Shpërndaje
“Dita e Verës”, një festë pagane, kremtohet çdo 14 Mars dhe është shndërruar tashmë në një festë mbarë shqiptare që festohet nga veriu në jug të vendit, por sipas riteve dhe traditës së secilës krahinë.
Kjo festë e lashtë dhe e trashëguar brez pas brezi në vendin tonë, simbolizon ardhjen e stinës së pranverës.
Në Tiranë si çdo vit, me rastin e kësaj dite, Bashkia e Tiranës organizoi në sheshet kryesore të qytetit aktivitete të ndryshme, koncerte me këngë e valle popullore, lojëra sportive. Pati shfaqje të Cirkut të Tiranës dhe Teatrit të Kukullave në Parkun Rinia; Orkestra Filarmonike performoi në Pedonalen “Abdi Toptani”, ndërsa Banda Frymore e qytetit përgjatë Bulevardit “Dëshmorët e Kombit”. Në skenën e ngritur në qendër të Bulevardit, te Kryeministria, performuan “Qendra Rinore Ten”, “Ansambli Popullor Tirana”, grupi i rokut “Urban Band” si dhe kënduan këngëtaret Arjola Toska dhe Era Rusi.
U organizuan gjithashtu ndeshje sportive të lojërave me dorë, ndeshje tenisi, si dhe ekspozita me makina Retro e motoçikleta.
Një hapësirë të rëndësishme zinte dhe panairi i produkteve bujqësore dhe artizanale të artizanëve të Tiranës dhe rrethinave të saj.
Në aktivitete merrnin pjesë të rinj e të reja debutues si edhe fëmijë të moshave shkollore. Tirana e veshur me petkun e larmishëm të festës shumëngjyrëshe të pranverës, gëlonte nën tingujt e muzikës dhe zërat e qytetarëve që kishin dalë të festonin me familjarët e tyre. Tingujt e muzikës e shoqëruan festën gjatë gjithë ditës dhe u kurorëzuan në mbrëmje, kur ylli kolumbian i muzikës latine Maluma, i ftuar për këtë ditë festimesh, performoi në Sheshin “Nënë Tereza” i ndjekur nga qindra të rinj e qytetarë tiranas.
Shpërndaje