Kryetari i Bashkisë së Tiranës propozoi TVSH zero për të gjithë autobusat elektrikë

Kryetari i Bashkisë së Tiranës, Erion Veliaj, mori pjesë sot në dëgjesën e Komisionit Parlamentar të Ligjeve, në cilësinë e kryetarit të Shoqatës për Autonominë Vendore, ku diskutoi për projekt-buxhetin e Shtetit për vitin 2020. Në fjalën e tij, ai propozoi rishikimin e ndarjes së re territoriale, në mënyrë që Aeroporti i Rinasit të jetë pjesë e Tiranës dhe jo e Fushë-Krujës.

“Reforma Fino-Çuçi ka adresuar 99.99% të shqetësimeve, megjithatë duke qenë se ishte voluminoze, duhet të ketë një rishikim të kufijve në disa raste. Nuk mundet që aeroporti kombëtar i Shqipërisë, i Tiranës, të vazhdojë të jetë në Fushë-Krujë dhe nuk mundet që rruga lidhëse të jetë në Vorë. Vetëm segmenti qafë e Kasharit, ku mbaron kufiri i Tiranës, deri te rrethrrotullimi i Rinasit, ka 192 çarje të paligjshme në rrugë”, tha Veliaj.

Ai theksoi se ky rishikim bëhet i domosdoshëm për të krijuar mundësi për investime. Kryebashkiaku shtoi se Bashkia e Tiranës i ka mundësitë, por nuk mund të investojë në një territor që nuk është i Tiranës, si në rastin e Rinasit. “Për Bashkinë e Vorës apo të Krujës, nuk ka rëndësi fare kush është kryetar bashkie, Rinasi është në periferi të vëmendjes së tyre, është në periferi të territorit. Ne s’ndërhyjmë dot në rrugën Rinas-Tiranë. Pra, vjen një delegacion të takojë parlamentin dhe rruga Rinas-Tiranë është si Kabuli. Kjo mund të bëhet në ‘të zezë’ deri në njëfarë mase. Por, unë nuk investoj me pemë, të çoj shërbimet e Policisë Bashkiake dhe të IMT-së në një territor që nuk është i imi, se është shkelje”, theksoi Veliaj.

Mandej, kryetari i Bashkisë së Tiranës nënvizoi vendosmërinë e qytetit për të përqafuar teknologjinë ekologjike në transportin publik. Për këtë, ai propozoi uljen e TVSH-së për autobusët dhe mjetet elektrike, duke sjellë në këtë mënyrë edhe mbrojtjen e mjedisit dhe të jetës së qytetarëve. “Propozojmë që TVSH-ja për autobusët dhe automjetet elektrike të jetë zero. Është diçka që ka bërë me shumë sukses Norvegjia. Miqtë tanë, përtej Adriatikut si Italia e kanë futur, madje kanë shkuar edhe më larg, për pesë vite makinat elektrike nuk paguajnë as taksat e qarkullimit. Edhe pse Drejtoria Rrugore, tashmë ka dhënë incentiva për mjetet elektrike me zero ndotje, besoj se do të ishte një risi në Ballkan”, tha Veliaj.

Ai prezantoi edhe një projekt shumë të rëndësishëm që pritet të zbatojë Bashkia e Tiranës për ta kthyer liqenin e Bovillës në një impiant të energjisë solare. “Kemi planifikuar që disa nga kompanitë kryesore botërore, me famë për energjinë solare, të përdorin të njëjtin liqen që sipër prodhon energji dhe poshtë ujë për qytetin”, tha ai.

Në dëgjesën për projektbuxhetin e pushtetit vendor për vitin 2020, Veliaj deklaroi se është momenti që sikurse shumë vende të Europës kanë një ligj të veçantë për kryeqytetin, edhe Tirana të ketë një të tillë.

“Është shumë e rëndësishme që për kryeqytetin të kemi ligj të veçantë. Ashtu si Roma, ta kemi edhe në Tiranë, të themi që shërbimet që ofron Tirana si kryeseli e qeverisë, e gjykatave, e të gjitha institucioneve qendrore, ka një kosto e cila nuk llogaritet dot për banorë, po për përdorues. Kemi marrë modele shumë të mira dhe është koha t’i adresojmë, duke filluar nga kufijtë e Tiranës dhe pastaj të gjitha shërbimet e tjera, që Tirana të reflektojë dinjitetin e kombit tonë. Është kartolina e Shqipërisë. Vitin tjetër Tirana mbush 100 vjet. Është shumë e rëndësishme që të ketë më në fund një ligj të vetin. Do donim që ai vit jubilar të përkthehet edhe në një vit sinjifikativ në aspektin e legjislacionit”, tha Veliaj.