Përfundon rehabilitimi i Lumit Tirana dhe hapet segmenti i dytë i Bulevardit të Ri

Bregu i Lumit, një nga zonat që përmbytej thuajse sa herë që binte shi, për herë të parë këtë vit i shpëtoi kësaj problematike. Kjo falë investimit të Bashkisë së Tiranës, e cila përfundoi projektin e rehabilitmit të plotë të të gjithë Lumit Tirana. Kryeministri Edi Rama dhe kryetari i Bashkisë së Tiranës, Erion Veliaj përuruan përfundimin e punimeve të këtij investimi të rëndësishëm, që i jep zgjidhje një problematike që ishte kthyer në shqetësim të vazhdueshëm për gjithë banorët e zonës, si dhe inspektuan përfundimin e punimeve të segmentit të dytë të Bulevardit të Ri, projektit më transformues të kryeqytetit.

Duke vlerësuar ndryshimin që ka pësuar e gjithë kjo zonë falë këtyre dy projekteve, kryeministri Rama tha se Tirana do të ketë një sipërfaqe të gjelbër të krahasueshme për nga përmasat me Parkun e Liqenit. “Jo vetëm që kemi një aks të ri ekologjik në vijën e lumit të Tiranës, jo vetëm me kryerjen e këtyre punimeve krijohet një mundësi e re qarkullimi për banorët, por së shpejti do të marrë jetë dhe një park i ri qëndror dhe gjithë volumi i hapësirës së gjelbëruar dhe i atraksioneve të një parku, një volum plotësisht i krahasueshëm me atë që sot është Parku ekzistues i Liqenit të Tiranës”, shtoi Rama .

Kryeministri vlerësoi përkushtimin e Bashkisë së Tiranës dhe të kryebashkiakut Veliaj për t’i dhënë edhe kësaj pjese të Tiranës zhvillimin e duhur dhe për ta kthyer atë në një nga zonat më të transformuara të qytetit. “Sikur ky bulevard të ndërtohej me ritmet që përcaktuan ecurinë e tij në katër vitet para zgjedhjes së Erionit në krye të bashkisë do të duheshin 60 vjet për të arritur këtu ku jemi sot dhe mbase dhe 30 vjet të tjera për të shkuar aty ku faktikisht do të shkojmë deri në fund të vitit të ardhshëm. E gjitha kjo sepse kemi organizuar një punë të përbashkët. Jemi koordinuar më së miri dhe është bërë e mundur sinergjia e të gjithë aktorëve dhe faktorëve, ku padyshim mbetet e çmuar prania e Fondit të Abu Dabit”, nënvizoi Rama.

Kryeministri theksoi se bashkë me kryebashkiakun Veliaj do të bëhet shumë me tepër se sa është bërë në këto tre vite, duke siguruar për realizimin e një sërë investimesh të rëndësishme për përmirësimin e cilësisë së jetës për qytetarët e Tiranës. “Së bashku me projektet e qeverisë për Tiranën, me një sërë projektesh që shpresojmë të financohen me partnerët, na jep mundësi që të themi jo vetëm në këtë mandat të kryetarit të Bashkisë së Tiranës do të bëjmë shumë tepër se çfarë është bërë në shumë vite sëbashku, por në mandatin e ri qeverisës do të bëjmë me siguri, me kryetarin e bashkisë dhe me Bashkinë e Tiranës, shumë më tepër se sa është bërë në këto tre vite të Bashkisë së Tiranës”, theksoi Rama.

Kryetari i Bashkisë së Tiranës, Erion Veliaj, u shpreh i kënaqur që me këto dy projekte një nga zonat, deri para pak kohësh, më pak të pëlqyerat e Tiranës, ka marrë një tjetër zhvillim dhe vlerë, duke u kthyer tashmë në pjesët më të pëlqyera jo vetëm për bizneset, por edhe për përfaqësitë e huaja. “Ashtu siç kemi punuar me të njëjtën cilësi në sheshin “Skënderbej”, te Pazari i Ri, te parku i Liqenit apo dhjetëra projekte anembanë Tiranës, sot jemi në fazën e dytë të projektit të Bulevardit të Ri, shumë pranë Bregu të Lumit, ndërkohë që mund të themi me gojën plot se kemi përfunduar me sukses rehabilitimin e Lumit të Tiranës, një gangrenë disavjeçare prej përmbytjeve. Lajmi më i mirë është për njësitë 4, 8 dhe 9 të cilat e prisnin stinën e reshjeve dhe të shirave me dorë në zemër dhe me një frikë të madhe që uji do të pushtonte banesat e tyre dhe sot më vjen mirë që ky është një problem që tingëllon si përrallë nga e kaluara dhe më në fund kemi një sistemim 8.3 km të Lumit të Tiranës në një mënyrë totalisht të modernizuar nga Kafja e Rremës deri te Ura e Kamzës”, tha Veliaj.

Por jo vetëm kaq, kryebashkiaku bëri të ditur se tashmë ky projekt do të pasurohet edhe me një sërë investimesh që do ta bëjnë gjithë këtë zonë rekreative për banorët. “Lumi i Tiranës për herë të parë nuk është vetëm një projekt rehabilitimi infrastrukturor, por më në fund është kthyer në një park linear. Sot kemi mbjellë vetëm në lumin e Tiranës 4 mijë pemë, 20 mijë shkurre, 8.5 km shtigje dhe për të gjithë ata që janë të ngazëllyer nga transformimi i bregut jugor të Liqenit të Tiranës dhe hapësirave sportive atje për këmbësorë, për biçikleta dhe për vrapues, ju them që nuk keni parë gjë akoma kur të shikoni se si do të transformohet Lumi i Tiranës në ndoshta hapësirën tjetër më të madhe rekreative për të gjithë banorët e Tiranës veriore në lagjen 4,8 dhe 9”, tha Veliaj.

Sa i përket Bulevardit të Ri, kryetari i Bashkisë së Tiranës në fjalën e tij theksoi se Tirana me këtë projekt dyfishon shtyllën e saj kurrizore, ndërsa kryeqyteti themelon një lagje të re, e cila do jetë në gjendje që për 30 vitet e ardhshme të mund të akomodojë një numër të madh banorësh. “Sot mund të themi plotësisht që po themelojmë lagjen e parë, ku e gjithë infrastruktura dhe në fakt ka më shumë punë nën tokë se sa mbi tokë, çfarë mund të shikojë syri i njeriut, për herë të parë kemi ndërtuar një shtyllë kurrizore, kemi konceptuar të gjitha blloqet. Në fund të këtij muaj zbardhet PDV-ja e gjithë lagjes së Bulevardit të Ri që besojmë do të strehojë deri në 100 mijë persona deri në fund të vitit 2050. Më në fund kemi një valvul shkarkimi, kemi një lagje të re e cila do themelohet mbarë, duke filluar nga ky Bulevard që është aksi kryesor dhe duke vazhduar me të gjitha kuartallat në të majtë dhe të djathtë të këtij bulevardi”, tha Veliaj.

Kryebashkiaku theksoi se me përfundimin e rrugës “Siri Kodra” Bulevardi i Ri do të bëhet funksional edhe për makinat dhe i shfrytëzueshëm për transport. “Ne do të fillojmë zhvillimin e kësaj lagje, dhe më vjen mirë që ka rreth 4 ambasada të cilat gjithashtu po konsiderojnë transferimin në këtë lagje të re të Tiranës, duke qenë se plani i qeverisë Rama është që të vazhdojmë me Unazën e Pestë, mbas kurrizit tonë e cila do ta bënte jo vetëm daljen dhe hyrjen nga Tirana nëpërmjet këtij bulevardi shumë të thjeshtë por lidhjen me rrugën e Rinasit dhe aeroportin. Në fund të verës ne do të hapim rrugën “Siri Kodra”, e cila do ti lidhi të dyja njësitë, si Njësinë 8 ashtu dhe Njësinë 9 mes përmes bulevardit. Dhe sot teksa bulevardi ka kryesisht një funksion rekreativ për qytetarët e zonës, me hapjen e rrugës do të ketë dhe funksionin primar të vetin atë të transportit dhe pastaj do vazhdojë dhe zhvillimi në të dyja krahët e bulevardit”, shtoi kryebashkiaku.