Kryebashkiaku i Tiranës, Erion Veliaj uron besimtarët me rastin e Kurban Bajramit: “Të fokusohemi te gjërat që na bashkojnë, jo te përçarja”

Kryetari i Bashkisë së Tiranës, Erion Veliaj, uroi sot besimtarët myslimanë për festën e Kurban Bajramit. Fillimisht, ai i përcolli urimet e tij kreut të Komunitetit Mysliman dhe më pas, nëpërmjet medias, edhe gjithë shqiptarëve. Veliaj theksoi se apeli i kësaj dite është për më shumë bashkëpunim dhe solidaritet me njëri-tjetrin, duke lënë pas urrejtjen dhe përçarjen.

“Sot është momenti për të kuptuar thelbin e kësaj feste, për të sakrifikuar egot tona, lakminë dhe babëzinë, mërinë, urrejtjen, inatet që kemi me njëri-tjetrin. Sikur të duam më shumë dhe të urrejmë më pak, sikur të bashkëpunojmë më shumë dhe të përçahemi më pak, sikur të merremi më shumë me punë dhe të merremi më pak me llafe, janë sakrifica të cilat mund t’i bëjmë në kohët moderne. Fryma dhe solidariteti i kësaj feste na bën këtë apel më të fortë”, tha ai.

Veliaj kërkoi nga qytetarët që në këtë ditë të veçantë të ndihmojnë njerëzit më në nevojë, ndërsa nënvizoi se të gjitha qendrat sociale po shërbejnë drekë për të pamundurit. “Këtë frymë të mirë që kemi nisur në Tiranë këto 4 vite, duhet ta vazhdojmë përditë, për t’u bërë jo vetëm qyteti më i mirë si urbanistikë, si infrastrukturë me stilin e jetesës, por edhe qyteti më i mirë me zemër, me solidaritet dhe me dashuri”, u shpreh ai.

Kryebashkiaku komentoi edhe çështjen e memorialit të vendosur nga Ambasada Turke pranë Parkut të Liqenit Artificial. Ai theksoi se në këtë zonë janë mbi 50 pika ku përkujtohen ngjarje apo individë të ndryshëm. “Në atë territor ka mbi 50 pika, ku janë kujtuar raste të ndryshme, dhe secili ka mundësi të respektohet. Unë do të thosha t’i lëmë të vdekurit të qetë dhe kush do që t’i respektojë me një qiri, me një lule apo me një lutje, t’i lëmë gjithashtu të qetë. Tirana zemërmadhe ka vend për të gjithë. Ndaj, për të gjithë ata që vapa e gushtit i kapi në ngut për fletërrufe, s’ka ndodhur asnjë hata, le më tradhti apo ndonjë shkelje e kësaj natyre. Pushime të mbara të gjithëve dhe gëzuar festën”, tha Veliaj.
 
Ai shtoi se ata që ankohen për këtë çështje, as nuk u ka rënë në mendje për atë pjesë të Parkut e cila dikur ishte zaptuar e mbuluar me ferra e plehra. “Nuk i prish punë askujt. Më thonë është në cepin e Liqenit, ku shumica prej atyre që ankohen as iu ka rënë në mendje kur ishte mbuluar me ferra dhe kur digjej plastikë dhe ku zaptohej si territor. Lart, në katin e dytë të KMSH lashë duke u përqafuar drejtuesin e të krishterëve me drejtuesin e myslimanëve. Kjo është fryma e kësaj feste, të fokusohemi tek gjërat që na bashkojnë. Tek Liqeni dhe në të gjithë Tiranën ka vend për të gjithë”, nënvizoi Veliaj.

Më pas, ai vizitoi edhe selinë e Kryegjyshatës Botërore Bektashiane në Shqipëri, ku i uroi festën kreut të besimtarëve bektashinj në vendin tonë, Baba Edmond Brahimaj.