Çelet panairi “Work & Study”, ofrohen 3500 vende të lira pune

Nëse je në kërkim të një pune, panairi “Work & Study” i cili u çel sot në mjediset e Muzeut Kombëtar, ofron mbi 3500 vende të lira nga kompani dhe biznese të ndryshme. Panairi organizohet nga Dhoma e Tregtisë dhe Industrisë, Bashkia e Tiranës dhe Ministria e Arsimit, Sportit dhe Rinisë, me pjesëmarrjen e 65 kompanive, universiteteve dhe institucioneve.

Në hapjen e panairit, kreu i Bashkisë së Tiranës, Erion Veliaj, ftoi të gjithë të rinjtë dhe të rejat që të vizitojnë stendat e këtij panairi për të filluar një rrugëtim të ri në karrierën e tyre. Bashkia e Tiranës ofron mundësinë për 90 aplikantë që të bëhen pjesë e administratës së saj në sektorë të ndryshëm. “Përveç vendeve të punës, kemi disa oferta shumë të mira edhe për kryerjen e praktikës. Bashkia e Tiranës ka 90 pozicione pune, duke përfshirë disa drejtori dhe agjenci bashkiake, ndërkaq për herë të parë kemi futur konceptin e praktikave me pagesë. Te Bashkia e Tiranës nuk duam të pasuroni vetëm CV, duam që të fusni edhe disa para në xhep. Është një mënyrë se si siguroni disa të ardhura, por edhe shënoni në CV tuaj punën e parë mbi të cilën mund të ndërtoni karrierën për punë të tjera”, u shpreh ai.

Duke u ndalur në paktin për Universitetin, Veliaj garantoi se të gjitha institucionet po punojnë për plotësimin e pikave, duke filluar nga rikonstruksioni i godinave të konvikteve. “Jam shumë i lumtur që për Paktin e Universiteteve është përfshirë edhe qeveria me portalin Punë të Mbarë, ku listohen jo vetëm punët e bashkisë, por të të gjitha institucioneve kryesore. U them gjithmonë studentëve, shqetësohuni të jeni më të mirët, se për të mirin ka gjithmonë punë. Secili prej nesh do të ishte i nderuar të kishte në stafin e tij më të mirin e një fakulteti të caktuar dhe fakti që 1 mijë më të mirët janë në proces rekrutimi, ose një pjesë tashmë kanë filluar punë nga portali i qeverisë Punë të mbarë, është dëshmi e kësaj”, tha Veliaj.

Ai u bëri thirrje bizneseve që t’i bashkohen nismës për kartën e studentit duke ofruar çmime të reduktuara për studentët. “Në maj shpërndajmë kartën e studentit, por teksa këto po zgjidhen, studentët duhet të shqetësohen vetëm për një gjë: notat, notat, notat! Dua t’i ftoj të gjitha kompanitë këtu që të na bashkohen me ofrimin e shërbimeve në kartën e studentit. Jam i bindur se bankat mund të na ofrojnë një ulje për llogari të studentëve, për shpenzimet bazë. Po ashtu, edhe kompanitë celulare që janë këtu mund të na bëjnë një ofertë pak më të mirë”, deklaroi Veliaj. 

Ndërkohë, më tej ai shtoi se krahas ceremonive përkujtimore për të rënët, 5 Maji do të jetë edhe “Ditë pa makina”. Ai u bëri thirrje qytetarëve që atë ditë të lënë automjetet e tyre dhe të shijojnë aktivitetet e shumta të organizuara nga Bashkia e Tiranës. “Kjo javë do të mbyllet me datën 5 Maj, me “Ditën e Dëshmorëve”. Bashkia e Tiranës po përgatitet jo vetëm me ceremonitë në të gjithë Varrezat e Dëshmorëve, një moment kujtimi për faktin që Shqipëria ka qenë gjithmonë në anën e duhur të historisë, por do të jetë gjithashtu një ditë pa makina. Data 5 Maj, ashtu si Dita e Verës, do të jetë një ditë e hapur për të gjithë”, kujtoi Veliaj.

Zëvendësministrja e Arsimit, Lorena Haxhiu theksoi se prioriteti i qeverisë shqiptare ka qenë, është dhe do të mbetet, integrimi i të rinjve në tregun e punës. “Është shumë e rëndësishme të theksoj dy nisma të rëndësishme në kuadër të Paktit për Universitetin, të cilat do të bëjnë që të rinjtë shqiptarë të kenë sot më tepër mundësi për të praktikuar dhe për të provuar për sa i takon praktikave mësimore, ashtu edhe praktikave profesionale, duke nga nisur që nga patronazhimi i secilit prej institucioneve të arsimit të lartë publik në Shqipëri, nga ministritë e linjës, bazuar në profilin e njëjtë përkatës, por gjithashtu edhe një histori suksesi që vijon të zgjerohet dhe të përsëritet nga viti 2015, që është Programi Kombëtar i Praktikave të Punës”, deklaroi Haxhiu.

Kreu i Dhomës së Tregtisë dhe Industrisë Tiranë, Nikolin Jaka vlerësoi bashkëpunimin me Bashkinë e Tiranës, ndërsa deklaroi se ky panair synon të hapë rrugën e punësimit për të gjithë, dhe është një mundësi, një pikëtakim për të bërë të mundur komunikimin mes punëkërkuesve  dhe punëdhënësve, posaçërisht në sektorin privat.