Familja Shabanaj në Baldushk do ta festojë Vitin e Ri në shtëpinë e rindërtuar

Familja Shabanaj nga Baldushku la përfundimisht mbrapa një vit të vështirë, pas natës tragjike të 26 nëntorit 2019, dhe iu gëzua sot një banese të re, më të fortë dhe më të mirë se ajo që kishte para tërmetit. Ademi dhe Elvira udhëtuan nga Greqia, ku edhe punojnë, për të marrë sot dokumentet e pronësisë së shtëpisë së rindërtuar nga kryetari i Bashkisë së Tiranës, Erion Veliaj.

Kryebashkiaku tha se qeveria shqiptare u është gjendur pranë të gjitha familjeve të prekura nga tërmeti. “E nisëm ditën me shtëpinë e re të Ademit dhe Elvirës, të cilët kanë ardhur mbrëmë nga Greqia. Më vjen mirë që ia udhëtim ia vlejti. Me gjithë dyshimet që thoshin se shtëpia nuk ka për t’u bërë kurrë sepse edhe në Greqi, si në çdo vend të BE-së, thonë shko sigurohu dhe zgjidhe vetë pasi shteti nuk ka detyrime. Kurse ne zgjodhëm, ishte zgjedhje jo detyrim, ishte zgjedhje e Edi Ramës dhe e Qeverisë, për të bërë çdo shtëpi. Më vjen mirë që Ademi dhe Elvira janë futur në një shtëpi të re, ta gëzoni, paçi vetëm mbarësi e gëzime”, nënvizoi ai.

Veliaj siguroi edhe familjet e tjera se, ashtu si në Baldushk, puna do të vijojë, gjersa çdo familje të marrë çelësin e shtëpisë së re. Ai shtoi se deri në atë moment, familjet do të vijojnë të marrin bonus qiraje. Sipas kryebashkiakut, projekti i rindërtimit është një mundësi për të filluar një jetë të re dhe për të afruar familjet pranë shërbimeve. “Në Baldushk dhe në zona të tjera si Ndroqi, Peza, Zallherri, po aplikojmë parimin e lagjes së qendërzuar. Familjet do t’i mbajnë tokat e tyre, askush nuk humbet ato, as bagëtitë e imta, as produktet bujqësore, askush nuk e humbet investimin. Por, shtëpinë do ta ketë buzë rrugës, afër qendrës shëndetësore, afër shkollës, me infrastrukturë, dhe afër Njësisë Administrative, në mënyrë që qindra fëmijë të shpëtojnë nga varfëria dhe të kenë shansin ta përdorin këtë mundësi që na dha rindërtimi pas tërmetit, si një mundësi për të filluar një jetë të re dhe për t’i dhënë një hov të ri këtyre fëmijëve që meritojnë të kenë sukses dhe të ecin përpara si gjithë fëmijët e Tiranës”, deklaroi Veliaj.

Kreu i bashkisë tha se kjo mazhorancë do të jetë gjithmonë në krah të emigrantëve dhe shprehu vullnetin e saj për të garantuar votën e shqiptarëve që punojnë e jetojnë jashtë vendit. “Sa të jemi në krye të këtij vendi do vazhdojmë të promovojmë të drejtat e emigrantëve. E kemi ofruar një alternativë për votën e emigrantëve, KQZ-ja po e shqyrton. Jemi gati të pranojmë çdo gjë që thotë opozita. Nëse e duan me votim në ambasada, e bëjmë atje. Nëse e duan nëpër njësitë bashkiake, jemi gati ta pranojmë edhe atë. Nëse e duan me postë, e bëjmë me postë. Nëse e duan me celular apo me internet, apo e-albania. Edhe shokëve në emigrim t’u themi që s’i kemi harruar premtimet. Na duhet që pala tjetër të bjerë dakord, si të duan ata. Ne nuk kemi frikë nga votat. Njerëzit votojnë për atë që shohin, kush punon shpërblehet”, theksoi Veliaj.

Ndërkaq, nga Baldushku, Veliaj i bëri thirrje qytetarëve që të konsumojnë produkte lokale si një mënyrë për të ndihmuar ekonominë vendase. Në Njësinë Administrative Baldushk po rindërtohen 50 shtëpi, shumë prej të cilave janë pothuajse gati të presin familjet.