Përfundon programi i praktikave të punës për 47 vajza dhe djem në Bashkinë e Tiranës

Studentët që kryejnë praktikën e punës në Bashkinë e Tiranës do të marrin edhe një pagesë. Në fjalën e mbajtur në certifikimin e 47 vajzave dhe djemve, të cilët përfunduan me sukses praktikën në Bashkinë e Tiranës, kryebashkiaku Erion Veliaj tha se periudha e intershipit do të zgjatet nga 3 në 6 muaj, duke shtuar këtu edhe një pagesë për orët e punës.

“Ka ardhur momenti të mendojmë jo vetëm zgjatjen e praktikave, por edhe për një pagesë. Kemi filluar një projekt për studentët praktikantë që zhvillojnë internshipet në kompani private, por jemi të gatshëm që ta bëjmë këtë edhe për praktikat në Bashkinë e Tiranës, për t’u siguruar që përveç përzgjedhjes rigoroze, të kenë një kompensim, qoftë edhe për paratë e xhepit, që të jetë më e lehtë për gjeneratën tjetër të studentëve që do të vijë”, deklaroi Veliaj.

Si nismëtar i projektit të praktikave të punës në institucionet publike dhe private që në kohën kur ishte ministër në Ministrinë e Mirëqenies Sociale dhe Rinisë, Veliaj shtoi se kjo ide, e cila 5 vite më parë dukej e paimagjinueshme, ka dhënë rezultatet e para të suksesshme dhe inkurajoi edhe bashkitë e tjera që ta mbështesin si projekt, sepse u jep të rinjve dhe të rejave eksperiencë për të filluar punë. “Fakti që projekti po funksionon është një lajm shumë i mirë. Më vjen mirë që Bashkia e Tiranës mban barrën më të madhe të praktikave. Por, doja të inkurajoja edhe bashkitë e tjera”, tha Veliaj, duke përgëzuar të rinjtë që zgjodhën të kryejnë praktikën në Bashkinë e Tiranës.

Ai u shpreh se programi i praktikave për çdo të ri dhe të re që është bërë pjesë e tyre ka qenë një mundësi shumë e mirë, jo vetëm për të patur një përvojë pune, por edhe për të parë vërtetë se si punon Bashkia e Tiranës. “Kur bashkohesh me ekipin e skuadrës së Tiranës, ke zgjedhur që të lësh shkallët e stadiumit, kafenetë, llogjet e muhabetet, ku të gjithë bëjnë gjithollogun, dhe hyn në fushë, aty ku realisht bëhet beteja, ku merren vendimet”, iu drejtua Veliaj të rinjve.

Kryebashkiaku inkurajoi praktikantët që të krijojnë një grup të tyren, pasi kështu jo vetëm do mund të kenë mundësi të dëgjohen më shumë, ndërsa shtoi se për secilin prej tyre ka bërë nga një rekomandim që mund ta paraqesin te çdo punëdhënës. “Nëse do të krijoni një klub të atyre që janë diplomuar nga ky projekt, do të kishim interes që ta fuqizonim, t’ju mblidhnim herë pas herë, t’ju këshillonim nëse keni nevojë për rekomandim. Unë kam pranuar që të shkruaj personalisht rekomandimin për secilin prej jush, duke theksuar që do jenë me fat ata që do ju marrin në punë afatgjatë”, tha Veliaj.

Ai iu përgjigj edhe ndonjë komenti lidhur me projektet e Bashkisë së Tiranës, si sheshi “Skënderbej”. “Në një vend ku histeria është sport kombëtar dhe çdo gjë trajtohet me histeri kemi nevojë për njerëz të pjekur, të qetë, të matur, të mençur, që të kuptojnë si funksionon procese dhe të mundohen sa kanë mundësi ta shtyjnë përpara punën. Edhe kur vë ca stola, kthehet në debat të madh kombëtar. Kjo sigurisht meriton vëmendje dhe sqarim, por është diçka fantastike, e bukur, sepse është ndoshta nga të paktat punë ku çdo gjë vihet re, çdo gjë bëhet pjesë e debatit, është e hapur për diskutim, dhe padyshim është një nga punët më të bukura në botë, jo vetëm në Shqipëri”, tha ai.

Ndërkohë, kreu i Bashkisë ftoi të rinjtë dhe të rejat që t’i bashkohen aksionit për mbjelljen e pemëve të reja që do të jenë kurora e gjelbër e kryeqytetit. Deri më tani ky numër ka arritur në mbi 82 mijë, shumë pranë rekordit për 100 mijë pemë të reja. “Nëse njerëzit ndihen pjesë, nëse çdo fëmijë që ka ditëlindjen, nëse çdo çift që martohet, nëse çdo përkujtimore dhe përvjetorë, nëse çdo komunitet, nëse çdo lagje çdo pallat, na bashkohet në aksion, do ta arrijmë rekordin tonë për 100 mijë pemë”, përfundoi Veliaj.

Bashkia e Tiranës zhvillon prej tre vitesh projektin e praktikave mësimore dhe të punës me studentë që dëshirojnë të fitojnë eksperiencë konkrete, përpara se të gjejnë një punë nesër.