Mijëra qytetarë festojnë Ditën e Verës në Tiranë

Argëtim, sport, muzikë, produkte artizanale, ushqim të shëndetshëm, ishin ato çfarë ofroi sot kryeqyteti për të gjithë qytetarët që zgjodhën Tiranën për të kaluar festën e Ditës së Verës. Mijëra qytetarë të të gjitha moshave, shumë prej të cilëve të ardhur edhe nga rrethet, janë bërë pjesë e festimeve të organizuara në rrugët dhe sheshet e kryeqytetit.

Festimet nisen në orën 10:00, me paradën e karnavaleve, ku fëmijë të shkollave të ndryshme të kryeqytetit parakaluan në drejtim të Liqenit Artificial. Më pas festimet vijuan me aktivitete sportive dhe muzikore. Një nga pilotët më të mirë në botë, Martin Sonka, dhuroi shfaqje me aeroplanin e tij sportiv në qiellin mbi sheshin “Skënderbej”.

Kësaj feste i është bashkuar edhe Kryetari i Bashkisë së Tiranës, Erion Veliaj, i cili e nisi ditën duke mbjellë pemë të reja në zona të ndryshme të kryeqytetit. Pasi është përshëndetur me qytetarë të shumtë, ai ndoqi nga afër shumë prej aktiviteteve të sotme, si dhe përcolli urimin e tij për të gjithë qytetarët e Tiranës.

“Dua t’u uroj nga zemra në emër të Bashkisë të Tiranës dhe të gjithë qytetarëve tanë gëzuar Ditën e Verës! Sot kemi pasur një ditë me aktivitete. Të gjithë parashikonin që do ishte shi dhe sterrë, por na pa Zoti dhe kemi patur një ditë fantastike. E filluam me disa mbjellje masive në rrethinat e Tiranës, pastaj nga Liqeni, ku kemi patur pafund aktivitete, dhe më pas te sheshi “Skënderbej”. Dua t’ju uroj të gjithëve një stinë të mbarë. Stina e pranverës, stina e verës, ardhja e një moti të ri  është ndoshta një moment për të reflektuar e për të kuptuar që kur ne jemi bashkë, ne bëjmë mrekulli”, theksoi Veliaj. Gjithashtu ai falënderoi Federatën Shqiptare të Aeronautikës për performancat e krijuara mbi sheshin “Skënderbej”.

Më tej, kryebashkiaku theksoi se pavarësisht disa debateve, puna për ndërtimin e Tiranës do të vijojë. Ndërkohë, ai siguroi nisjen e një sërë projektesh të rëndësishme për qytetin sikurse do të jenë transformimi i Piramidës, ndërtimi i Teatrit të ri dhe ndërtimi i pjesës së mbetur të Bulevardit të Ri.  “Pavarësisht debateve që pati kur ndërtuam këndin e lojërave, pavarësisht debateve që pati kur ndërtuam Pazarin e Ri, pavarësisht debateve që pati kur ndërtuam Bulevardin e Ri, do të vazhdojmë në këtë mot të ri për të ndërtuar më shumë në Tiranë, pavarësisht debateve që do kenë. Do të jetë Piramida, do të jetë teatri i ri, do të vazhdojmë me fundin e bulevardit. Ne kemi mësuar që çdo ndryshim vjen me një rrëmujë të madhe, por kur ndryshimi vjen, të gjithë e përqafojnë dhe harrojmë që shumë prej gjërave që kemi kritikuar e debatuar, janë sot pikat më të nxehta të qytetit”, u shpreh kryetari i Bashkisë së Tiranës.

Veliaj theksoi se është momenti që të gjithë të fokusohen te puna dhe të tregohen bashkëpunues e mbështetës për të mos humbur kohë. “Në e shihni ku ka qenë popullsia më e madhe sot, ka qenë tek liqeni, tek këndi i lojërave, këtu te ky sheshi i ri “Skënderbej”, te Pazari i Ri dhe te Bulevardi i Ri. Prandaj, le të fokusohemi që të jemi pozitivë, të jemi dashamirës, të jemi ndërtues, të jemi mbështetës ndaj njëri-tjetrit. Sa herë që zihemi e përçahemi, humbasim kohë të çmuar, por sa herë që punojmë të fokusuar me optimizëm e energji pozitive, ne bëjmë mrekulli. Faleminderit të gjithëve nga zemra dhe ju uroj gëzuar Ditën e Verës”, deklaroi Veliaj.

Për më shumë se tre orë në Bulevardin “Dëshmorët e Kombit” u mbajt një koncert me këngëtarët e njohur, ndërsa Piramida ishte një tjetër skenë e muzikës ku performuan DJ të ndryshëm.  Sikurse është bërë tashmë traditë, Parku i Liqenit Artificial ishte një nga destinacionet më të preferuara nga qytetarët, me varka dhe kanoe për argëtim, aktivitete sportive, panair dhe shëtitje buzë liqenit që gjallëruan këtë zonë të qytetit në këtë ditë festa. Në rrugë të ndryshme të qytetit janë ndërtuar skena më të vogla për të vegjlit. Aktivitetet festive mbyllen në mesnatë ku të rinjtë në pika të ndryshme do të kenë mundësi që të ndjekin DJ dhe këngëtarët më të mirë të momentit të zhanreve të ndryshme muzikore.