Shpërndaje
Për dy net me radhë, në datat 5 dhe 6 Maj, Olen Cesari dhe International Clandestin Orchestra dhanë një koncert në Pallatin e Koncerteve në Tiranë.
Pas periudhës së pandemisë, kishte kohë që sallat e koncerteve të jehonin nga tingujt e instrumentave, si violina magjike e Olenit, orkestrës që e shoqëronte, këngëtarëve, valltarëve e balerinëve, nën një skenografi fantastike dhe publiku të mos elektrizohej nga përjetimi i emocioneve të tilla.
Koncerti u pasurua nga të ftuar specialë si Carlos Paz, Lavinia Mancusi, Pablo Valentin Moxanes, Ambra Amari dhe Ansambi Kombëtar i Këngëve dhe Valleve, që i dha ngrohtësi spektaklit me larminë e pjesëve që interpretuan dhe kostumet e tyre shumëngjyrëshe. I ftuar ishte gjithashtu edhe humoristi Salsano Rrapi, i cili me tonet e veta të humorit i dha veçanti mbrëmjes. Freski solli në këtë mbrëmje edhe Orkestra e Harqeve e Liceut Artistik, Jordan Misja.
Virtuoziteti i interpretimit të Olenit, një artist i mirënjohur dhe në arenën ndërkombëtare, gërshetuar harmonikisht me elementët e tjerë të koncertit, u prit me ovacione nga publiku tiranas, që shoqëronte koncertin me duartrokitje të ngrohta dhe shpesh duke kënduar.
Koncerti mbështetej nga Bashkia Tiranë dhe donatorë të tjerë.
Shpërndaje