25 Tetor - Takim me Artizanë

“Takim me Artizanë” ishte aktiviteti i organizuar nga Drejtoria e Kulturës dhe Trashëgimisë Kulturore më 25 Tetor 2021, në Instalacionin Reja. Ky aktivitet erdhi në kuadrin e misionit për ruajtjen dhe promovimin e vlerave që artizanati zë në trashëgiminë kulturore. Në këtë takim morën pjesë disa artizanë që ushtrojnë aktivitetin e tyre në territorin e administruar nga Bashkia Tiranë.
Takimi u organizua në formën e një bashkëbisedimi, ku u diskutuan mendime dhe ide se si të promovojmë produktet artizanale dhe mbi të gjitha, për mbështetjen dhe ndihmën në procesin e punës së disa prej profesioneve të cilat po tkuren dita-ditës. Parë kjo edhe nga këndvështrimi nga numri i shtuar dhe interesi në rritje që kanë vizitorët vendas dhe të huaj për prodhimet e artizanëve.
Nga ana e artizanëve u hodhën ide konkrete se si Bashkia e Tiranës mund ti mbështesi, promovojë e stimulojë në vijimësi. Të gjithë artizanët njëzëri shprehën dëshirën e tyre për ta institucionalizuar një panair të përhershëm ne Tiranë duke e kthyer në një traditë, si një nga mënyrat më të mira dhe efikase për promovimin e punës dhe produkteve të tyre. Artizanët sugjeruan se vendi më i përshtatshëm për organizimin e panaireve është sheshi midis Pallatit të Kulturës dhe Kullës së Sahatit. Gjithashtu, shprehën mendimin e tyre që panairet të organizohen çdo javë me një kohëzgjatje 2 – ditore. Një temë tjetër që zuri vend në diskutim ishte dhe mbrojtja nga abuzuesit, pasi ka disa që pretendojnë që janë artizanë, por nuk kryejnë punime të mirëfillta në dorë. Në fund, të pranishmit shprehën falenderime të veçanta për Bashkinë e Tiranës dhe stafin të DKTK, për mbështetjen e dhënë në vazhdimësi për artizanët.
Drejtoria e Kulturës dhe Trashëgimisë Kulturore shprehu gjithë mbështetjen e saj për artizanët e Tiranës duke i’u garantuar atyre se do të bëjë përpjekjet maksimale për t’iu siguruar lehtësimet e nevojshme për ekspozimin dhe promovimin e produkteve artzanale.