Festivali Ndërkombetar i Kërcimit

Text size
Aa Aa

Festivali Ndërkombëtar i Kërcimit,  nën drejtimin artistik të koreografit franko-shqiptar me famë botërore, Angjelin Preljocaj, është një nga ngjarjet më të rëndësishme kulturore në Shqipëri.
Këtë shtator 2024, në edicionin e tij të tretë, Festivali mblodhi artistë dhe trupa kërcimi nga e gjithë bota. Me një program të larmishëm dhe të pasur, festivali synoi të sjellë në skenat e Tiranës një përvojë artistike të një cilësie të lartë, që përfshin jo vetëm shfaqje, por edhe aktivitete edukative me fokus artin e kërcimit, si masterklase, seminare dhe shfaqje filmash. 

Kjo platformë, jo vetëm që ofron mundësi të jashtëzakonshme për shfaqjen e talenteve të reja dhe të afirmuara, por gjithashtu krijon një urë lidhëse mes kulturave dhe traditave të ndryshme, duke përforcuar dialogun ndërkulturor përmes artit të vallëzimit. Me pjesëmarrjen e 8 trupave të baletit, këtë vjeshtë festivali solli përpara audiencës disa interpretime më eksperimentale të baletit klasik, si “Liqenit të Mjellmave” nga  “Ballet Preljocaj”, por edhe shumë krijime bashkëkohore që iu prezantuan publikut shqiptar për herë të parë.

Çdo performancë pasqyroi diversitetin e zërave artistikë, ndërsa programi i kuruar në tërësi ofroi një hapësirë ku traditat kulturore të ndryshme ndërthuren dhe bashkëjetojnë. Përveç shfaqjeve, Festivali ofroi gjithashtu një sërë aktivitetesh edukative si masterklase dhe seminare, të cilat u drejtuan nga disa prej artistëve më të njohur në skenën ndërkombëtare të koreografisë dhe vallëzimit. Këto aktivitete edukative u fokusuan në zhvillimin profesional të artistëve të rinj dhe në nxitjen e dialogut dhe bashkëpunimit ndërmjet artistëve vendas dhe ndërkombëtarë. Përmes këtyre mundësive, festivali synoi të ndikojë pozitivisht në rritjen dhe zhvillimin e skenës artistike në Shqipëri, duke kontribuar në ngritjen e standardeve dhe në krijimin e një audience të informuar dhe të angazhuar.