Shpërndaje
Text size
Pakicat dhe diverstiteti kulturor në TiranëNë datën 15 Nëntor 2022, në Sallën e Bibliotekës së Akademisë së Studimeve Albanologjike, u zhvillua leksioni “Pakicat dhe Diversiteti Kulturor në Tiranë” që u mbajt nga Dr. Ervin Kaçiu i Institutit të Antropologjisë Kulturore dhe Studimit të Artit. Ky leksion është në vijim të Programit të Edukimit me çështje të Trashëgimisë Kulturore të Tiranës dhe të rrethinave të saj që Bashkia e Tiranës, Drejtoria e Kulturës dhe Trashëgimisë Kulturore, ka organizuar përgjatë gjithë vitit 2022 në bashkëpunim me ASA.
Në këtë leksion u shtjelluan disa nocione bazë që ndihmojnë për të kuptuar më mirë pakicat, fokusuar në përshkrimin e pakicave që banojnë në Tiranë dhe në reflektimin e tyre mbi diversitetin social e kulturor.
Tirana është një metropol në zhvillim dhe transformim të përhershëm për shkak të migrimit, imigrimit dhe mobilitetit social përgjatë gjithë post-socializmit. Morfologjia sociale e Tiranës është komplekse sepse përbëhet nga një popullatë heterogjene ku projektohet çdo përfaqësi e mundshme e grupeve shoqërore që banojnë në Shqipëri, të cilat shpalosen dhe kërkojnë të afirmohen në këtë mjedis social. Përpos pakicave etnike të njohura ligjërisht si pakica kombëtare, ( në Tiranë jaktualisht janë prezentë rreth 144 kombësi) në këtë areal kulturor gjenden edhe një sërë pakicash të tjera të formësuara në bazë të orientimit seksual ashtu si edhe tipologji të krijuara rishtas, si komunitete shtetasish të huaj me qëndrim të përkohshëm apo të përhershëm në Shqipëri që e shumëfishojnë diversititetin kulturor të Tiranës.
Leksioni u zhvillua në formë interaktive me maturantët e gjimnazit "Sinan Tafaj" që ishin të pranishëm. Pas leksionit u zhvillua një vizitë në Muzeun Arkeologjik me guidë të plotë spjeguese nga ciceronia e këtij Muzeu, znj. Gema Kraja.
Shpërndaje