Kryeministri dhe kreu i Bashkisë së Tiranës inspektuan punimet për rikonstruksionin e Godinës Nr.1 te konviktet e Mjekësisë

Studentët e mjekësisë që jetojnë në Godinën Nr.1, në qendrën rezidenciale në rrugën “Dibrës”, kanë tashmë ambiente më të mira higjeno-sanitare, si dhe një sallë leximi moderne. Bashkia e Tiranës ka vijuar punimet për rikonstruksionin e plotë të Godinës Nr. 1, ku fillimisht është ndërhyrë në mjediset e përbashkëta, banjat, dushet, e sallat e leximit. Punimet u inspektuan sot nga kryeministri, Edi Rama, kryetari i Bashkisë së Tiranës, Erion Veliaj dhe ministrja e Shëndetësisë, Ogerta Manasterliu, të cilët pasi panë nga afër punimet, zhvilluan edhe një bashkëbisedim me studentët që jetojnë aty, duke iu përgjigjur pyetjeve dhe paqartësive lidhur me zbatimin e Paktit për Universitetin.

Kryeministri Edi Rama, në fjalën e tij, theksoi se Pakti për Universitetin i jep zgjidhje jo vetëm kërkesave që kanë shtruar studentët, por edhe një sërë çështjeve të tjera, siç është kampusi Universitar, punësimi i studentëve më të mirë, por edhe krijimi i një partneriteti mes ministrive dhe universiteteve sipas fushave. “Për të adresuar specifikat kemi shkuar shumë më tutje se sa kërkesat; një nga ato pika ku kemi shkuar më tutje është pikërisht krijimi i partneriteteve mes ministrive dhe universitetit, sipas fushave. Do të thotë që ministria e Shëndetësisë do të ndjekë Universitetin e Mjekësisë dhe problematikat e komunitetit të studentëve dhe të pedagogëve, si partnere duke vënë në dispozicion edhe burime financiare për aspekte të ndryshme që kanë të bëjnë me nevojat e universitetit. Po kështu, edhe për fushat e tjera ku kemi konstatuar probleme”, tha kryeministri.

Ai bëri të ditur se janë ngritur po ashtu grupe pune për çdo universitet dhe fakultet për të bërë një renditje të të gjitha problematikave që ekzistojnë dhe që duhen trajtuar. “Çdo ministri, sipas fushave specifike të partneriteteve, me universitetin, me fakultetet përkatëse kanë ngritur ose po ngrenë grupe pune për të bërë inventarin e nevojave nga pikëpamja e infrastrukturës apo logjistikës, pra hapësira studimi, laboratorë, mjete etj. Mbi bazën e të gjithë këtyre inventarëve do të ndërtohet projekt-zbatimi i këtij aspekti të Paktit të Universitetin. Me hapësirën fiskale të krijuar kemi në dispozicion një shumë të konsiderueshme financimi, në bashkëpunim me sipërmarrjen private, për të filluar pasi të kemi projekt-zbatimin, për të bërë një thirrje publike dhe për të lidhur kontrata për adresimin e nevojave në të dyja këto drejtime, pra infrastrukturë dhe logjistikë. Kështu, do të fillojë ndërtimi i kampusit universitar”, u shpreh Rama.

Kryebashkiaku Veliaj u shpreh se Bashkia e Tiranës, në përmbushje të detyrave që i përcakton Pakti për Universitetin, ka filluar punën për rikonstruksionin e një numri të konsiderueshëm konviktesh në të treja qendrat rezidenciale që funksionojnë në Tiranë. “Siç dakordësuam bashkë për planin e punës, fillimisht po ndërhyjmë në hapësirat e përbashkëta, pra ato hapësira ku mund të punojmë dhe mund të investojmë. Mbaj mend si ishte herën e fundit kjo sallë dhe si është transformuar sot, për punë ditësh. Do të punojmë për dushet, për nyjet higjieno-sanitare, derisa ju të jeni në mësim”, tha kryetari i Bashkisë së Tiranës.

Ai bëri të ditur se pas punës me ambientet e përbashkëta, puna do të vijojë edhe në dhomat ku jetojnë studentët, menjëherë sapo të mbarojë mësimi dhe studentët të jenë larguar në shtëpitë e tyre. “Prandaj insistova atë ditë që është mirë që filloi mësimi, që të mos vazhdojë deri në korrik, gusht e shtator, sepse kjo do na linte shumë pak kohë për të punuar nëpër dhoma. Megjithatë, ju falënderoj shumë dhe tani që mbaruam këtu mund të zhvendosemi në pjesë të tjera; do të vazhdojmë kështu derisa të fillojnë të lirohen dhomat dhe ndoshta kush largohet më herët mund të rregullohemi në njëfarë mënyre që të fillojmë dhe t’i prekim pak nga pak dhomat dhe të maksimizojmë kohën e verës”, u shpreh Veliaj.