Shpërndaje
Text size
Familja e Astrit Vrapit dhe e Islam Tafës në Baldushk do të mund ta kalojnë natën e ndërrimit të viteve në shtëpitë e tyre të reja. Ata morën sot nga kryetarii Bashkisë së Tiranës, Erion Veliaj, kontratat e pronësisë së banesave të tyre, të cilat janë shumë herë më të mira se ato që kishin.Veliaj siguroi se është vetëm çështje kohe që familjet e prekura nga tërmeti tragjik i një viti më parë të marrin çelësat e shtëpive të reja. “Ka qenë një vit i vështirë, por të paktën Viti i Ri na zuri me një shtëpi të re. Të gjitha shtëpitë do të bëhen si shtëpia jote, është vetëm çështje kohe. Do vazhdojmë çdo ditë të japim shtëpi të reja. Kush merr shtëpinë, merr edhe kontratën e pronësisë në dorë. Nesër e ke një kolateral që mund ta vësh në bankë për të marrë një kredi; pra, kthehet në pasuri. Njeriu punon tërë jetën për shtëpinë, jo të gjithë e kanë shansin t’i kapin vilat me batuta, por duke hequr këtë hall fokusohemi te të tjerët, fokusohemi te puna, që të vazhdojmë jetën”, tha ai.
Kryebashkiaku apeloi për më shumë solidaritet për shtresat në nevojë. Ai u shpreh se Bashkia e Tiranës do të jetë pranë kujtdo që ka nevojë, ku një vëmendje të shtuar do të kenë dhe familjet, të cilat ende nuk janë futur në banesën e tyre.
Ndërkaq, Veliaj komentoi edhe humbjen e jetës së 25-vjeçarit, Klodian Rasha. Ai inkurajoi drejtësinë që t’i shkojë deri në fund zbardhjes së vrasjes së tij dhe shprehet se autori duhet të mbajë përgjegjësi. Veliaj iu bashkua dhimbjes së familjes për humbjen e djalit dhe theksoi se reagimi i qytetarëve për ngjarjen është i kuptueshëm, kurse dëmtimet në qytet janë gjëra të parëndësishme, që rikuperohen.
“Unë jam babai i një djali të vogël dhe e marr me mend si i është thyer zemra babait të Klodit sepse nuk besoj se ka gjë më të rëndë sesa të humbësh fëmijën. Një ditë do kesh vetë fëmijë (i drejtohet banorit të shtëpisë së re) dhe do e kuptosh çfarë dhimbjeje është kur të sëmuret, e jo më ta humbasësh. Ajo familje është zemërthyer dhe ka gjithë të drejtën e botës të jetë e mërzitur, këtë s’e luan topi. Që kanë merak për drejtësi, edhe kjo kuptohet. Imagjino sa gjëra kanë ndodhur në këtë shtet dhe nuk kanë parë drejtësi. Ndaj, ata kanë të gjithë të drejtën e zotit të mërziten, si edhe ata që prishin dhe dëmtojnë qytetin - rraqe janë, nuk është ndonjë hata, do i rikuperojmë prapë. Jeta do të vazhdojë!”, u shpreh Veliaj.
Ai kërkoi të bëhet drejtësi, ndryshe nga çfarë ndodhi në 21 janar.
“Ka edhe një lloj mirëkuptimi kur e shfryn mërzinë, por duhet bërë drejtësi, nuk duhet lënë si 21 Janari, që shteti të vriste dhe pastaj bëheshin heronj. Ai që ka bërë gabimin duhet të mbajë përgjegjësi. Ka të drejtë familja që është zemërthyer, e mirëkuptoj totalisht. Ka të drejtë edhe një pjesë e qytetarëve, se jo të gjithë janë të dhunshëm. Një pjesë e qytetarëve thjesht kanë një revoltë dhe thonë kjo nuk duhet të ndodhë, nuk ka arsye për t’i marrë jetën dikujt. Kurse ajo minoranca që shkatërron, nuk përben problem, do i rregullojmë prapë. Por, në këtë fazë duhet të inkurajohet drejtësia që t’i shkojë deri në fund kësaj pune. Të zbardhë rrethanat dhe të vendoset një standard i ri, që këtu nuk ndodh gjë pa u ndëshkuar. Pastaj, për të pastruar e rregulluar, pemë e drita, punë e madhe, rraqe janë. U prish shtëpia nga tërmeti, e ribëmë prapë më të fortë, shtëpia e vjetër ishte copë-copë. Për t’u ringritur do të ringrihemi, e vetmja çështje është që të ringrihemi më të mirë se ç’ishim kur ramë”, përfundoi Veliaj.
Shpërndaje