Nikos Vertis në Tiranë

Të enjten, datë 25 maj 2023,  Kuadr.com sh.p.k.,  organizoi në Air Albania Stadium, një koncert madhështor me  një artist të mirënjohur ndërkombëtarisht. Ky koncert solli për herë të parë në Shqipëri, në një natë të paharrueshme, këngëtarin Nikos Vertis, i cili performoi për të gjithë qytetarët e Tiranës, Shqipërisë por edhe qytetarët e tjerë europianë të cilët e ndjekin me përzemërsi këtë artist dhe koncertet e tij live.

Nikolaos Arvanitidis, i njohur më mirë me emrin e tij skenik Nikos Vertis është një këngëtar i njohur grek. Ai ka lindur në Gorinchem të Holandës dhe origjinën e ka nga fshati Galipsos. Deri më sot, ai ka publikuar pesë albume së bashku me një CD single, dhe dy albume CD/DVD edicion special.

Koncerti pati mbështetjen e Bashkisë Tiranë, disa sponsorave të tjerë si dhe mbështetjen mediatike të Top Channel.

Kjo ishte hera e parë që Vertis këndonte në Tiranë, ku siç u pa edhe nga pjesëmarrja dhe jehona që pati, këngëtari ka një numër të madh adhuruesish. Një pritje e ngrohtë këngëtarit iu ofrua edhe nga Kryebashkiaku Erion Veliaj e ekipi i tij në mjediset e Bashkisë Tiranë.

Vertis interpretoi live, i shoqëruar edhe nga kori i spektatorëve të shumtë në “Air Albania Stadium”.
Koncerti i realizuar në Tiranë, renditet ndër shumë të tjerë të programuar në turneun e tij të titulluar “20 vjet ritëm dhe pasion”.

Në kuadër të këtij turneu Vertis ka qenë edhe në Sofie, Jerevan, Beograd si dhe në shumë qytete të Greqisë. Ky koncert- spektakël mund të konsiderohet pikë kulmore e Javës Kulturore Greke në Shqipëri.

Koncerti mori vëmendje të madhe mediatike dhe opinione pozitive për sa i përket organizimit dhe efekteve skenike dhe të gjithë elementëve teknikë. Pjesëmarrja e publikut në stadium ishte e lartë. Koncerti u ndoq edhe nga personalitete të jetës publike në Shqipëri.