Hapen aplikimet për Këshillin Vendor Rinor

Rreth Projektit

Këshilli Vendor i Rinisë është parashikuar saktësisht në nenin 10 të ligjit për rininë, si një organ këshillimor që funksionon pranë kryetarit të bashkisë. Ai është konceptuar në mënyrë të ngjashme me Këshillin Kombëtar të Rinisë, por krijimi dhe funksionimi do të përshtaten në kontekstin vendor. Në këtë kuadër, edhe kriteret, procedurat e përzgjedhjes së anëtarëve dhe mënyra e funksionimit të Këshillit Vendor të Rinisëparashikohen të jenë të njëjta me ato të Këshillit Kombëtar të Rinisë, por të përshtatura në rang vendor dhe mundësive reale të secilës bashki.

Me krijimin dhe përfshirjen e Këshilli Vendor të Rinisë, bashkia tregon vullnetin dhe gatishmërinë për të marrë pjesë në krijimin e politikave rinore. Funksioni kryesor i një Këshilli Vendor Rinor është të veprojë si organ i pavarur këshillues lidhur me çështjet rinore për kryetarin e bashkisë dhe agjencitë e qeverisjes vendore. Ai do të koordinojë dhe bashkëpunojë me qeverisjen vendore për të përfshirë të rinjtë në procesin e vendimmarrjes, hartimin e politikave dhe planeve vendore për të rinjtë.

Qëllimi i një Këshilli Vendor Rinor është të promovojë dialogun midis brezave, të përmirësojë angazhimin e të rinjve dhe t’i fuqizojë ata për t’u përfshirë aktivisht në proceset e vendimmarrjes politike vendore ku kërkohet zëri i të rinjve.
Këshilli Vendor Rinor do t’i ndihmojnë të rinjtë të ndërtojnë një të ardhme më të mirë, të avancojnë qëndrueshmërinë e komuniteteve të tyre përmes promovimit aktiv të procesit demokratik dhe qeverisjes së mirë. Pjesëmarrja e organizatave rinore dhe të rinjve në procesin e vendimmarrjes nëpërmjet Këshillit Vendor Rinor është premisa për të adresuar çështje të rëndësishme vendore që shqetësojnë të rinjtë në një komunitet, për të përmirësuar jetën e të rinjve dhe për të vënë para përgjegjësisë qeverisjen vendore.

Këshilli Vendor Rinor ndjek politikat rinore të, miratuara nga Ministri i Shtetit për Rininë dhe Fëmijët, me qëllim që të rinjve t’u ofrohen mundësi dhe përvoja të barabarta që të zhvillojnë njohuri, aftësi dhe kompetenca për të kontribuar plotësisht në të gjitha aspektet e shoqërisë. Të rinjve i garantohet një platformë e strukturuar komunikimi me autoritetet lokale ku mund t’ia ofrojnë idetë e tyre novatore me propozime kreative dhe ta inkurajojnë bashkinë që t’i zbatojë ato. Ata gjithashtu mund të konsultohen me njëri-tjetrin, të thonë fjalën e tyre, të ndërtojnë pikëpamje të përbashkëta dhe mirëartikulojnë problemin përpara bashkisë. Këshilli Vendor i Rinisë, si një mjet efektiv për pjesëmarrje, të rinjve u ofron mundësi të jenë iniciatorë dhe pjesëmarrës në proceset e hartimit të politikave për të rinjtë dhe të kenë një kontribut të drejtpërdrejtë në përmirësimin e jetës së tyre në mjedisin ku ata jetojnë.

Këshilli Vendor i Rinisë këshillon njësitë e vetëqeverisjes vendore për politikat dhe planet vendore për rininë si dhe koordinon takimet në nivel rajonal.
Këshilli Vendor i Rinisë pasi vlerësojnë situatën e të rinjve në nivel vendor informojnë Këshillin Kombëtar të Rinisë, duke i parashtruar gjithashtu edhe idetë e rekomandimet e tij. Të dy organet këshillimore për rininë (KKR dhe KVR) duhet të bashkëpunojnë mes tyre për planifikimin e aktiviteteve, shkëmbimin e informacioneve apo propozimin e politikave rinore.

Një nga parimet kryesore ku mbështetet Ligji i Rinisë është parimi i garantimit të pjesëmarrjes së të rinjve në proceset politikëbërëse dhe vendimmarrëse në fushat që janë me shumë interes për të rinjtë. Përmes pjesëmarrjes aktive, të rinjtë kanë fuqinë të luajnë një rol të rëndësishëm në zhvillimin e tyre, si dhe në komunitetet e tyre. Pjesëmarrja u ndihmon të rinjve të mësojnë aftësi jetike jetësore, të zhvillojnë njohuri për të drejtat e njeriut dhe qytetarinë, dhe të promovojnë veprime pozitive qytetare. Për të marrë pjesë në mënyrë efektive, të rinjtë duhet të pajisen me mjetet e duhura, të tilla si informacioni, edukimi dhe qasja në të drejtat e tyre civile.

Njoftimi Publik

Bazuar në vendimin  me nr. 1467, datë 12.01.2023 për ngritjen e Këshillit Vendor të Rinisë (KVR),përcaktimin e kritereve ,procedurave të zgjedhjes së anëtarëve të këshillit vendor të rinisë,si dhe mënyrës së organizimit e funksionimit të tij,referuar të gjithë individëve ose organizatave te interesuara njoftohen të paraqesin dokumentacionin e nevojshëm pranë Sektorit të informimit dhe Shërbimit për Qytetarin- Bashkia Tiranë nga data 08.02.2023- deri më 09.03.2023

Dokumentacioni q duhet të paraqesin palët e interesuara janë:

-Kandidatët  për këshillin vendor rinor, përfaqësues të organizatave ose komuniteteve rinore mund të aplikojnë me dokumentat e mëposhtme:

a.Kërkesë me shkrim ku të shprehë interesin për aplikim

b.Përvoja e organizatës

c.Fotokopje të dokumenteve që mbështesin përvojën e organizatës

d.Vërtetim të gjendjes gjyqësore

e.Vetëdeklarim lidhur me shmangien e konfliktit të interesave

f.Referenca nga të paktën 2 bashkëpunëtorë të mëparshëm

g.Jetëshkrim (CV)


- Kandidatët e këshillit vendor rinor, të rinj të Bashkisë Tiranë , gjimnazistë apo studentë, mund të aplikojnë me dokumentat e mëposhtme:

a.Kërkesë me shkrim

b. Jetëshkrim (CV)

c.Fotokopje të dokumentave që vërtetojnë jetëshkrimin

d.Vërtetimin e gjendjes gjyqësore ose vetëdeklarimin e saj

e.Letër interesi/motivimi

f.Vetëdeklarimin e konfliktit të interesit

Dorëzimi i dokumentacionit bëhët pranë Sektorit të Informimit dhe Shërbimit të Qytetarit cdo ditë brenda orarit zyrtar nga data 08.02.2023- deri më 09.03.2023 dhe në emailin zyrtar të Drejtorisë së Rinisë : [email protected]