27 Tetor - Dita Ndërkombëtare e Trashëgimisë Audio - Vizuale: Vizitë në Arkivin Qëndror Shtetëror të Filmit

Në kuadër të Ditës Ndërkombëtare të Trashëgimisë Audio – Vizuale, 27 Tetor, Drejtoria e Kulturës dhe Trashëgimisë Kulturore organizoi një vizitë në Arkivin Qëndror Shtetëror të Filmit. Pjesëmarrës në këtë aktivitet ishin studentë, praktikantë pranë Bashkisë Tiranë.
Gjatë këtij aktiviteti, të pranishmit u njohën me historinë e filmit shqiptar, kryesisht në vitet e realizmit socialist. U vizitua një ekspozitë pikture ku ishin pikturuar skena nga filma të ndryshëm shqiptar. Gjithashtu, u njohëm me postera filmash të ndryshëm. Një vend të veçantë në ekspozitë zinin objektet dhe trofetë e ndryshëm kombëtarë e ndërkombëtarë që kishin fituar filmat shqiptarë ndër vite. U prek nga afër dosja e një filmi ku përfshihej skeda e filmit, skenari, posteri, montazhi, foto nga filmi etj. Më pas punonjëset e Arkivit Qëndror Shtetëror të Filmit na prezantuan me pajisjet që përdoreshin për të xhiruar një film. Disa pajisje ishin prodhim nga ish Bashkimi Sovjetik dhe disa prodhime kineze, duke pasqyruar dhe aleancat e shtetit komunist shqiptar të asaj kohe.
Vizita vazhdoi në vendet ku ruheshin filmat, të cilat ishin dhoma me kërkesa specifike teknike temperature dhe lagështie. U vizitua dhe kinemaja ku u shfaqën pamje filmike rreth 30 minuta të Tiranës gjatë viteve të komunizmit. Studentët u shprehën shumë të kënaqur pasi vizita në AQSHF ishte një eksperiencë ndryshe dhe shumë interesante për ta. Në përfundim të vizitës u vendosën ura lidhëse për bashkëpunime të tjera në të ardhmen mes Arkivit Qëndror Shtetëror të Filmit dhe Bashkisë së Tiranës.