Njoftim - Thirrje publike për aplikimin e përfaqësuesve proceduralë për fëmijët në Konflikt me ligjin, fëmijët viktima dhe dëshmitarë në Procesin penal

BASHKIA TIRANË  SHPALL:

 THIRRJE PUBLIKE PËR APLIKIMIN E PËRFAQËSUESVE PROCEDURALË PËR FËMIJËT NË
KONFLIKT ME LIGJIN, FËMIJËT VIKTIMA DHE DËSHMITARË NË
PROCESIN PENAL
 

Bashkia Tiranë hap thirrjen për aplikimin e përfaqësuesve proceduralë për fëmijët në konflikt me ligjin, fëmijët viktima dhe dëshmitarë në procesin penal , i cili ka qëllim të identifikojë individët që do të kryejnë këtë funksion.

Përfaqësues ligjor, sipas përkufizimit të ligjit nr.18/2017 është personi i caktuar nga autoriteti procedues nga lista e dërguar nga njësia për mbrojtjen e fëmijës, që do të kryejë përfaqësimin procedural të fëmijës në mungesë të përfaqësuesit të tij ligjor ose, në rast konflikti interesi mes tij dhe fëmijës dhe ka të drejta përfaqësuese në emër të fëmijës në konflikt me ligjin, ose fëmijës dëshmitar/viktimë, me qëllim për të mbrojtur interesin më të lartë të fëmijës.

Gjithashtu, në zbatim, të pikës 4, të nenit 49, të ligjit nr.18/2017, është miratuar udhëzimi i përbashkët nr. 650, datë 13.9.2019, i ministrit i Shëndetësisë dhe Mbrojtjes Sociale dhe ministrit të Drejtësisë “Për përcaktimin e kritereve dhe procedurave për përzgjedhjen e përfaqësuesve proceduralë për fëmijët në konflikt me ligjin, fëmijët viktima dhe dëshmitarë në procesin penal” , i cili parashikon në mënyrë të detajuar kriteret dhe procedurat për përzgjedhjen e përfaqësuesve proceduralë për fëmijët në konflikt me ligjin, fëmijët viktima dhe dëshmitarë në procesin penal.

 Kriteret që duhet të plotësojë një individ për të qenë përfaqësues procedural, janë:
a) të jetë shtetas shqiptar;
b) të ketë diplomën e studimeve të larta Bachelor dhe Master Shkencor ose Master
Profesional në shkenca sociale, juridike, psikologji, sipas legjislacionit në fuqi për arsimin e lartë, lëshuar nga institucioni i arsimit të lartë, brenda apo jashtë vendit, të njohura nga ministria
përgjegjëse për arsimin;
c) të ketë minimalisht 2 vjet eksperiencë pune të mëparshme në çështje të mbrojtjes së të
drejtave të fëmijës;
ç) të ketë trajnime në fushën e mbrojtjes së të drejtave të fëmijës;
d) të ketë njohuri mbi rregullat e zbatueshme për drejtësinë penale për të mitur;
dh) të mos jetë dënuar me vendim të formës së prerë për vepra penale dhunë në familje dhe
vepra penale kundër personit të kryera me dashje.

Kandidatët e interesuar dorëzojnë pranë zyrës së pritjes së qytetarëve ose me postën shqipëtare  të gjithë dokumentacionin e mundshëm që vërteton përmbushjen e kritereve të përcaktuara në pikën 7 të këtij udhëzimi, si dhe deklarojnë adresat dhe të dhënat elektronike të kontaktit të tyre.

Thirrja për aplikimet hapet ditën e hënë, datë 09.06.2025 dhe mbyllet ditën e martë, datë 09.07.2025, ora 16.00. 

Afati për dorëzimin e dokumentacionit pranë njësisë për mbrojtjen e fëmijës është 5 ditë nga përfundimi i afatit 30-ditor, të përcaktuar në nenin 10 të këtij udhëzimi.

Procedura për vlerësimin dhe përzgjedhjen e kandidatëve për përfaqësues procedural zhvillohet në dy faza. Faza e parë e vlerësimit e cila zgjat jo më shumë se 10 ditë, konsiston në shqyrtimin dhe verifikimin e plotësimit të dokumentacionit, që vërteton përmbushjen e kritereve formale të përcaktuar në pikën 7, të këtij udhëzimi dhe vlerësohet maksimalisht me 70 pikë.

Komisioni përzgjedhës, pasi kryen verifikimin për përmbushjen e kritereve të përcaktuara në pikën 7 të këtij udhëzimi në bazë të dokumentacionit provues të depozituar nga kandidatët, i njofton ata për rezultatet e fazës së parë të përzgjedhjes, si dhe për arsyet e skualifikimit, në rrugë shkresore dhe elektronike, jo më vonë se 10 ditë nga përfundimi i afatit sipas pikës 14 të këtij udhëzimi.

Kandidatët të cilët nuk janë kualifikuar për të kaluar në fazën e dytë të përzgjedhjes, kanë të drejtën e ankimit brenda 3 ditëve pranë komisionit përzgjedhës.

Pas shqyrtimit të kërkesave ankimore të paraqitura, komisioni përzgjedhës njofton kandidatët që kanë paraqitur ankim, për rezultatin e ankesave të tyre brenda 5 ditëve nga depozitimi i kërkesës ankimore.

Faza e dytë e përzgjedhjes zhvillohet brenda 3 ditëve nga momenti i përfundimit të afatit 5-ditor të parashikuar në pikën 17 të këtij udhëzimi. Në këtë fazë komisioni përzgjedhës zhvillon intervista me gojë me kandidatët, të cilët kanë rezultuar fitues në fazën e parë, ku vlerësohen në lidhje me njohuritë, aftësitë, motivimin si dhe eksperiencat e mëparshme të tyre. Totali i pikëve për këtë fazë është 30 pikë.

Kandidatët, të cilët nuk janë  kualifikuar pas fazës së dytë të vlerësimit, kanë të drejtën e ankimit brenda 3 ditëve pranë komisionit përzgjedhës.
Pas shqyrtimit të kërkesave ankimore të paraqitura lidhur me rezultatet e fazës së dytë, komisioni përzgjedhës njofton kandidatët që kanë paraqitur ankim, për rezultatin e ankesave të tyre brenda 5 ditëve nga depozitimi i kërkesës ankimore.

Pas përfundimit të procesit të përzgjedhjes, komisioni përzgjedhës, brenda 5 ditëve, shpall në faqen zyrtare të bashkisë dhe në Buletinin e Njoftimeve Zyrtare të Republikës së Shqipërisë, listën e kandidatëve fitues të renditur sipas pikëve totale të fituara nga secili prej tyre.