Shpërndaje
Dita Ndërkombëtare e Muzeut u përcaktua nga ICOM, (Këshilli Ndërkombëtar i Muzeve), në vitin 1977 dhe u përqafua menjëherë nga të gjithë muzetë në mbarë botën. Kjo ditë përbën një moment të një rëndësie të veçantë për komunitetin ndërkombëtar të muzeve.
Synimi i Ditës Ndërkombëtare të Muzeut (DNM) është rritja e ndërgjegjësimit se "muzetë janë një mjet i rëndësishëm i shkëmbimit kulturor, pasurimit të kulturave dhe zhvillimit të mirëkuptimit të ndërsjellë, bashkëpunimit dhe paqes midis popujve". E organizuar çdo vit më 18 maj, ngjarjet dhe aktivitetet e planifikuara për të festuar Ditën Ndërkombëtare të Muzeut mund të zgjasin një ditë, një fundjavë ose një javë të tërë. Gjithnjë e më shumë muze bëhen pjesë e aktiviteteve të ndryshme për Ditën Ndërkombëtare të Muzeut. Vitin e kaluar, më shumë se 37,000 muze në rreth 158 vende në mbarë globin morën pjesë në veprimtari kushtuar kësaj dite.
Tema e kësaj Dite këtë vit ishte "Fuqia e Muzeve". Në kuadër të kësaj Dite, Drejtoria e Kulturës dhe Trashëgimisë Kulturore vizitoi Galerinë e Postës Shqiptare për t’u njohur nga afër me një nga hapësirat më të reja në kryeqytet e cila lidhet ngushtësisht me Trashëgiminë Kulturore.
Gjatë kësaj vizite të ftuarit u njohën nga afër me emisione të ndryshme dhe të veçanta të pullave të postës por edhe me proceset e punës, bocetet , telegrafet apo vulat.
Duke qenë përpara një sezoni veror ku pritet që Tirana të vizitohet nga një numër shumë i madh vizitorësh, kjo ishte një vizitë e parë e cila ngriti urat e një bashkëpunimi që do të pasohet edhe nga shumë vizita të tjera, duke qenë se është një nga detyrat funksionale të DKTK, por edhe një kënaqësi promovimi të hapësirave me karakter kulturor.
Po kështu Drejtoria e Kulturës dhe Trashëgimisë Kulturore organizoi një vizitë në Muzeun e Bankës së Shqipërisë, ku të ftuarit panë koleksionin e monedhave si dhe një ekspoze të dokumenteve të krijimit të Bankës së Shqipërisë të prezantuara nga Drejtoria e Përgjithshme e Arkivave. Vizita ngjalli shumë interes.
Shpërndaje