18 Prill, Dita Ndërkombëtare e Monumenteve dhe Qendrave Arkeologjike

Data 18 Prill shënon Ditën Ndërkombëtare të Monumenteve dhe Qendrave Arkeologjike. Për të kujtuar këtë datë të rëndësishme Drejtoria e Kulturës dhe Trashëgimisë Kulturore në Bashkinë Tiranë me mbështetjen e Institutit të Arkeologjisë organizoi  një  vizitë  në  Muzeun Arkeologjik me gjimnazistë të shkollës "Sami Frashëri", ku Dr. Melsi Labi nga Instituti i Arkeologjisë dha nje tur të plotë të Muzeut dhe koleksioneve të pasura tij nga monumentet dhe sitet e shumta të vendit.

Në vitin 1982, ICOMOS (Këshilli Ndërkombëtar i Monumenteve dhe Qendrave Arkeologjike) shpalli datën 18 Prill si Ditën Botërore të Trashëgimisë Kulturore  ose Ditën Ndërkombëtare për Monumentet dhe Sitet.

Qysh prej këtij viti, 18 Prilli ka shënuar ditën e kremtimit dhe promovimit të Monumenteve dhe Siteve si elemente të trashëgimisë kulturore.  Gjithashtu është vlerësuar si një moment për të rritur ndërgjegjësimin për rëndësinë, nevojën dhe përfitimet e konservimit dhe mbrojtjes së saj.

Tema për Ditën Botërore të Trashëgimisë për vitin 2024 është  përcaktuar “ Të zbulojmë dhe njohim diversitetin”. Kjo temë e vendos theksin te pasuria e shumëllojshmëria e të shkuarës historike. Gjithashtu na kujton të eksplorojmë dhe vlerësojmë trashëgiminë unike të komuniteteve të ndryshme.