Kryetari i Bashkisë së Tiranës dhe gazetarja Rudina Xhunga mbjellin pemë për ditëlindjen e Alanas

Gazetarja dhe moderatorja e njohur, Rudina Xhunga ka zgjedhur që ta festojë ndryshe 6 vjetorin e lindjes së vajzës së saj, Alana. Ajo iu bashkua thirrjes së kryebashkiakut Erion Veliaj dhe në këtë përvjetor mbollën së bashku një pemë manjole në kondrat e Parkut të Liqenit Artificial. Kryebashkiaku Veliaj uroi Alanën për ditëlindjen e saj dhe falenderoi gazetaren Xhunga që iu bashkua nismës së Bashkisë së Tiranës, që të gjithë qytetarët çdo gëzim dhe moment të rëndësishëm në jetë ta kremtojnë duke mbjellë një pemë sepse i lënë qytetit një pajë të gjelbër. 

“Edhe unë, edhe Rudina duam t’u bëjmë një thirrje të gjithë miqve tanë dhe qytetarëve që për çdo sebep, për çdo ditëlindje, për çdo përvjetor, mbjellja e një peme është një mundësi fantastike për të kujtuar të dashurit tanë dhe që i kemi shumë të çmuar. Besoj se ky qytet ka treguar se me pak solidaritet, ku secili bën sa mundet, por e bën me dashuri, pak nga pak bëhet një pyll. Ashtu si çdo oqean do të ishte më pak, thoshte Nënë Tereza, pa atë pikën e ujit, edhe veprat tona ndonjëherë duken si një pikë e vogël, një pemë në një pyll kaq të madh, por kur bëhen nga mijëra njerëz dhe bëhen me dashuri, i gjithë qyteti është shumë më i mirë. Shumë faleminderit”, u shpreh Veliaj.

Gazetarja Xhunga nga ana e saj i shprehu mirënjohjen kryebashkiakut Veliaj për mundësinë e krijuar, por në mënyrë të veçantë për punën që Bashkia e Tiranës ka bërë në Parkun e Madh të Liqenit. “Faleminderit që erdhe. Ne erdhëm për ditëlindjet tona, por ishte shumë bukur të bëheshim pjesë e kësaj gjëje të bukur që ke bërë nga liqeni. E bëj me dëshirë të madhe, apo jo Alana? Vijmë shpesh ne këtej, kënaqemi shumë”, tha Xhunga.

Kryebashkiaku Veliaj i bëri thirrje të gjithë qytetarëve, jo vetëm fëmijëve, por edhe më të mëdhenjve, që të shfrytëzojnë kohën e mirë edhe për festat e muajit shkurt dhe mars të mbjellin një pemë. “Duhet t’u bëjmë thirrje të gjithë kalamajve për shembull për një ditëlindje, për 7-8 Marsin, për ndonjë festë tjetër. Do t’u themi gëzuar ditëlindjen, por duke mbjellë një pemë. Mund ta mbjellim edhe te shtëpia; mund ta mbjellim dhe te shkolla; te lagjja. Pra, mund të mbjellim pemë kudo. Sikur të gjithë kalamajtë e Tiranës të mbjellin nga një pemë për ditëlindje, do të kemi 100 mijë pemë”, u shpreh Veliaj. 

Bashkia e Tiranës është angazhuar për të tretin vit radhazi në një fushatë të gjerë për mbjelljen e pemëve. Vitin e shkuar ajo arriti të mbjellë rreth 126 mijë pemë, ndërsa këtë vit synohet të mbillen 150 mijë pemë.