Shpërndaje
Text size
Në vitin 2025, Bashkia e Tiranës do të përfundojë disa investime të mëdha të nisura përgjatë këtij mandati. Kryebashkiaku Erion Veliaj, në një dëgjesë për buxhetin e vitit të ardhshëm, deklaroi se brenda pranverës do të përfundojë terminali verior, ndërkohë që me mbarimin e punimeve në Unazën e Madhe, Bashkia e Tiranës do të nisë nyjet lidhëse me lagjet që preken nga ky investim. Ai theksoi se në këtë mandat të tretë, Bashkia e Tiranës do të bëjë investimet më të mëdha në ujësjellës.“Terminali Verior mbaron në pranverë, është investimi më i shpejtë për këtë vit. Pastaj vazhdojmë me historinë e stacioneve të reja të autobusit dhe Unazën e Madhe, e cila mbaron këtë fundvit, ku bashkia do të bëjë nyjet lidhëse me lagjet. Me këtë buxhet do të kemi investimet më të mëdha në Ujësjellës. Mezi pres të inaugurojmë impiantin e Bovillës, pas gjithë problematikat që kemi pasur, lidhur me sistemin e filtrimit, i cili për herë të parë e ka dyfishuar ujin që vjen i filtruar në Tiranë”, deklaroi Veliaj.
Duke u ndalur te transporti urban, ai nënvizoi se ka nisur modifikimi i të gjitha stacioneve të autobusëve, ku do të vendosen tabelat elektronike me oraret e sakta të lëvizjes. Veliaj tha se do të synohet se tre linjat kryesore që operojnë në kryeqytet do të kenë një flotë totalisht elektrike. “Ka filluar modifikimi i të gjithë stacioneve të autobusëve, ku do të vendosen tabelat elektronike. Qytetari ta dijë në kohë reale kur i vjen autobusi, do të ketë edhe hartën që turistët ta dinë ku të shpie linja e caktuar. Do të vijojmë përmirësimin e flotës. Në qoftë se deri tani kemi vetëm autobusë hibridë, pra miks, me karburant dhe bateri, duam të shkojmë, të paktën për 3 linjat kryesore si “Tirana e Re”, “Kinostudio” dhe “Unaza”, te 100% flotë elektrike dhe stacione totalisht të modernizuara”, deklaroi Veliaj.
Në fund, kryebashkiaku theksoi se do të ndërtohen 5 depo të reja në Ujësjellësin e Tiranës në 5 pika kodrinore të kryeqytetit, për të synuar që do të shkohet nga 18 orë në 24 orë furnizim me ujë në Tiranë. “Për të gjithë ata që e kishin në dorë dhe nuk bënë dhe tani e kanë shumë kollaj të komentojnë ata që punojnë, kam një pyetje: Si ka mundësi që janë ndërtuar objekte pa leje brenda në impiant? Ata legalizonin brenda në impiant, ne duam ta vazhdojmë këtë energji të jashtëzakonshme për Ujësjellësin e Tiranës, duke bërë 5 depo të reja, duke qenë se Tirana tani nuk dallon më ku mbaron Kombinati dhe ku fillon Vaqarri, nuk dallon më ku mbaron Kinostudio e ku fillon Fresku dhe Thesari. Nuk dallon më ku mbaron lagjja “Rilindja”, “Astiri”, dhe ku fillon Kashari sepse po dendësohet. Kjo do të thotë që na nevojiten 5 depo të reja në 5 pika kodrinore për të shtuar presionin në Tiranë”, deklaroi kryetari i Bashkisë.
Shpërndaje