Kryebashkiaku Veliaj shpërndan ndihma për të moshuarit e vetmuar në zonën e Freskut

Kryebashkiaku Veliaj shpërndan ndihma për të moshuarit e vetmuar në zonën e Freskut
 
Shpërndarja e ndihmave me pako ushqimore për familjet në nevojë dhe pensionistët e vetmuar vijon çdo ditë edhe në Lagjen 12, ku përfshihet zona e Freskut. Kryetari i Bashkisë së Tiranës, Erion Veliaj ishte dje në familjet e Halime Alushanit, Myzejen Hoxhës, Rrushe Kopanit dhe Petrit Çabejt, të cilët janë në moshë të thyer dhe me vështirësi të shumta ekonomike.
 
Veliaj theksoi se deri sa të kalojë kjo epidemi, ndihma nuk do të mungojë tek ata që kanë realisht nevojë. “Njerëzit duhet ta kuptojnë se duhet të çojmë ndihma tek ata që kanë realisht nevojë, në familje me persona me aftësi të kufizuar, pensionistë, etj. Se kur sheh të rinj që nuk e heqin cigaren nga goja dhe kërkojnë ndihma, duke dashur pjesën e një hallexhiu apo pensionisti”, tha ai.
 
Kryebashkiaku nënvizoi se masat e marra në kohë nga qeveria kanë dhënë rezultat, ndërsa vlerësoi edhe punën e palodhur të stafit mjekësor dhe të policisë. “Do kalojë edhe kjo, do jetë si një përrallë e vjetër. Ndonjëherë, edhe kryeministri s’e ka të lehtë të japë urdhëra që të rrinë brenda, por është e vetmja mënyrë. Kjo është një ndër ato beteja që nuk fitohet në fushë, fitohet në divan”, tha Veliaj.
 
Një prej banorëve vlerësoi angazhimin e institucioneve shtetërore për të përballuar këtë situatë dhe i cilësoi të duhura masat. “Shqiptarët nuk janë mërzitur kurrë, as nga lufta që u bë, as nga cdo gjë por ky virusi qenka një flamë e madhe që na futi brenda. Faleminderit shumë  z. Kryetar. Në kohën e luftës populli ynë dëshmoi edhe mençuri, tani në kohën e kësaj kolere kemi treguar në sytë e botës se sa vlera kemi si popull. Masat e marra janë për të mirën tonë, se kjo është kolerë që ka mbyllur tërë botën, por bijtë e shqipes nëpër vendet e botës treguan se kush janë, treguan vlerat e kombit të tyre dhe këtu në Shqipëri lanë disa shqipe të tjera, lanë disa bij të shqipes të tjerë që me programin e tyre po luftojnë që të gjithë ne ta kalojmë këtë”, theksoi e moshuara që jeton në Lagjen 12.
 
Vetëm në zonën e Freskut janë 122 pensionistë, prej të cilëve 51 të vetmuar. Qindra vullnetarë po ndihmojnë përditë gjyshe, gjyshër, familje në nevojë me pako ushqimore.