100 vjet marrëdhënie diplomatike Shqipëri - Shtetet e Bashkuara të Amerikës

Në datën 28 korrik 2022, në Tiranë, në Sheshin “Skënderbej”,  në mbrëmje, Bashkia e Tiranës organizoi një  Koncert Festiv madhështor.

Koncerti festiv u organizua për dy ngjarje speciale: 100-Vjetori i marrëdhënieve Shqipëri-SHBA dhe hapja e negociatave me Bashkimin Europian.
Pikërisht , më 28 Korrik, një shekull më parë, u vendos lidhja jetike e miqësisë dhe partneritetit, me vendin simbol të demokracisë, e cila kaloi përmes një historie të trazuar nga perdja e hekurt, për t'u rikthyer në të tashmen me e fortë se kurrë. Dhe pikërisht ky 100 Vjetor, përkon me çeljen e negociatave të Shqipërisë për anëtarësim në Bashkimin Europian, që është një moment kyç për vendin, me rëndësi  historike për ne shqiptarët, që na çon një hap më afër familjes së madhe Europiane.

Koncerti u moderua nga këngëtarja Marsela Çibukaj dhe pati interpretime nga këngëtarë të mirënjohur të skenave tona, si Flori Mumajesi, Ylli Limani, Eneida Tarifa, Soni Malaj, Xhensila Myrtezai, Alban Skënderaj, Çiljeta, Fifi, etj., që u pritën me duartrokitje e brohoritje nga publiku i  shumtë tiranas, që shpesh këndonte bashkë me interpretuesit. Të pranishëm ishin edhe Kryeministri z. Edi Rama, Presidenti i vendit z. Bajram Begaj, Kryetari i Bashkisë z. Erion Veliaj, Ambasadorja e Shteteve të Bashkuara të Amerikës, znj.Juri Kim si dhe deputetë e anëtarë të tjerë të Kabinetit Qeveritar.

Gjatë koncertit u dhanë mesazhe përshëndetëse urimi nga Kryeministri i vendit z. Edi Rama, nga Presidenti, z. Bajram Begaj, nga Ambasadorja e SHBA, znj. Juri Kim, nga Presidenti i Shteteve të Bashkuara z. Joe Biden, nga Presidenti i Këshillit Europian, z. Charles Michel, nga Presidentja e Komisionit Europian, Znj. Ursula Von der Leyen, nga Shefi i Diplomacisë Europiane z. Josep Borrel, nga Kryeministri i Republikës Çeke dhe njëkohësisht kryesuese e radhës e Bashkimit Europian, z. Petr Fiala, si dhe nga një sërë Kryeministrash e Ministrash të Jashtëm të vendeve anëtare të Bashkimit Europian.

Tirana u ndez e gjitha nga një atmosferë e ngrohtë dhe entuziaste, që e bëri më të dashur dhe të paharrueshme këtë ditë të shënuar për të gjithë shqiptarët.