Kryebashkiaku i Tiranës mbledh administratorët e 24 Njësive për aksionin e 21 Marsit

Nisma për gjelbërimin e Tiranës po merr hov në çdo lagje të kryeqytetit. Pranë çdo pallati do të mbillen së paku 5 pemë të reja, si mënyra më e mirë për t’i dhënë më shumë ajër qytetit, por edhe për të përmirësuar anën estetike. Kjo është arsyeja pse edhe sot, kryetari i Bashkisë së Tiranës, Erion Veliaj, shfrytëzoi një takim me 24 administratorët e Njësive Administrative dhe një grup të administratorëve të zgjedhur të pallateve, ftoi qytetarët t’i bashkohen aksioneve për mbjelljen e pemëve në lagjen e tyre. Ai kërkoi angazhim për shtimin e sipërfaqeve të gjelbra, si dhe marrjen e masave për të vijuar me mbjelljet deri në 21 Mars, kur do të zhvillohet një aksion i madh për gjelbërimin e Tiranës.

“Më vjen mirë që veç 24 administratorëve të njësive, sot na u bashkuan edhe 80 administratorë pallatesh, që përfaqësojnë 80 komunitete shumë të çmuara të Tiranës, të cilët janë zotuar të mbjellin nga 5 pemë në secilin pallat. Njerëzit janë ndarë në dy kategori; një që vetëm jep mend si shpiket rrota, dhe një kategori tjetër që falë Zotit janë shumica që bën punë”, tha Veliaj, duke shtuar se Tirana ka hyrë tashmë në një moment tjetër emancipimi. “Fakti që shqetësimi që kemi sot është sasia e pemëve që po mbjellim dhe rekordi që duam të kapim me 100 mijë pemë deri në 21 mars, tregon që Tirana ka hyrë në një revolucion jo vetëm gjelbërimi, por edhe kulturor”, shtoi ai.

Ai tha se nga ana e bashkisë dhe institucioneve të saj do ketë një angazhim të plotë për të qenë afër qytetarëve me mjetet dhe logjistikën e duhur për të ndihmuar në çdo iniciativë mbjelljesh. “Do të kemi tre mijë punëtorë të Bashkisë së Tiranës të shpërndarë në të gjitha lagjet, me të gjitha pajisjet, në mënyrë që të ndihmojmë qytetarët për mbjelljen e pemëve. Duam që paraprakisht të sinjalizoni vendet ku do të ketë mbjellje. Për zonat rurale kemi nxitur edhe mbjelljen e druve frutorë”, u shpreh Veliaj.

Për aksionin që është shtrirë në të gjithë qytetin, duke përfshirë edhe zonat rurale, kryebashkiaku kërkoi kontributin e atyre që marrin ndihmë ekonomike, që t’i bashkohen nismës në dobi të gjithë komunitetit. “Unë besoj se në aksione të tilla e kemi gjithë të drejtën që njerëzve që marrin ndihmë ekonomike, t’u kërkojmë në këmbim një ditë punë. Të 5 mijë njerëzit që marrin ndihmë ekonomike, mund të na japin një dorë në fushatën e mbjelljeve. Ndaj, ju lutem, mbani kontakt me ta që t’i japin komunitetit një ditë punë”, tha kreu i Bashkisë së Tiranës.

Ai theksoi se për t’i ardhur në ndihmë qytetarëve apo çdo subjekti tjetër privat që do t’i bashkohet kësaj nisme, Bashkia e Tiranës ka hartuar edhe një listë të fidanishteve ku dhe mund të blejnë pemët që duan të mbjellin. Veliaj u shpreh i sigurt se deri më 21 mars, Tirana do të tejkalojë numrin e 100 mijë pemëve të reja të mbjella. “Një ndër gjërat që kemi kërkuar është që të gjithë qytetarët e Tiranës të na bashkohen në fushatën e 21 marsit. Sot, kemi një faqe online: aprtirana.al, ku bëjmë një numërim ditor të pemëve të mbjella. Sapo kemi kaluar kufirin e 75 mijë pemëve, pra jemi vetëm 25 mijë pemë larg nga rekordi ynë i 100 mijë pemëve për këtë sezon”, nënvizoi ai.

Duke vlerësuar impaktin pozitiv që ka shtimi i sipërfaqeve të gjelbra, Veliaj theksoi se Tirana është 3 herë më i pastër se qendra e Shkupit. “Me këtë nismë dhe falë kontributit tuaj, këto lagje do të përfitojnë rreth 400 pemë të reja në 80 komunitete, por sigurisht edhe një mjedis më cilësor”, deklaroi Veliaj. Ai u ndal edhe në çështjen e zgjedhjes së administratorëve të rinj të pallateve, ku brenda këtij viti pritet të përmbyllet edhe ky proces i suksesshëm, duke e kthyer Tiranën në një bashki model.