BASHKIA TIRANË SHPALL THIRRJE PUBLIKE PËR SUBJEKTET PRIVATE TË FUSHËS PËR APLIKIM NË PROJEKTIN “SHKOLLA VERORE”

Bashkia Tiranë në zbatim të V.K.B nr.80, datë 02.07.2021, “Për miratimin e projektit “Shkolla verore”, hap thirrjen për dhënien në përdorim sipas legjislacionit në fuqi të mjediseve/infrastrukturës së brendshme të shkollave 9-vjeçare dhe të mesme publike, si dhe ambjenteve sportive të jashtme me përjashtim të atyre që janë objekt i vendimit nr. 7, datë 31. 01. 2018 të Këshillit Bashkiak “Për miratimin e përdorimit të palestrave të shkollave arsimit 9 vjeçar dhe të mesëm për zhvillimin e aktiviteteve sportive pas programit mësimor dhe në ditët e pushimit”, për realizimin e aktiviteteve sipas Udhëzuesit Operacional të projektit “Shkolla verore”, miratuar dhe pjesë përbërëse e V.K.B -së së sipërcituar.

Bashkia Tiranë fton të gjitha subjektet private të fushës për t`u bërë pjesë e këtij projekti. Subjektet private duhet të aplikojnë pranë Bashkisë së Tiranës sipas Formularit të Aplikimit (Aneksi 1), bashkëlidhur, si dhe duhet të jenë subjekte të regjistruara sipas parashikimeve të legjislacionit që normon kuadrin ligjor në këtë fushë dhe të paraqesin të gjithë dokumentacionin e nevojshëm që e vërteton ketë (Vendim gjykate, Statut, Akt Themelimi, NIUS, Vërtetim nga tatimet për situacionin (vërtetim nga Drejtoria Rajonale Tatimore që subjekti nuk ka detyrime).

Projekti "Shkolla verore" konsiston në dhënien në përdorim  të mjediseve/infrastrukturës së brendshme të shkollave 9-vjeçare dhe të mesme publike, si dhe ambjenteve sportive të jashtme me përjashtim të atyre që janë objekt i vendimit nr. 7, datë 31. 01. 2018 të Këshillit Bashkiak, për të zhvilluar aktivitete edukative, argëtuese dhe integruese në kuadër të zbatimit të projektit "Shkolla verore", nga ana e subjekteve private që objekt të veprimtarisë së tyre kanë organizimin e këtyre projekteve dhe që plotësojnë kriteret ligjore.

Një aspekt shumë i rëndësishëm dhe kusht thelbësor i partneritetit që do ngrihet midis Bashkisë Tiranë dhe subjekteve privatë, të cilët do të shprehin interes për të marrë në përdorim mjediset/infrastrukturën e brendshme të shkollave 9-vjeçare dhe të mesme publike për organizimin shkollave verore, do të jetë respektimi dhe zbatimi përgjegjësisë sociale ana e tyre, për të përfshirë në aktivitetet e shkollave të tyre verore pa pagesë nxënësit që cilët vijnë nga grupe sociale vulnerabël, nëse plotësojnë njërin nga kriteret si më poshtë:

    a) Nxënës që vijnë nga familje të cilat përfitojnë nga skema e ndihmës ekonomike
    d) Nxënës që vijnë nga familje me një prind
    f) Nxënës që kanë statusin e jetimit

Të interesuarit do të mund të aplikojnë brenda 1 (një) jave nga shpallja e thirrjes për aplikime, ndërkohë që brenda javës së 2 (dytë), pas mbylljes së aplikimeve, Komisioni i Vlerësimit të Aplikimeve realizon përzgjedhjen dhe shpalljen e fituesit për secilën shkollë.

Aplikimet me dokumentacionin shoqërues do të dorëzohen pranë Sektorit të Informimit dhe Shërbimeve për Qytetarin, çdo ditë, sipas afatit të përcaktuar si më poshtë, dhe më pas do t`i delegohen Drejtorisë se Përgjithshme të Shërbimeve Sociale.

Dokumentacioni i aplikimit për thirrjen publike të Bashkisë së Tiranës do të jetë i disponueshëm nga data 21.03.2022.
Një version elektronik i paketës së aplikimit mund të gjendet këtu.

Thirrja për dorëzimin e Formularëve të Aplikimit për “Projektin shkolla verore”, hapet ditën e hënë, datë 21.03.2022, ora 08:00 dhe mbyllet ditën e hënë, datë 28.03.2022, ora 16:00.