Shpërndaje
Në kuadër të aktiviteteve të shumta kulturore që po zhvillohen gjatë “Tetorit të Librit”, si edhe në vazhdën e aktiviteteve që Bashkia Tiranë ka organizuar në nderim të veprës dhe kontributit të mjaft shkrimtarëve dhe shqipëruesve në letrat shqipe, Drejtoria e Kulturës dhe Trashëgimisë Kulturore në Bashkinë Tiranë, në bashkëpunim me Bibliotekën Kombëtare të Shqipërisë dhe Institutin e Librit dhe të Promocionit, zhvilluan të enjten, më datë 7 tetor 2021, takimin “Rrugëtimi letrar i Bashkim Shehut”, me pjesëmarrjen e veçantë të vetë shkrimtarit.
Të ftuar ishin drejtori i BKSH-së, z. Piro Misha, botuesja dhe përfaqsuesja e ILP -së znj. Irena Toçi. Pjesmarrës në këtë aktivitet ishin studentë, nxënës, studiues, lexues etj.
Aktiviteti u zhvillua në formë bashkëbisedimi, ku pjesëmarrësit patën mundësinë të pyesnin autorin për krijimtarinë e tij, veprat dhe ngjarjet për të cilat ishin të interesuar. Një nga temat e bashkëbisedimit ishte dhe Bashkim Shehu si përkthyes, kontributi i tij në këtë fushë, autotët e preferuar, stili i tij, veçoritë e përkthimit etj. Me këtë rast, BKSH çeli edhe një ekspozitë, ku përmblidhej rrugëtimi i krijimtarisë së Bashkim Shehut, prej botimit të tij të parë deri më sot, e cila e bëri më të larmishëm këtë aktivitet.
Bashkim Shehu lindi më 1955 në Tiranë. Ai është një shkrimtar, i diplomuar në Fakultetin e Historisë dhe Filologjisë, në degën Gjuhë-Letërsi, në Universitetin e Tiranës, 1975-1980. Ai gjithashtu u specializua në Studime Sociologjike, në Institutin e Sociologjisë, Universiteti i Budapestit (1993-1995). Autori numëron mbi 15 botime dhe mbi 40 përkthime.
Gjithashtu, ka marrë pjesë në shumë konferenca për letërsinë, çështjet europiane dhe ballkanike në disa institucione në Barcelonë dhe gjetkë. Që nga viti 1997 ai jeton në Barcelonë, Spanjë. Veprat e tij janë përkthyer në disa gjuhë të huaja. Bashkim Shehu është i vlerësur me disa çmime kombëtare e ndërkombëtare. Në përfundim të takimit pjesëmarrësit morën libra të autorit me autografin e tij.
Shpërndaje