Inaugurohet salla e re e koncerteve “Tonin Harapi” në Liceun Artistik

Artistët e rinj të Liceut Artistik kanë nga sot një sallë të rinovuar koncertesh, ku mund të ushtrohen e përgatitur për skenat e mëdha profesioniste në të ardhmen. Një vit nga rikonstruksioni i plotë që iu bë Liceut Artistik nga Bashkia e Tiranës, ajo ka mbajtur një tjetër premtim dhënë nxënësve liceistë, për ndërtimin e një salle të mrekullueshme koncertesh, ku ata të performojnë.

Kryeministri Edi Rama dhe kryetari i Bashkisë së Tiranës, Erion Veliaj përuruan sallën e re të koncerteve, që mban emrin e kompozitorit të njohur shqiptar “Tonin Harapi”. Në fjalën e tij, kryeministri Rama vlerësoi investimin e bërë si një mundësi shumë e mirë për zhvillimin e talenteve të liceut, ndërsa përgëzoi kryebashkiakun Veliaj për punën cilësore për ndërtimin e sallës së re të koncerteve.

Ai solli në vëmendje gjendjen e mjeruar që ka pasur kjo shkollë deri pak muaj më parë. “Më vjen shumë mirë që sot vijmë për çelur këtë sallë sepse më kujtohet shumë mirë kur kemi qenë këtu për rindërtimin e godinës ekzistuese. Faktikisht, atë ditë u bë një koncert shumë i bukur, jashtë në oborr, mirëpo sallë nuk kishte. Ndihmuam edhe për ardhjen e pianove të reja, pas atyre pianove heroike që i rezistuan shumë e shumë viteve dhe kaluan shumë breza, dhe sot u bë e mundur të jemi këtu. Më duket se është bërë një punë shumë e mirë dhe sigurisht që u takon atyre që do ta kenë nën kujdes ta mirëmbajnë dhe t’ua lënë në kushte të mira edhe atyre që vijnë më pas”, tha Rama. 

Kryebashkiaku Veliaj falenderoi të gjithë ata që kanë bërë të mundur ndërtimin e sallës, duke theksuar se ky ishte një tjetër premtim i mbajtur. “Është një punë e bërë me shumë dashuri, që do të vazhdojmë ta mbështesim. Jam shumë i emocionuar sot! Kur ishim këtu me Edin për rikonstruktimin e liceut dhe pamë se si kishte degraduar salla e koncerteve, as nuk e besoja këtë ndryshim. Kur morëm kërkesën, thamë si do e fusim një sallë cilësore koncertesh me lugë këpucësh në atë cep që ishte atëherë pjesa e oborrit të Liceut. E ja ku ia dolëm! Përtej politikës, Teatri, Teatri i Kukullave, hapësira që ne i mbajmë me kthetra prej nostalgjisë, po kuptojmë se nuk duhet të jetojmë më për 100 vitet që ikën, por për 100 vitet që vijnë. E njëjta gjë me palestrat që u shndërruan pastaj në Parkun Olimpik që kemi sot”, tha Veliaj.

Ai u shpreh se transformimi që i është bërë Liceut Artistik “Jordan Misja” në vetëm dy vitet e fundit, është vetëm një nga shumë investimet që ka bërë Bashkia e Tiranës në shërbim të artit, kulturës dhe arsimit. Veliaj u shpreh se në rezen e vetëm 1 kilometri janë bërë një sërë investimesh shumë të rëndësishme publike.

“Më pak se një kilometër nga këtu është Shkolla e Baletit, një tjetër karakatinë e cila kur vajtëm për herë të parë për të filluar punimet, binte shi dhe praktikisht çfarë binte jashtë, hynte brenda. Sot kemi një Shkollë Baleti, ndoshta më cilësorja në rajon. Për ne ishte shumë e rëndësishme që të fillonim kryesisht me shkollat kombëtare elitare, që janë përgjegjëse për produktet më të mira shqiptare. Sapo jemi duke transformuar këndin e lojërave te “7 xhuxhat”, një kënd publik, të cilin ia morëm privatit. Sot po mbaron një parking nëntokësor, që do t’i shërbejë mësuesve të Liceut, shkollës “Kosova”, shkollës së Baletit, Drejtorisë së Tatimeve, dhe zgjidh një nyje të jashtëzakonshme. Pra, jo vetëm parking nëntokë, por edhe këndi i lojërave sipër. Këtu përballë kemi shkollën “Kosova”, edhe ajo e rindërtuar”, tha kryetari i bashkisë.

Gjithashtu, ai solli në vëmendje se po në rrezen e 1 km janë sot duke u zhvilluar dy projekte të mëdha, si ai për transformimin e Piramidës dhe ndërtimi i stadiumit kombëtar. “Një nga gjuhët që po kërkojnë të gjithë sot, përveç anglishtes, gjermanishtes dhe frëngjishtes, është kompjuteri. Aftësia për të koduar dhe për të folur gjuhën ndërkombëtare të kodimit. Kjo është arsyeja pse projekti ynë tjetër pas Liceut, do të jetë Piramida. Nëse vazhdojmë pak më tej, jemi duke mbaruar stadiumin “Arena Kombëtare”. Aty ka mbaruar parkingu nëntokësor i bashkisë, po mbaron dhe po vishet edhe stadiumi. Një tjetër hapësirë unike, bashkë me një hapësirë, një kopësht dhe një kënd lodrash që është bërë pas stadiumit, na rrethon në një rreze më pak se 1 km”, shtoi Veliaj.

Këtyre investimeve theksoi kryebashkiaku i shtohet edhe puna intensive që po bëhet në Qytetin Studenti. Veliaj tha se puna e bërë në këto 4 vite në Tiranë është një dëshmi e qartë se pavarësisht çdo debati, në fund puna fiton mbi zhurmën. “Kur mbaron e gjithë zhurma, siç po ndodh e gjithë kjo zhurmë në Shqipëri, historia s’ka vend për të gjithë, aq faqe ka; por, ka vend për Tonin Harapin, ka vend për atë që jep mirësi, për atë që është pozitiv, për atë që ka energji të mirë. Unë besoj se sot është një ditë gëzimi, por sigurisht edhe një ditë reflektimi dhe unë besoj se betejën mes zhurmës dhe muzikës do ta fitojë muzika. Unë s’dua të bëj politikë, por një nga arsyet pse më dhemb kur ndodh dhuna në Tiranë është se çdo pemë ose çdo pllakë që thyhet është e taksave të këtij qyteti. Kur dikush vjen për ekskursion dhune nga një qytet tjetër, që nuk është se e ka ndritur dhe mbyll qepenin e bashkisë së vet për të prish bashkinë tonë, sigurisht që më dhemb”, përfundoi Veliaj.