Shpërndaje
Kreu i Bashkisë së Tiranës, Erion Veliaj uroi sot të gjithë besimtarët myslimanë shqiptarë për ditën e Fiter Bajramit. I shoqëruar nga kandidatë për këshilltarë në Bashkinë e Tiranës, Veliaj zhvilloi një vizitë në selinë e Komunitetit Mysliman Shqiptar, nga ku edhe i përcolli urimet e tij kreut të këtij komuniteti, Bujar Spahiu.
Ai theksoi se ky është një muaj i jashtëzakonshëm solidariteti, ndërsa shtoi se të gjitha qendrat sociale kanë qenë të hapura për familjet në nevojë. “Faleminderit të gjithë atyre që muajin e Ramazanit e kanë kthyer në një muaj të jashtëzakonshëm solidariteti. Nuk ka pasur qendër sociale, familje në nevojë, jetimë, njerëz në ndihmë ekonomike që nuk kanë marrë një paketë solidariteti nga Bashkia e Tiranës dhe anëtarët e Komunitetit Mysliman, të cilët kanë identifikuar të gjithë nevojtarët, që askush të mos mbetej pas, sidomos në këto ditë të veçanta”, tha Veliaj.
Kryebashkiaku bëri thirrje se kjo frymë solidariteti të vijojë gjatë gjithë muajve të vitit. “Thirrja ime është që ta vazhdojmë këtë solidaritet. Dike nisur nga sot, vërtet u bë falja e Bajramit, por jeta vazhdon. Edhe pse nuk është Ramazan, është shumë e nevojshme, qoftë edhe me aksionin që filluam sot në ndihmë të qytetarëve në Korçë, në zonën e Floqit, ku ka pasur tërmete, çuam tre kamionët e parë. Kemi ende nevoja, sidomos për të moshuarit. Ky është një moment fantastik për të vijuar këtë frymë çdo ditë, duke filluar nga ora e parë pas faljes së Bajramit”, tha ai.
Veliaj theksoi se ky 4 qershor është një ditë e mirë për besimtarët, por jo për politikanët, të cilët duhet të reflektojnë. “Tek të gjitha dyert e komuniteteve fetare keni parë politikanë që predikojnë pafundësisht për harmoni fetare e vëllazëri. Komunitetet fetare kanë pasur vëllazëri prej 100 vitesh. Por, njerëzit më sherrxhinj, më të përçarë dhe më helmaxhinj në shoqërinë tonë, iu japin mend komuniteteve për harmoni, e pasi japin mend, kalojnë në anën tjetër të rrugës dhe qëllojnë me molotov e tulla vëllezërit e tjerë shqiptarë, me uniformë policie. Ndaj, sot është një ditë e mirë për besimtarët, por një ditë e trishtë për politikanët, që besoj duhet të reflektojmë”, theksoi Veliaj.
Ai shtoi se është koha për të nxjerrë mësime nga komunitetet fetare, duke marrë mësime nga ata që vëllazërinë e kanë kthyer në mënyrë jetese, dhe jo nga ata që thonë fjalët e duhura, por pasi kalojnë trotuarin bëjnë veprimet e gabuara. “Nuk mund t’i predikojmë për harmoni Monsinjorit dhe Imamit, ndërkohë që vetë nuk ulemi të flasim, nuk përqafojmë njëri-tjetrin, shkojmë në shtëpi e rrahim gratë, shkojmë në stadium e rrihemi me njëri-tjetrin. Është shumë e rëndësishme që të jetojmë jetën që predikojmë. Nëse predikojmë këtë jetë dhe japim këto mesazhe, duhet t’i japim njësoj si nga kjo anë e trotuarit, edhe nga ana tjetër, ndryshe do hyjmë në histori si hipokritë. Ndaj, unë besoj se detyra e secilit prej nesh është që të jetojë jetën që predikon, të nxjerrë mësime nga komunitetet fetare. Sot është koha të ulim kokën dhe të marrim mësim nga ata që vëllazërinë e kanë kthyer në mënyrë jetese dhe jo nga ata që thonë fjalët e duhura, por pasi kalojnë trotuarin bëjnë veprimet e gabuara. Paçi të gjithë më shumë dashuri, më shumë fokus te familjet tona”, nënvizoi Veliaj.
Anëtarja e Këshillit Bashkiak të Tiranës, Albina Nanaj, e cilësoi ditën e sotme si një festë shprese, bashkimi dhe solidariteti. Teksa uroi gjithë besimtarët, Nanaj apeloi për më shumë solidaritet dhe bashkëpunim me njëri-tjetrin.
Shpërndaje