Cikli i Leksioneve të Hapura për Trashëgiminë Kulturore të Tiranës

Text size
Aa Aa
         Nisi udhë cikli i leksioneve të hapura mbi Trashëgiminë Kulturore të Tiranës dhe rrethinave të saj, në Akademinë e Studimeve Albanologjike. 
      Bashkia e Tiranës, duke pasur në fokus edukimin e brezit të ri me tema të Trashëgimisë Kulturore të Tiranës, ka organizuar këtë cikël leksionesh të hapura në bashkëpunim me Akademinë e Studimeve Albanologjike. Leksionet do të zhvillohen çdo muaj përgjatë vitit 2022, në ambientet e Akademisë, me praninë e të rinjve të shkollave të mesme të Tiranës. Tematika e këtyre takimeve do të mbulojë një gamë të gjerë kërkimesh, studimesh e dokumentesh nga Prehistoria, Antikiteti, Antikiteti i Vonë, Mesjeta dhe periudha të mëvonëshme, si dhe punime nga fusha e etnografisë. 
      Në datën 31 janar, ora 11:00, lektorët Rudenc Ruka dhe Rovena Kurti, studiues të periudhës së Prehistorisë, nga Instituti i Arkeologjisë, bënë një paraqitje të të dhënave arkeologjike mbi Prehistorinë e rrethit të Tiranës.  Interes  ngjalli përshkrimi i gjurmëve prehistorike të “Shpellës së Zezë”, e njohur ndryshe si Shpella e Pëllumbasit, që mund të vizitohet nga nxënësit gjatë një ekskursioni shkollor.
Po ashtu, një sërë kalash në kodrat përreth Tiranës që mbartin rrënoja të rrethimeve mbrojtëse të periudhave të Bronzit dhe të Hekurit, si kalaja e Tujanit, Dorëzit, Skrepit, etj., u ilustruan para nxënësve.
Nxënësit u njohën gjithashtu me disa aspekte të kulturës materiale nga periudha e Bronzit dhe e Hekurit, e cila ka ardhur në Fondet Arkeologjike të Institutit të Arkeologjisë, kryesisht si gjetje rasti nga banorët e zonës. Pjesëmarrës  si auditor për të filluar këtë cikël leksionesh të hapura, ishin nxënësit e gjimnazit “Qemal Stafa”, të shoqëruar nga mësuesi i tyre i historisë. Pas panoramës mbi Prehistorinë, nxënësit me ëndje vizituan pavionet e Muzeut Arkeologjik ku morën një guidë spjeguese të plotë nga specialistja e këtij muzeu.
Ky takim i parë inauguron bashkëpunimin 1-vjeçar mes Bashkisë së Tiranës dhe Akademisë së Studimeve Albanologjike, me miratimin e Ministrisë së Arsimit dhe Sportit, në kuadrin e vitit të Tiranës si Kryeqytet Europian i Rinisë.