21 Qershor, Dita Botërore e Muzikës

Text size
Aa Aa
21 Qershori shënon Ditën Botërore të Muzikës që festohet në mbarë botën. Me rastin e kësaj dite, Drejtoria e Kulturës dhe Trashëgimisë Kulturore të Bashkisë Tiranë, organizoi një takim me etnomuzikologun , Profesor Vasil Tole në ambientet e Liceut Artistik Jordan Misja. Pjesëmarrës ishin nxënës e mësues të kantos e intrumenteve të klasave të dhjeta e të njëmbëdhjeta.

Ishte vizionari Lang, ish-ministër i kulturës së Francës që në vitin 1982 themeloi këtë traditë "Festën e Muzikës", pikërisht në 21 Qershor, në ditën kur dielli ndrion më gjatë e më fort.
Kjo është dita  e të gjitha llojeve të muzikave: popullores, klasikes, xhazit, alternatives etj, e muzikës që shoqëron njerëzit në jetën e tyre të përditshme.
Në 21 Qershor në të gjithë botën gjëmojnë shtëpitë, sheshet dhe rrugicat e qyteteve nga tingujt e muzikës. Normalisht kështu do të duhej të ndodhë edhe në Shqipëri, Kosovë etj.
Kjo është dita e kultit të muzikës si kulturë e gjallë jete.
Muzika është një gjuhë komunikimi, kur e interpreton atë shkrihesh në emocione pozitive. Eshtë fakt i provuar edhe shkencërisht se kur luan muzikë nuk mendon negativisht. Si në asnjë rast tjetër.
Prandaj kjo ditë duhet kremtuar në nder të të gjithë krijuesve e interpretuesve të muzikës, e posaërisht bartësve të folklorit muzikor shqiptar, artistëve tanë që plot sakrifica kanë krijuar Shqipërinë tingullore, nga Jugu në Veri.

Në kuadër të kësaj dite, Prof. Vaso Tole bëri edhe një prezantim të librit të tij mbi figurën e kompozitorit të shquar z. Çesk Zadeja duke kujtuar momentet më të rëndësishme të formimit dhe të karrierës të këtij muzikanti të madh që ka lënë gjurmë të thella në muzikën shqiptare.
Vitit 2022 shënon edhe 95 vjetorin e lindjes së tij dhe për këtë rast do të organizohen aktivitete përkujtimore në nderim të veprës së tij.

Më tej takimi mori formën e një bashkëbisedimi interesant, ku  nxënësit e mësuesit morën përgjigje për çështje që iu interesonin.