Shpërndaje
PROJEKTI “Web Challenge Tirana”, është projekti më i ri i internshipit, miratuar me Vendimin nr. 26, datë 17.03.2023, sipas Udhëzuesit Operacional të Këshillit Bashkiak Tiranë.
Qëllimi i projektit “Web Challenge Tirana”: 12 të rinj të grupmoshës 18-25 vjeç të cilët janë në përfundim të arsimit të mesëm (profesional apo të përgjithshëm), duke ndjekur studimet e shkollës së lartë, ose kanë përfunduar studimet, në Institucionet e Arsimit të mesëm apo të lartë, publike ose private, brenda ose jashtë vendit, në fushat: shkenca kompjuterike, teknologji informacioni dhe komunikimi, informatikë, informatikë ekonomike, inxhinieri matematike dhe informatike, të ngjashme, do të angazhohen në praktikë pune për 3 muaj në Bashkinë Tiranë.
Afati i aplikimit për projektin është gjatë periudhës 31 tetor 2024 - 22 dhjetor 2024.
Për të kryer internshipin, 12 (dymbëdhjetë) të rinj fitues, do të përzgjidhen nëpërmjet procedurës së konkurrimit, dhe pas përzgjedhjes do të punojnë në 3 (tre) Skuadra Pune, për të realizuar dhe përfunduar gjatë periudhës 3 mujore të praktikës, 3 (tre) faqe interneti duke bashkëpunuar nga afër me stafin e Drejtorisë së Përgjithshme të Teknologjisë së Informacionit dhe Inovacionit dhe të Dhënave, pranë Bashkisë Tiranë.
Në përfundim të praktikës, secila Skuadër Pune dorëzon faqen e internetit dhe në bashkëpunim me ekspertët e fushës, bëjnë të mundur vendosjen e tyre në domainet respektive për faqet e internetit.
Praktikantëve fitues do ti akordohet një çmim individual bruto, prej 85,000 lekësh si edhe një çmim secilës prej 3 skuadrave të punës sipas renditjes përfundimtare:
- për vendin e parë çmimi prej 250,000.00 lekë;
- për vendin e dytë çmimi prej 200,000.00 lekë;
- për vendin e tretë çmimi prej 150,000.00 lekë;
Aplikimi do të kryhet online, në fund të kësaj faqeje. Për informacion të mëtejshëm rreth mënyrës së aplikimit, aplikantët mund të dërgojnë një kërkesë për informacion në adresën elektronike: [email protected]
Fazat e projektit
1. Aplikimi
Aplikimi do të zhvillohet duke plotësuar formularin online, në fund të kësaj faqeje zyrtare të Bashkisë Tiranë. Në aplikim duhet të plotësohen të gjitha fushat e kërkuara, sipas Formularit të Aneksit Nr. 1 të Udhëzuesit Operacional: për të dhënat personale, koncept-ideja për faqe interneti për qytetin e Tiranës dhe dokumentacioni i kërkuar. Aplikimi duhet të kryhet brenda afatit të përcaktuar në njoftimin publik dhe në stendat e Informimit Publik (brenda 40 ditëve nga data e shpalljes së thirrjes).
Dokumentacioni i kërkuar nga ana e aplikantit për tu bashkangjitur në fund të Formularit:
o Dokument identifikimi (Pasaportë ose Kartë Identiteti)
o Curriculum Vitae (CV): Këtu do të përfshihet një përshkrim i shkurtër i njohurive që zotëron aplikanti lidhur me përdorimin e gjuhëve të programimit apo eksperienca të mëparshme me ndërtimin e faqeve të internetit (detyra kursi, punime diplome etj). Mungesa e eksperiencave të mëparshme nuk përbën kusht për skualifikim por do të ndikojë në vlerësimin e përgjithshëm të koncept-idesë për faqe interneti.
o Dëshmi Penaliteti
o Vërtetim Studenti
2. Konkurrimi dhe Vlerësimi i koncept-ideve për faqe interneti
Të gjithë aplikantët e kualifikuar, me anë të emailit zyrtar të projektit, ftohen brenda 10 ditëve pune të prezantojnë modelet/ skicat e faqeve të internetit sipas funksionaliteteve dhe vlerësimin paraprak të fizibilitetit teknik.
Vlerësimi i koncept-idesë do të bëhet nga Komiteti Vlerësues.
Aplikantët, të cilët nuk janë kualifikuar, njoftohen individualisht nga ana e Sekretariatit. Aplikantët konkurrent të pa kualifikuar, mund të ankimojnë këtë vendim brenda 3 (tre) ditëve pune, nga shpallja e rezultatit, pranë Bordit Drejtues, i cili brenda 3 (tre) ditëve pune, i kthen përgjigje ankimuesit.
Në përfundim të fazës së rishqyrtimit të komenteve/ankesave, shpallet rezultati përfundimtar me renditjen e 12 konkurrentëve – praktikantë fitues. Rezultati përfundimtar i bëhet me dije konkurrentëve individualisht.
3. Përgatitja dhe dorëzimi i prototipit, zhvillimi, dizenjimi dhe testimi për 3 (tre) faqe interneti
Komiteti Vlerësues i propozon për miratim, brenda 5 (pesë) ditëve nga shpallja e fituesve, Bordit Drejtues zhvillimin e mëtejshëm të 3 (tre) faqeve të internetit, duke përzgjedhur nga propozimet fituese ato të cilat janë më të realizueshme nga ana teknike dhe kanë interes të lartë për Bashkinë Tiranë.
Bordi Drejtues brenda 3 (tre) ditëve pune, shpreh miratimin e 3 faqeve interneti mbi të cilat do të vijojë puna, deri në zhvillimin e plotë të tyre. Komiteti Vlerësues organizon 12 praktikantët (intern) në 3 skuadra pune (4 praktikantë /skuadër) dhe udhëzon ato për krijimin e një prototipi për secilën faqe. Skuadrat e punës krijojnë një plan pune për realizimin e prototipeve. Brenda 15 ditëve të para nga fillimi i konkursit, praktikantët organizojnë një takim pune dhe prezantojnë prototipet e krijuara.
Me mbështetjen e stafit të DPTIID dhe DTZH, ekspertët do të ofrojnë trajnime 2 ditore mbi dy gjuhë programimi (HTML, Java, CSS, Python, Javascript, PHP, FTP, Swift, C++) për 12 praktikantët si edhe 4 ditë mentorim.
Gjatë muajit të dytë dhe të tretë, të internshipit do të vijojë puna për zhvillimin, dizajnin dhe testimin e 3 (tre) faqeve të internetit. Gjatë kësaj periudhe Komiteti Vlerësues dhe Skuadrat e Punës punojnë së bashku për zhvillimin e plotë të faqeve dhe testimin e tyre.
4. Vendosja e Faqeve të Internetit dhe dhënia e çmimeve
Në përfundim të muajit të tretë të praktikës, Skuadrat e Punës dorëzojnë faqet e punuara dhe në bashkëpunim me Komitetin Vlerësues bëjnë të mundur publikimin e faqeve të internetit sipas domain përkatës (xyz.al, xyz.tirana.al, xyz.com.al, xyz.net.al, xyz.org.al, xyz.edu.al etj, ku xyz është emri i faqes).
Bordi Drejtues shpall fituesit me vendim dhe akordon çmimet individuale dhe çmimet për skuadër gjatë aktivitetit përmbyllës të projektit.
Rezultati dhe dhënia e çmimeve bëhen publike në faqen zyrtare të internetit të Bashkisë Tiranë.
KONCEPT- IDEJA
Përmbajtja e Koncept- Idesë
Aplikimet duhet të kompletohen në gjuhën shqipe duke përdorur formën e aplikimit online të paraqitjes së koncept-ideve të integruar në këtë thirrje. Bashkia Tiranë nuk do të pranojë asnjë aplikim i cili do të dorëzohet në format tjetër nga ai i përcaktuar në thirrje.
Aplikimi i Koncept- Idesë
• Aplikantët duhet të plotësojnë formatin online për koncept-ide të integruar në fund të kësaj faqe.
• Dokumentet e kërkuara do të integrohen si dokumente bashkëlidhur formës.
• Koncept-Idetë e dorëzuara në forma të tjera ose në adresa të tjera nuk do të pranohen.
Afati për dorëzimin e Koncept- Idesë
• Afati i aplikimit do të shpallet së shpejti.
• Çdo koncept - ide e dërguar pas afatit skualifikohet.
Vlefshmëria e Koncept- Idesë
Koncept-ideja mund të jetë e bazuar në praktika të mëparshme, por duhet të jetë punim origjinal dhe jo plagjiaturë apo ide plotësisht e kopjuar. Vetëm nëse plotësohen këto kushte ideja do të jetë e vlefshme. Koncept-ideja për faqe interneti duhet të mendohet si diçka që do t’i shërbejë qytetarëve të Tiranës apo Bashkisë së Tiranës.
Pyetje të shpeshta
1. Çfarë mund të përfitoj nga ky projekt?
• 3 muaj eksperiencë pune
• Aftësi në fushën e programimit.
• Aftësi në krijimin e faqeve të internetit.
• Aftësi të reja teknike.
• Aftësi ndërpersonale (soft skills).
• Mundësi për krijimin e një rrjeti kontaktesh me profesionistë të fushës.
• Një çmim simbolik për punën tuaj.
2. A mund të aplikoj me më shumë se një ide?
Aplikimi me më shumë se një ide nuk vlen, pasi çdo aplikant mund të konkurrojë me jo më shumë se 1 koncept–ide për faqe interneti.
3. A mund të aplikoj në grup?
Aplikimi do të jetë individual, dhe pasi kaloni konkursin do të bashkoheni me dy persona të tjerë në një grup.
4. Si do ta përfitoj çmimin?
Pasi kaloni konkursin, do t’ju kërkohet të paraqisni dokumentacionin e mëposhtëm:
• Kopje të kartës së identitetit
• Vërtetim origjinal për llogarinë bankare në lek
100 % e çmimit individual dhe si skuadër pune do të dorëzohet në përfundim të afatit 3 mujor të internshipit.
Në rast se fituesit e një grupi nuk arrijnë të paraqesin një produkt përfundimtar (faqe interneti funksionale) ata humbasin të drejtën e përfitimit të çmimit. Në rast se fituesi largohet me kërkesë individuale gjatë kohës së kryerjes së internshipit ai/ajo humbet të drejtën e përfitimit të çmimit por pajiset me një vërtetim për kryerjen e internshipit për atë periudhë dhe për aq orë sa ka frekuentuar.
Aplikimi
Për të marrë pjesë në projektin “Web Challenge Tirana”, ju duhet të aplikoni këtu https://tirana.al/web-challenge
Kujdes: Para se të nisni aplikimin, duhet të keni gati koncept-idenë për faqe interneti dhe dokumentet e mëposhtme për ti ngarkuar në fund të formularit:
- CV
- Dokument identifikimi
- Dëshmi penaliteti.
- Vërtetim studenti/Diplomë
Shpërndaje