës. Më pas kreu përsëri studimet e larta edhe në Fakultetin e Ekonomisë dhe Agrobiznesit, pranë Universitetit Bujqësor të Tiranës, duke u diplomuar si Ekonomist Agrar.
Specializohet nëpërmjet studimeve Master Ndërkombëtar, të Universitetit Katolik “Zoja e Këshillit të Mirë”, Universitetit të Palermos si dhe Insitutit të Formimit Politik “Pedro Arrupe” Perugia, për “Administrim dhe zhvillim territorial”, studime të cilat kanë shërbyer për të përforcuar aspektin e zhvillimit territorial dhe administrimin e politikave në nivel vendor. Thellon studimet në fushat socio-politike në Shkollën e Studimeve Politike të mbështetur nga Këshilli Europës, Kooperacioni Zvicerian dhe Deutsche Gessellschaft fur Internationale Zusammenarbeit (GIZ)
Pas eksperiencave relativisht të shkurtra pranë Telekomit Shqiptar dhe një Kompanie Private, Seferi nisi punë si Përfaqësues i Komunitetit Sant’Egidio në Shqipëri, për një periudhe mbi 17 vjeçare. Gjatë kësaj periudhe, ka qenë pjesë në të gjitha programet dhe misionet që Comunita’ di Sant’Egidio – ACAP ka realizuar në Shqipëri dhe Kosovë në të gjitha fushat e mëposhtme:
Ka drejtuar dhe administruar projekte zhvillimore dhe me impakt social, të mbështetura nga organizata ndërkombëtare, duke mbajtur funksione të lidhura me kompetencat e tij juridike, ekonomike, sociale, qeverisjes dhe zhvillimit të territorit, në ndihme te zhvillimit te vendit.  Projekte të cilat, gjithashtu, kanë realizuar ndërhyrje direkte në ndihmë te komunitetit rom, familjeve të varfëra, mirërritjes së fëmijëve/prindërimi si dhe projekte për riaftësimin e riintegrimin e fëmijëve me aftësi ndryshe. Projektet e menaxhuara kanë përfshirë fushën e shëndetësisë, arsimit, sociale, infrastrukturë, ujësjellesa etj, të cilat janë mbështetur nga organizma ndërkombëtarë si Banka Botërore, Unicef, Zyrat e Kooperacione të ndryshme në Shqipëri, UNDP, Qeveria Italiane, Qeveria Japoneze, etj.
Impakti i këtyre projekteve ka qënë i drejtpërdrejtë në komunitet, si në ndihmesë të Politikave të Ministrive të Linjës, po ashtu duke realizuar ndërhyrje infrastrukture në shkolla, spitale, qëndra shëndetësore, shtëpi të moshuarish, shtëpi për të sëmurë mëndorë, qendra reabilitimi etj.
Në fushën e shëndetësisë ka qenë pjesë e grupit ideator dhe administrator kryesor në realizimin e procesit të De-institucionalizimit në bashkëpunim me Ministrinë e Shëndetësisë, në fushën e Shëndetit Mendor. Në të njëjtën kohë, ka qenë i autorizuar nga Ministria e Jashtme Italiane, si përfaqësues i Agjensisë Birësimit Ndërkombëtar të Komunitetit Sant’Egidio duke realizuar birësime ndërkombetare dhe në distancë.
Një nga aktivitetet kryesore të karrierës së tij profesionale, ka qenë, ndihma që i ka dhënë popullit kosovar gjatë gjithë periudhës së Luftës së Kosovës duke ndihmuar familjet e shpërngulura në Kukës, por edhe menjëhere pas Luftes, duke shkuar ne Kosove per te ndihmuar familjet kosovare për riintegrimin e tyre në jetën shoqërore nëpërmjet implemetimit të projekteve të ndryshme me, Bankën Botërore, Bashkimin Europian etj, për një kohë të gjatë në shumë zona të Kosovës.
Ka nxitur, nxit e organizon inisiativa vullnetare me impakt social në nivel kombëtar dhe ndërkombëtar. Më gjërë ai është pjesëmarrës aktiv i shoqërisë civile, duke mbështetur personalisht në fushat e të drejtave të njeriut, cështjet gjinore, të drejtat e fëmijëve, bashkëjetesës paqësore, shëndetit dhe shërbimeve sociale dhe vecanërisht qeverisjes dhe zhvillimit të territorit.
Eshtë organizues, lektor dhe pjesmarrës aktiv në trajnime dhe evente informuese dhe edukuese ndërkombëtare, në Shqipëri, Gjermani, Itali, Poloni, Bosnje, etj. Ka qenë lektor  për programe ndërkombëtare si “COMBI” financuar nga Unicef dhe aplikuar nga Ministria e Arsimit dhe Sportit – mbi Mënyrat e Reja të Disiplinimit  si dhe  Drejtues Didaktik i licensuar i cikleve të vazhdueshme për Kurset e Formimit Profesional.
Merr pjesë rregullisht në debate publike dhe në media kombëtare, ashtu si dhe mban qëndrime publike në cështje të lidhura me profesionin dhe pikëpamjet e tij politike në mediat e shkruara. Eshtë njohës i thellë i gjuhës dhe kulturës Italiane dhe promovues i lidhjeve midis dy shteteve dhe popujve. Njeh shumë mirë gjuhën Angleze.
Andi Seferi, ka lindur në Vjenë, Austri - është i martuar dhe prind i dy fëmijëve, familja e tij është shumë e lidhur me qytetin e Tiranës. Andi Seferi është pjesmarrës aktiv në jetën politike dhe qytetare. Ai vetë promovon vazhdimisht iniciativa që vlerësojnë jo vetëm qytetin, por territorin e kësaj treve për historinë, traditat, kulturën dhe mjedisin e saj, ashtu si dhe integrimin kulturor – social – ekonomik midis zonave rubane dhe rurale.

Email: andi.seferi@tirana.al

Keti Luarasi

Nënkryetare e Bashkisë së Tiranës
Znj. Luarasi, e lindur në Tiranë, mban postin e Nënkryetares së Bashkisë së Tiranës që prej Tetorit 2021. Ajo iu bashkua Bashkisë së Tiranës në vitin 2015, me mandatin e parë fitues të kryebashkiakut Veliaj si Drejtoreshë e Përgjithshme e Planifikimit Strategjik dhe BNJ. Në vitin 2019, gjatë mandatit të dytë të kryebashkiakut Veliaj, ajo u promovua në detyrën e Shefes së Kabinetit, në kabinetin e Kryetarit, ku vijoi zbatimin e projekteve dhe detyrave brenda çdo drejtorie duke krijuar dhe ruajtur marrëdhënie ndër-departamentale për të mundësuar sukses.
Znj. Luarasi është profesioniste e motivuar dhe me përvojë dhe ka sjellë në ekipin e kryebashkiakut aftësitë dhe ekspertizën e saj në hartimin dhe menaxhimin e të gjitha aspekteve të menaxhimit të njerëzve. Njohuritë e saj për startup-et dhe organizatat, duke përfshirë planifikimin strategjik, organizimin, procedurat standarde të veprimit, personelin, udhëheqjen dhe monitorimin dhe vlerësimin e aktiviteteve në një mjedis dinamik, e me ritme të shpejta, si në sektorin privat ashtu edhe në atë të shoqërisë civile, qëndrojnë në themelin e punës së saj në Bashkinë e Tiranës.
Përpara se t'i bashkohej Bashkisë së Tiranës, Znj. Luarasi ka punuar si Drejtoreshe e Përgjithshme e Standardeve dhe Menaxhimit të Burimeve Njerëzore në kompaninë e parë shqiptare të telekomunikacionit celular PLUS Communication (2009-2015). Në këtë pozicion, zonja Luarasi luajti një rol kyç, duke mbledhur rreth PLUS-it, një forcë punëtore shumë profesionale dhe konkurruese, duke ngritur dhe zhvilluar një strukturë të plotë korporative, standardesh dhe procedurash, e duke rekrutuar më shumë se 1000 punonjës.
Znj. Luarasi gjithashtu ka drejtuar departamentin "Njerëz dhe Ndryshime" në KPMG Albania (2006-2009), duke ofruar shërbime konsulence dhe këshillimore për një sërë çështjesh të ndryshme për klientë ndërkombëtarë dhe vendas.
Gjatë periudhës 2000-2006 ajo ka punuar në sektorin e shoqërisë civile për Fondacionin Shoqëria e Hapur për Shqipërinë, si Koordinatore Programi dhe Menaxhere e Burimeve Njerëzore.
Eksperienca e saj e mëparshme përfshin edhe angazhimin akademik, ndërsa ka punuar si pedagoge në Universitetin e Tiranës, Fakulteti Filologjik për 4 vjet. Znj. Luarasi sjell një përvojë dhe ekspertizë të gjerë në lidhje me shërbimet dhe funksionet e Kapitalit Njerëzor, standardizimin dhe krijimin dhe vlerësimin e politikave në çdo aspekt të biznesit dhe strukturave të OJQ-ve dhe administratës publike.
Znj. Luarasi është diplomuar me diplomën Bachelor me titullin “Student i Shkëlqyer” në Letërsi dhe Gjuhësi nga Universiteti i Tiranës (1999). Ajo gjithashtu, ka kryer studimet në gradën Master Shkencor në Sjellje Organizative, në Universitetin e Londrës, në Angli, më 2005.