Shpërndaje
Në kuadër të Ditës Botërore kushtuar Besimeve Fetare, ditën e dielë në datën 16 janar 2022, u zhvillua një guidë në objektet kryesore të kultit në Tiranë. Pjesë e grupit që i’u bashkuan këtij rrugëtimi ishin besimtarë të të gjitha besimeve fetare, të cilët i’u përgjigjën ftesës së Bashkisë Tiranë, për të vizituar shtëpitë e të gjthë komuniteteve fetare e për të mësuar më shumë për organizimin e tyre, për ritet, traditat, rregullat që udhëheqin jetën e tyre shpirtërore.
Itinerari nisi në xhaminë e Et’hem beut, për të vijuar në Katedralen Katolike të Shën Palit, Katedralen Ortodokse “Ngjallja e Krishtit” dhe Kryegjyshatën Botërore të Bektashizmit. Ky rrugëtim i veçantë u përshëndet me dashamirësi nga kleri i secilit besim. Ata vunë në dukje se në Tiranë dhe në Shqipëri nuk ka “tolerancë fetare” por bashkëjetesë dhe harmoni fetare. Të gjithë jemi të barabartë dhe bashkëekzistencën në një shoqëri nuk e kemi të sforcuar por me dëshirë dhe vullnet të plotë.
Që prej ditës së parë kur u ideua përcaktimi i një dite botërore të Besimeve Fetare qëllimi kryesor ishte që të gjenden urat për një komunikim ndërfetar, të respektojmë besimet dhe kulturat e tjera dhe mbi të gjitha, të fokusohemi tek ajo që na përbashkon me synimin për të ndërtuar një shoqëri më të mirë, gjithëpërfshirëse dhe aspak përjashtuese. Në këtë rast mund ta themi se i’a kemi arritur qëllimit!
Shpërndaje