Njoftim për konsultim publik- Për disa shtesa dhe ndryshime në Vendimin nr.158, datë 26.12.2019 të Këshillit Bashkiak “Për sistemin e taksave dhe tarifave vendore në qytetin e Tiranës, të ndryshuar

Data  e publikimit të njoftimit për konsultim me publikun: 16/02/2024
Titulli i projekt-aktit që hapet për konsultim me publikun: Për disa shtesa dhe ndryshime në vendimin nr.158, datë 26.12.2019, të Këshillit Bashkiak, "Për sistemin e taksave dhe tarifave vendore në qytetin e Tiranës", të ndryshuar.
Baza ligjore: Ligji 146/2014 “Për njoftim dhe Konsultimin Publik”; Ligji 139/2015 “Për vetëqeverisjen vendore”; Urdhër Nr.33338, datë 22.09.2022 Për miratimin e procedurës standarde të veprimit “Procedura për njoftim dhe konsultim publik në Bashkinë Tiranë”; Urdhër Nr.24752, datë 05.07.2022 “Për caktimin e koordinatorit për njoftimin dhe konsultimin publik”.
Nënshkruar nga koordinatori i konsultimit publik: Dorian Rexhepi
Projekt-Akti:  Për disa shtesa dhe ndryshime në vendimin nr.158, datë 26.12.2019, të Këshillit Bashkiak, "Për sistemin e taksave dhe tarifave vendore në qytetin e Tiranës", të ndryshuar.
Relacioni shoqërues: Bashkia Tiranë me qëllim ushtrimin efektiv të funksioneve, kompetencave dhe realizimit të detyrave që i ngarkon legjislacioni në fuqi për vendosjen e taksave dhe tarifave vendore, si dhe mbledhjen dhe administrimin e tyre, merr të gjitha masat e nevojshme për reflektimin e ndryshimeve që ka pësuar legjislacioni në fuqi dhe ndryshimin e paketës fiskale si pasojë e rritjes dhe shtimit të gamës së shërbimeve të ofruara për qytetarët në fusha të ndryshme.
Drejtoria e Përgjithshme e Menaxhimit Financiar, në përputhje me detyrat dhe kompetencat e përcaktuara në rregulloren për organizimin dhe funksionimin e administratës së Bashkisë Tiranë, akteve ligjore dhe nënligjore që rregullojnë fushën e përgjegjësisë së kësaj drejtorie, pasi ka shqyrtuar dhe vlerësuar propozimet për ndryshimet e taksave dhe tarifave në vendimin nr. 158, datë 26.12.2019 të Këshillit Bashkiak “Për sistemin e taksave dhe tarifave vendore në qytetin e Tiranës”, të ndryshuar, (në vijim VKB 158/2019) ka propozuar disa ndryshime duke paraqitur dhe arsyet përkatëse.
Tarifat vendosen dhe administrohen në përputhje me ligjin nr.139/2015 “Pёr vetëqeverisjen vendore”, të ndryshuar. Me përjashtim të rasteve të përcaktuara ndryshe në këtë ligj ose në ligje të tjera, që rregullojnë funksionet dhe tarifat e lidhura me to, këshilli bashkiak vendos për llojet e tarifave, nivelin, rregullat bazë për administrimin dhe mbledhjen e tyre.
Objekt i projektvendimit që po ju paraqesim për miratim janë disa nga taksat dhe tarifat vendore që zbatohen në territorin e Bashkisë Tiranë lidhur me nivelin, procedurat e llogaritjes, baza tatimore, kategorizimet dhe nën kategorizimet, lehtësimet apo përjashtimet etj.
Afati për dërgimin e rekomandimeve dhe forma e pranimit të rekomandimeve:
Pranohen rekomandime deri në datën 15.03.2024.
Rekomandimet lutemi të dërgohen përmes e-mailt në adresat:
[email protected]
kë[email protected]
Struktura përgjegjëse për mbledhjen e komenteve/rekomandimeve për projektaktin: Koordinatori për njoftimin dhe konsultimin publik, Sektori i Konsultimit Publik dhe Opinioneve Qytetare.
Informacion mbi procedurat që do të ndjekë Bashkia nga marrja e rekomandimeve deri në miratimin përfundimtar të aktit: 
Rekomandimet e ardhura në adresën e Koordinatorit për Njoftimin dhe Konsultimin Publik do të mblidhen dhe do të dërgohen për shqyrtim pranë Sekretarit të Këshillit Bsahkiak, për të ndjekur më tej procesin me drejtorinë përgjegjëse për hartimin e aktit.
Në rastin e mospranimit të rekomandimeve do të paraqitet përgjigje me arsyet e refuzimit, ndërsa për rekomandimet dhe komentet që do të pranohen pjesërisht apo plotësisht, do të hartohet një përmbledhje e cila do t’i bashkëlidhet aktit të miratuar.