Hapet thirrja e dytë për projektin “Mbështetje financiare (Grant) për biznese të reja “të gjelbërta” të cilat bazohen në një model eko-miqësor, ose biznese ekzistuese të cilat tentojnë të shndërrohen në biznese "të gjelbërta" duke futur elementë go-green në to”.

Bashkia e Tiranës në kuadër të projektit “Mbështetje financiare (Grant) për biznese të reja “të gjelbërta” të cilat bazohen në një model eko-miqësor, ose biznese ekzistuese të cilat tentojnë të shndërrohen në biznese "të gjelbërta" duke futur elementë go-green në to”,  shpall thirrjen e dytë për aplikim.

Të gjithë  individët apo kompanitë e interesuar, ftohen të marrin pjesë në këtë projekt, i cili ka si qëllim:

Stimulimin dhe motivimin e sipërmarrësve për të filluar biznese të reja që janë miqësore me mjedisin, të dizenjuara për të rritur qëndrueshmërinë mjedisore apo për të zhvilluar biznese që janë të vetëdijshëm për ndikimin e tyre në mjedis dhe për të ndërmarrë hapa jo vetëm për të zbutur dëmin që shkakton metoda dhe produktet e tyre të prodhimit, por për të punuar në mënyrë aktive drejt një planeti më të gjelbër.

Projekti synon:
•    Të edukojë bizneset për qëndrueshmërinë në mjedisin e tyre rajonal dhe global në ruajtjen dhe kursimin e burimeve të matshme;
•    Të mbështesi biznese në përpjekjet e tyre për të adoptuar mënyra të jetesës dhe praktika të biznesit më miqësore ndaj mjedisit;
•    Të ndërtojnë bashkësi të njerëzve që ndërmarrin veprime ndaj konsumit më të zgjuar, më miqësor ndaj mjedisit;
•    Të përmirësojnë cilësinë e jetës përmes konsumit të mirë dhe ruajtjes së zakoneve, si dhe përfshirjes së shtuar në komunitetin e tyre.

Granti do të mbështesë biznese të reja apo ekzistuese të gjelbërta, për një afat kohor jo më shumë se sa një vit dhe në shumë deri në 500.000 (pesëqind mijë) lekë/ biznes. Kjo shumë është 80% e vlerës së investimit që do të kryejë biznesi. Aplikanti duhet të ofrojë kontribut financiar të barabartë me të paktën 20 % të grantit të financuar të kërkuar.

Propozimet që do të dorëzohen duhet të përfshijnë dokumentat e mëposhtme:

1. Formularin e Aplikimit për Grantin e Gjelbërt;

2. Planin e Biznesit dhe të Financimit sipas modelit të kërkuar (certifikime/ patenta, dokumenta të tjerë suportues të cilat do të vërtetojnë për bizneset ekzistente dhe start up elementin eko miqësor);

3. Formularin e vetëdeklarimit;

4. Kopjen e kartës së identitetit;

5. Kopjen e ekstraktit të biznesit nga regjistri tregtar të lëshuar nga QKB për bizneset ekzistuese   (nga e-albania);

6. Të gjithë aplikantët që synojnë të hapin një biznes të ri, kanë afat 15 ditë pas aprovimit të Grantit nga Komisioni i Aprovimit të Grantit dhe firmosjes së Kontratës për regjistrimin e biznesit të tyre pranë zyrave të QKB;

7. Vërtetim origjinal për llogari bankare në lekë për bizneset ekzistuese. Bizneset e reja do të sjellin llogarinë bankare pasi të jenë shpallur fitues dhe të jenë regjistruar në QKB;

8. Certifikatë personale e shkarkuar nga e-Albania;

Të gjithë aplikantët duhet t’i qëndrojnë në mënyrë rigoroze formatit të aplikimit dhe formateve të bashkëngjitura në këtë udhëzim. 

Gjithashtu të gjithë aplikantët duhet të kenë në konsideratë se shpenzimet e pranueshme që mund të mbulohen nga paratë e grantit duhet të përdoren për zbatimin e planit të biznesit dhe mund të përfshijnë:

1.    blerjen e materialeve për mobilim ose rregullim të mjediseve/godinave për biznesin;
2.   blerjen e makinerive, mjeteve dhe pajisjeve, si edhe software dhe asete të tjera jo të prekshme të cilat do të shërbejnë për të diversifikuar prodhimin me produkte të reja të gjelbërta shtesë ose një ndryshim rrënjësor në proçesin e përgjithshëm të prodhimit të këtyre produkteve ; 
3.   shpenzime për asete të tjera të paprekshme (licenca, markim dhe patentim produktesh);
4.   krijimi i një faqeje interneti dhe publikimi ose reklamimi i aktiviteteve vetëm për 6 (gjashtë) muajt e parë të fillimit dhe nuk mund të tejkalojë më shumë se 10% të grantit total (si për njësitë e reja ekonomike edhe për ato ekzistuese); 
5.   pagat dhe sigurimet do të mbulohen vetëm për të punësuarit që lidhen drejpërdrejt me procesin e prodhimit të produkteve të gjelbërta, deri në 3 muaj pas fillimit të biznesit, bazuar në rrogën minimale në Shqipëri (pjesa tjetër e rrogës duhet të mbulohet nga vetë biznesi).

Thirrja për aplikim, fillon nga data 01 Shkurt 2022 dhe do të mbetet e hapur për dorëzimin e dokumentacionit deri në datën 31 Mars 2022.

Formularët e plotësuar të aplikimit së bashku me dokumentacionin përkatës, duhet të dorëzohen personalisht në zyrat e Sektorit të Informimit dhe Shërbimit për Qytetarët pranë Bashkisë së Tiranës.

Përveç aplikimit në sportelin e Bashkisë së Tiranës (SIQ), aplikuesi për grantin duhet të paraqesë elektronikisht Plan Biznesin dhe Planin e Financimit, në adresën e kontaktit: [email protected]

Çdo aplikim i marrë pas datës përmbyllëse të shpallur do të konsiderohet i pavlefshëm. 

Granti nuk mund të jepet më shumë se një herë për të njëjtën sipërmarrje për këtë projekt, si dhe prioritet do të kenë aplikantët që nuk kanë përfituar grante nga skemat e tjera financiare të ofruara nga Bashkia Tiranë për të njëjtin/tjetër biznes, të paktën gjatë 2 viteve të fundit.

Për shkarkimin e dokumentacionit të nevojshëm, ju lutem klikoni si më poshtë: