Bashkia Tiranë - Festivali Ndërkombëtar i Filmit Për të Drejtat e Njeriut

Text size

Aa Aa

Edicioni i 19-të i Festivalit Ndërkombëtar të Filmit për të Drejtat e Njeriut nisi në datën 16 shtator 2024, në Akademinë e Filmit dhe Multimedias Marubi.

Duke prezantuar temën e sivjetshme të festivalit, “Vepro gjelbër tani dhe për të ardhmen” drejtori ekzekutiv, Kujtim Çashku, ua la skenën miqve dhe partnerëve të festivalit ndërsa përshëndeti personalisht artistët pjesëmarrës.

Kryebashkiaku i Tiranës, i pranishëm në këtë çelje sipari, Erion Veliaj theksoi se :
“Festivali Ndërkombëtar i Filmit për të Drejtat e Njeriut e ka kthyer Kinostudion nga një vend periferik në epiqendër të një debati, të një diskutimi, të një provokimi të mendimit intelektual.
Ndonjëherë filmi na sjell realitete të largëta afër, na sjell atë që ndodh në Ukrainë dhe barbarizmin e agresionit rus. Gjërat që në përditshmërinë tonë janë të padukshme një film i nxjerr në pah dhe na provokon të gjithëve edhe në vendimmarrje. Kënaqësi të jem pjesë e hapjes së edicionit të 19-të këtij Festivali. Kinemaja “Marubi” sot përfaqëson më shumë se një hapësirë filmash, është një vend ku liria dhe kreativiteti lulëzojnë. Ky festival është një dhuratë për qytetin tonë dhe një dëshmi e Tiranës policentrike, një qytet që rritet e zhvillohet në çdo lagje”.

Ambasadori i BE në Tiranë, Silvio Gonzato u shpreh se “Aderimi i Shqipërisë në Bashkimin Evropian nënkupton miratimin e parimeve të të drejtave të njeriut, demokracisë dhe shtetit të së drejtës. Këto parime janë kryesore për partneritetin tonë. Tema e këtij viti, “Vepro gjelbër për të tashmen dhe për të ardhmen”, është një kujtesë e fuqishme e përgjegjësisë sonë të përbashkët për të mbrojtur planetin. Dhe arsyeja për këtë është e thjeshtë: thjesht nuk ka planet B".
Mbrëmja e parë filloi me shfaqjen e filmit suedez “Blix Not Bombs” nga Greta Stocklassa që sjell në vëmendje rolin e diplomatit Hans Blix në raportet mbi Irakun në vitet 2000 dhe çështjen e armëve të shkatërrimit në masë.

41 filma do të shfaqen në Tiranë, në COD, te Marubi, në kinemanë “Maks Velo”, te Akademia e Sigurisë, te shkolla e Magjistraturës, te Autoriteti i dosjeve etj, duke sjellë në vëmendje përmes këtij festivali perceptime dhe reflektime, mbi njeriun, ligjin dhe shtetet.