Dita Ndërkombëtare për Fëmijët në Situatë Rruge

Në Ditën Ndërkombëtare për Fëmijët në Situatë Rruge, kryebashkiaku Erion Veliaj u shpreh i kënaqur që Tirana sot është një qytet shumë herë më solidar me ata që janë në nevojë, por në mënyrë të veçantë me fëmijët në situatë rruge. I pranishëm në aktivitetin e organizuar me mbështetjen e Bashkinë së Tiranës, Ministrisë së Shëndetësisë dhe Mbrojtjes Sociale dhe disa organizatave që veprojnë në këtë fushë, ai theksoi suksesin e arritur me strehimin e shumë familjeve nga komuniteti rom në Shkozë dhe Lanabregas, ku një pjesë e mirë e tyre janë fëmijë.

Veliaj tha se Bashkia e Tiranës i dha zgjidhje, në një kohë të shkurtër, një problemi të mbartur prej më shumë se 28 vitesh. “Mbaj mend 2 vjet e gjysmë më parë kur patëm shumë debate për komunitetet rome te Liqeni, te bregu i Lumit apo në Shkozë. Ja ku jemi sot, kemi rezidenca banesash në Shkozë, në Lanabregas, që do të thotë se kur fokusohemi te puna e jo te histeria, mund të bëjmë histori, mund të zgjidhim kriza që ndoshta kishin 27 apo 28 vite pa zgjidhur. Ky është një moment për t’u thënë të gjithëve bravo ju qoftë, por ama puna më e vështirë dhe më e madhe na pret përpara”, u shpreh ai.

 Por, që t’i jepet një zgjidhje afatgjatë problemit të fëmijëve të rrugës, Veliaj tha se është i domosdoshëm bashkëpunimi i të gjithë aktorëve, atyre shtetërorë dhe shoqërisë në përgjithësi. “Një shprehje anglisht thotë, duhet një fshat i tërë për të rritur një fëmijë. Kjo do të thotë jo vetëm ministria, jo vetëm bashkia, jo vetëm OJF-të, jo vetëm qendrat sociale, por kushdo qytetar që shikon një fëmijë në situatë rruge ka misionin e qytetarit që ta raportojë. Nëse dikush mendon se duke i dhënë 20 lekë në semafor ka kryer detyrën e vet qytetare, në fakt sapo i ka vënë çmim jetës dhe çmimin e trafikimit të atij fëmije. Në disa raste situatat janë ekstreme, ku prindërit e këtyre fëmijëve na duhet t’i procedojmë edhe penalisht”, deklaroi kryebashkiaku Veliaj.

Ai apeloi për më shumë solidaritet nga të gjithë qytetarët të cilët duhet të tregojnë një vëmendje të veçantë ndaj fëmijëve në situatë rruge dhe të gjithë atyre që janë në vështirësi. “Unë e di që Tirana ka shumë probleme, 60 bashkitë e tjera ndoshta akoma më shumë probleme, por dy janë mundësitë: ose kritikojmë dhe tregojmë gishtin tek çdo problem, ose secili prej nesh thotë, çfarë mund të bëj që ta zgjidh. Shumë njerëz në publik po thonë, roli ynë nuk është vetëm të bëjmë megafonin e ankesës, por edhe të marrim përsipër një detyrë, qoftë duke shërbyer një vakt, qoftë duke adoptuar në distancë një fëmijë, qoftë duke ndihmuar një punonjës social apo edhe duke bërë detyrën qytetare për raportimin”, u shpreh Veliaj.

Teksa uroi për 1-vjetorin e krijimin rrjetit të qendrave sociale për fëmijët në situatë rruge, Ministria e Shëndetësisë dhe Mbrojtjes Sociale, Ogerta Manastirliu, shprehu vullnetin për të adresuar çdo rast problematik dhe ofrimin e shërbimeve sociale. “Sot në Ditën Ndërkombëtare të Fëmijëve në Situatë Rruge vëmendja jonë është tek ata fëmijë të cilët nuk mund të gëzojnë fëmijërinë e tyre, ashtu si gjithë të tjerët, për shkak të shfrytëzimit, neglizhimit, dhunës, abuzimit apo trafikimit. Ndaj, ne kemi bashkuar të gjithë forcat së bashku. Ministria e Shëndetësisë dhe Mbrojtjes Sociale, partnerët ndërkombëtarë, organizatat e shoqërisë civile, bashkitë për të adresuar çdo rast të çdo fëmije në situatë rruge dhe për të garantuar mbrojtje dhe shërbime sociale për të gjithë fëmijët”, tha Manastirliu.

 Aktivitetin e përshëndeti edhe ambasadori amerikan në vendin tonë, Donald Lu, i cili deklaroi se në një kohë që Shqipëria afrohet edhe më shumë me Bashkimin Evropian, duhet të tregohet një vëmendje e shtuar edhe për fëmijët në vështirësi. “Shqipëria për shumë vite ka pasur një problem, një problem për të mbështetur fëmijët e saj në rrugë. Por ky është një problem që Shqipëria me mbështetjen e partnerëve duhet të jetë e aftë ta zgjidhë. Nuk keni 11 milionë fëmijë për t’u kujdesur, keni vetëm disa qindra. Vendi vazhdon t’i afrohet anëtarësimit në BE, shpresojmë që Shqipëria të mund të kujtojë fëmijët e saj. Ata kanë të drejtë të shkojnë në shkollë, ata kanë të drejtë të mos jenë të uritur, ata kanë të drejtë të mbrohen nga abuzimi. Siç ma mësuan fëmijët e mi, jam gati të mbledh monedhat e mia për të mbështetur UNICEF-in dhe OJQ-të që mbështesin fëmijët e Shqipërisë. Shpresoj se do ta bëjmë bashkë këtë”, deklaroi Lu.

 Përfaqësuesja e Delegacionit Europian në Shqipëri, Monika Bylate, vlerësoi nevojën për përmirësuar mbrojtjen e fëmijëve dhe krijimin e të gjitha kushteve të nevojshme për edukimin dhe shëndetin e tyre. Bylate theksoi se fëmijët nuk janë vetëm e ardhmja e Shqipërisë, por edhe e ardhmja e Europës. Zv/Kryetar i Prezencës së OSBE në Shqipëri, Robert ëilton vlerësoi angazhimin e kryetarit të Bashkisë së Tiranës Erion Veliaj dhe të ministres së MSHMS, Ogerta Manastirliu, ndërsa apeloi për një rol më të madh të shoqërisë në mbështetjen e fëmijëve.