10 Janar - Mes tingujve dhe poezive

Takimi “Mes tingujve dhe poezive” ishte aktiviteti kushtuar krijimtarisë të autorit të shquar Dritëro Agolli. Ky aktivitet erdhi në vazhdimësi të takimeve letrare që Drejtoria e Kulturës dhe Trashëgimisë Kulturore organizon, këtë herë në bashkëpunim me Muzeun Vendor “Shtëpia Studio Agolli”. Aktiviteti u zhvillua në bibliotekën "Moikom Zeqo" në datën 10.01.2022, në orën 10:00. Në takim morrën pjesë studentë të fakultetit të Historisë dhe Filologjisë, dega Letërsi, por edhe dashamirës të veprës së Dritëro Agollit. E ftuar e veçantë për të folur rreth Agollit dhe veprës së tij ishte shkrimtarja e njohur Diana Çuli. Në takim u fol në mënyrë shteruese rreth veprës së tij, stilit, prozës, etj. Bashkëbiseduesit u ndalën në mënyrë të veçantë te poezia, mënyrës sesi autori e sjell atë te lexuesi. Shkrimtari ishte i thjeshtë dhe i thellë njëkohësisht në lëvrimin e poezisë. Në takim u evidentua mënyra e të shkruarit para dhe pas viteve ‘90. Gjithashtu u fol për mënyrën se si Dritëroi spikaste talentet e reja, kjo si pasojë e pozicionit t ë tij si drejtues i Lidhjes së Shkrimtarëve, duke ju dhënë mundësinë atyre të shfaqnin talentin. Një temë tjetër e diskutimit ishte dhe dimensioni njerëzor i Dritëroit, në mënyrë të veçantë lidhja e tij me Sadijen. Ne fund, të pranishmit patën kënaqëinë të dëgjonin disa nga poezitë e tij të sjella mjeshtërisht nga disa studente të Letërsisë.