Thirrje për aplikime

Tirana, Kryeqyteti Mesdhetar i Kultures dhe Dialogut – 2025

Përgjatë vitit 2025, Tirana do jetë Kryeqyteti Mesdhetar i Kulturës dhe Dialogut, së toku dhe njëkohësisht me qytetin e Aleksandrisë në Egjipt, një titull i akorduar për dy qytetet nga Unioni për Mesdheun (https://ufmsecretariat.org/) dhe Anna Lindh Foundation (https://alf.website/en/), si një mekanizëm i promovimit të shkëmbimeve ndërkulturore dhe forcimit të dialogut Veri-Jug dhe Lindje-Perëndim, e gjitha në kuadrin e identitetit të përbashkët euro-mesdhetar të rajonit.
Programi për Tiranën si Kryeqytet Mesdhetar i Kulturës dhe Dialogut 2025, i titulluar "Urat MESDHETARE", synon të krijojë një përvojë kulturore transformuese duke nxitur komunikimin ndërkulturor me qytetet Euro-Mesdhetare.
Nisma përmban një larmi aktivitetesh, duke përfshirë ekspozita arti, festivale muzike dhe filmi, ekspozita të arteve interpretuese dhe aktivitete letrare, të shoqëruara nga festivale ushqimore ndërkulturore dhe seminare e tryeza të trashëgimisë.
"Urat MESDHETARE" e ve theksin mbi përfshirjen e komunitetit, inovacionin dixhital dhe ruajtjen e trashëgimisë kulturore, duke synuar të lartësojë diversitetin mesdhetar, promovojë turizmin e qëndrueshëm dhe të pasurojë jetën kulturore të Tiranës. Ky program gjithëpërfshirës aspiron të ndërtojë lidhje më të forta në të gjithë peizazhin kulturor Euro-Mesdhetar.

Në këtë këndvështrim, Bashkia e Tiranës nxit dhe inkurajon të gjithë aplikantët  për të mishëruar në projekt-propozimet e tyre komponentë euro-mesdhetarë, duke kapërcyer kufijtë e qytetit dhe vendit tonë dhe duke u shtrirë drejt qyteteve, organizatave dhe individëve të mundshëm në pellgun Euro-Mesdhetar.



Aplikim për mbështetje për projekte kulturore-artistike sportive, rinore dhe turistike

Këshilli Artistiko – Kulturor është organi i cili shqyrton projektet artistike, kulturore, rinore, sportive dhe turistike. Ky Këshill mblidhet jo më shumë se 12 herë në vit.
Aplikimet e projekt propozimeve duhet të bëhen minimalisht 2 (dy) muaj përpara datës së zhvillimit të aktivitetit.
Dokumentat duhet të jenë të firmosura (dhe të vulosura kur janë me nipt) nga aplikanti.
Aplikantët duhet të jenë shqiptarë ose me leje qëndrimi në Shqipëri gjatë kohës së aplikimit dhe zbatimit të projektit.
Projektet duhet të kenë shtrirje kohore të zhvillimit maksimalisht përgjatë vitit kalendarik në të cilin bëhet vlerësimi dhe miratimi. Projektet duhet të zhvillohen brenda territorit të Tiranës.
Çdo aplikim duhet të përmbajë të gjithë dokumentacionin e nevojshëm origjinal, sipas kritereve të publikuara në web. Në rast se aplikimet kanë mungesë dokumentacioni, nuk do të kalojnë për shqyrtim në mbledhjen e Këshillit.