Shpërndaje
Në kuadër të 114 vjetorit të lindjes së shkrimtarit dhe përkthyesit të mirënjohur Mitrush Kuteli (Dhimitër Pasko), Drejtoria e Kulturës dhe Trashëgimisë Kulturore organizoi një aktivitet në Muzeun Historik Kombëtar Salla “Unesco”, për të kujtuar dhe nderuar veprën dhe kontributin e madh të tij. Në këtë aktivitet morrën pjesë kryesisht studentë, dashamirës të letërsisë dhe praktikantë pranë Bashkisë Tiranë. Të ftuar ishin njohës shumë të mirë të veprës së autorit si doc. Dr. Kastriot Gjika, lektor pranë Fakultetit të Historisë dhe Filologjisë, Universiteti i Tiranës dhe z. Dorian Koçi, Drejtor i Muzeut Historik Kombëtar .
Mitrush Kuteli lindi më 13 shtator 1907 në Pogradec. Mësimet e para i mori në vendlindje, studimet e mesme në Selanik, në Shkollën Tregtare Rumune (1921-1928). Më 1931 u diplomua në Bukuresht, në Akademinë e Shkencave të Larta Ekonomike. Më 1934 mori doktoratën në shkencat bankare dhe monetare. Ai ndërroi jetë më 4 maj 1967.
Kontributi i tij spikat jo vetëm në fushën e ekonomisë, por u shqua si krijues, prozator, poet, folklorist, publicist, rrëfenjës e kritik letrar. Një vend të rëndësishëm në krijimtarinë e tij zënë përkthimet nga Rusishtja, Rumanishtja, Frëngjishtja e Italishtja.
Aktualisht shumica e shkrimeve dhe përkthimeve të Kutelit janë në qarkullim."Tregime të Moçme Shqiptare", është një libër që vazhdimisht renditet i shumëkërkuar te Shtëpia e Librit, pavarësisht se kanë kaluar shumë dekada që kur u botua për herë të parë;
Në vitin 2017, "Tregime të Moçme Shqiptare" u botua bashkë me ilustrimet e Gazmend Lekës.
Vepra e Kutelit është botuar në tre vëllime me titullin "Prozë dhe Vargje të Zgjedhura".
Kritika e Kutelit është përfshirë te botimi “Shënime Letrare”.
Një nga përrallat më të bukura të Kutelit, “E madhe është gjëma e mëkatit” është botuar më vete.
Vitet e vështira të Luftës së Dytë Botërore janë botuar te libri “Netë moldave”.
“Në një cep të Ilirisë së Poshtme” përfshin tregime me frymëzim nga lashtësia ilire.
E famshmja "Poem Kosovar dhe Poemi i Shëndnaumit" është botuar si libër më vete.
"Havadan më Havadan" i Mitrush Kutelit është një përmbledhje pamfletesh që u botuan në shtypin e kohës në vitet 1930 – 1940. Në vitin 1944 autori i nxori si libërth më vete, me pseudonimin “Lugati”.
Për të vegjëlit në qarkullim gjenden edhe përrallat me ilustrime "Maçoku, Gjeli dhe Dhelpra", ilustruar nga Artur Dauti, "E bukura e dheut" dhe "Piktori i vogël që bën mekullira".
Ndonëse njihet më së shumti si shkrimtar, në jetën reale, Dr. Dhimitër Pasko ishte një ekonomist, i cili punonte në Bankën Kombëtare të Shqypnis, pararendësja e Bankës së Shqipërisë së sotme. Eksperienca e tij si ekonomist shpaloset te libri "Ditari i Ekonomistit".
Kuteli si përkthyes gjithashtu është i vlerësuar.
Kryevepra e Gogolit ”Frymë vdekura” erdhi në shqip falë Kutelit në vitin 1962. Dy vjet më herët, Kuteli pati sjellë në shqip "Tregimet e Petërburgut".
Ndër shqipërime të tjera gjenden “Vërshimet e Lumenjve” nga Kostandin Paustovski, “Dama Maç” e Pushkinit dhe “Njëzetegjashtë edhe një” nga Maksim Gorki.
Në takim u fol gjatë dhe pati bashkëbisedim mes të ftuarve dhe studentëve, të cilët ishin të interesuar për të njohur më tepër detaje nga jeta dhe vepra e tij.
Shpërndaje