Angazhohemi të jemi të parët në dhurimin e gjakut

Në emër të Shoqatës për Autonominë Vendore, pjesë e së cilës janë 45 bashki, kryetari i Bashkisë së Tiranës, Erion Veliaj shprehu angazhimin për një kalendar të plotë me aktivitete ndërgjegjësuese për rritjen e kontribuesve vullnetarë të gjakut dhe falenderoi Presidentin Ilir Meta për nismën e tij konkrete, që u vjen në ndihmë shumë qytetarëve.

I pranishëm në takimin e parë të “Aleancës për Dhurimin e Gjakut”, kryebashkiaku Veliaj solli disa nga shembujt e suksesshëm të organizimeve vullnetare të Bashkisë së Tiranës në kryeqytet. “Ajo që propozojmë është që secila bashki të sjellë pranë këtij Sekretariati një kalendar praktik, që në shtator kur fillon viti i ri shkollor, kryesisht me fokus universitetet dhe gjimnazet. Në Tiranë kemi një përvojë të mirë të një rrjeti me ndërlidhësit e komunitetit dhe administratorët e pallateve. Pra, nuk shoh asnjë arsye pse të mos shkojmë deri në këtë nivel kapilar. Kur qytetarët e Tiranës mund të dhurojnë 126 mijë pemë, sigurisht që 20 mijë veta dhurojnë 20 mijë qese gjaku”, tha Veliaj, i cili shprehu besimin se qytetarët e Tiranës do të vijojnë me këtë frymë solidariteti. “Jam besimplotë se do të vazhdojmë me këtë frymë dhe do të angazhohemi të jemi të parët”, tha ai.

Duke e cilësuar tepër të nevojshme këtë nismë, për t’u ardhur në ndihmë atyre në nevojë, kreu i bashkisë shprehu mbështetjen dhe angazhimin e 45 bashkive, të cilat janë pjesë e Shoqatës për Autonominë Vendore. “Bashkimi e bën fuqinë dhe pavarësisht se secili, qoftë individualisht, në organizatat respektive apo në ministri e dikastere të tjera, e ka bërë këtë detyrë, sigurisht që autoriteti përbashkues i Presidencës i jep një status krejt të veçantë dhe kalojmë nga një situatë e aksioneve sporadike, në diçka të organizuar nga kreu i shtetit. Ndaj, jo vetëm në konsideratën time, por në konsideratën e çdo qytetari shqiptar, pasja e një presidence aktiviste, do të thotë fokus në gjëra konkrete, përtej rutinës administrative të zyrës dhe institucionit, është një lajm shumë i mirë dhe i shumëpritur”, tha ai.

Presidenti i Republikës, Ilir Meta theksoi rëndësinë që ka ngritja e këtij rrjeti solidariteti në të gjithë vendin dhe apeloi për rritjen e numrit të dhuruesve vullnetarë të gjakut. “Ngritja e një rrjeti të solidaritetit për dhurimin e gjakut në të gjithë Shqipërinë për përfshirjen e shoqatave dhe të kryetarëve të bashkive, përmes organizimit të aktiviteteve të ndryshme publike si koncerte, apo aktivitete sportive duke u fokusuar sidomos në zonat më me prioritet ku dhe kërkesat janë më të mëdha, sidomos sa i takon kategorisë së Talasemikëve si Lushnja, Fieri etj; krijimi i një mjedisi të përshtatshëm për dhuruesit e gjakut, duke e bërë eksperiencën e dhurimit të gjakut një proces të sigurt; sigurimi i dhuruesve që kontribuojnë rrallë duke i kthyer në kontribues të rregullt dhe krijimi i një statusi të veçantë për ta”, nënvizoi Presidenti Meta.

Kryebashkiaku Veliaj shprehu bindjen se objektivi i vendosur për rritjen e numrit të kontribuesve vullnetarë të gjakut në 2 për qind është mëse i arritshëm dhe do të përkthehet në një rezultat të matshëm. “Për mua, si kryetar i Bashkisë së Tiranës me 1 milionë banorë, 2% do të thotë mobilizimi i 20 mijë dhuruesve vullnetarë dhe ne zotohemi që ta përkthejmë këtë në një rezultat të matshëm”, deklaroi Veliaj.