Shpërndaje
Rreth 1 mijë nxënësit e shkollës 9 vjeçare “1 Maji” morën një surprizë të bukur në ditën e parë të shkollës. Godina ku ata do të mësojnë përgjatë vitit shkollor jo vetëm ka një pamje krejt të re, por edhe klasat ku do të kalojnë orët e mësimit ofrojnë kushte më të mira të mësimdhënies, si dhe kanë një palestër të re. Bashkia e Tiranës mbajti premtimin dhe ka mundur të përfundojë në kohë rekord rikonstruksionin e plotë të shkollës “1 Maji”, në mënyrë që të ishte gati sot për nisjen e vitit të ri arsimor.
Ambientet e rinovuara të kësaj shkolle u përuruan sot nga kryetari i Bashkisë së Tiranës, Erion Veliaj, ministri i Punëve të Jashtme, Ditmir Bushati dhe zëvendësministrja e Arsimit dhe Sportit, Nora Malaj, të cilët pasi kanë parë nga afër kushtet e shkollës, uruan fëmijët suksese në vitin e ri shkollor. Kryebashkiaku Veliaj theksoi se viti i parë i mandatit të bashkisë iu kushtua tërësisht më të vegjëlve të qytetit. “Ky ka qenë një vit me fokus te fëmijët, me çerdhet, kopshtet dhe shkollat. Nëse në familjet tona fëmijët janë gjëja më e shtrenjtë, atëherë pse jo në qytetin tonë, në këtë familje të madhe, të mos jenë fëmijët të parët. Besoj se e kemi treguar me vepra që kështu ecim përpara”, tha Veliaj, duke iu referuar punës që ka bërë bashkia për të përmirësuar infrastrukturën arsimore.
Ai bëri të ditur se veç kësaj shkolle, gjatë verës bashkia ka ndërhyrë për të riparuar rreth 200 shkolla, ndërsa siguroi se një pjesë e tyre kanë ambiente dhe terrene sportive të shtuara. “Më vjen mirë që këtë vit, jo vetëm riparuam shkollat, por disa nga shkollat më problematike të Tiranës, si “1 Maji”, “Emin Duraku”, “Fan Noli” janë totalisht të rikonstruktuara. Ndërkohë kemi hapur themelet për shkolla të reja; sapo janë hedhur themelet te “Betim Muço” në Kombinat, te “Hoxha Tahsin” po përfundojnë themelet për palestrën, dhe do të fillojmë punën për ndërtimin e 16 shkollave të tjera. Në fund të mandatit do të kemi 20 shkolla të reja për të zgjidhur një herë e mirë çështjen e shkollave me dy turne. Është jo-njerëzore, është mungesë vizioni që ne kemi menduar për gjithçka për të rriturit përveçse për fëmijët”, theksoi Veliaj. Ai shtoi se falë ndërhyrjeve të bëra që në këtë vit të parë, por edhe me riorganizimin e nxënësve, është bërë e mundur që të shmanget mësimi në turne në pjesën më të madhe të shkollave të kryeqytetit.
“Më vjen mirë që, në koordinim me Drejtorinë Arsimore Rajonale, ky do të jetë viti i parë ku vetëm 2-3 gjimnaze do ta kenë mësimin me dy turne. Shkollës “Qemal Stafa” i është rritur kapaciteti, që do të thotë se tani funksionon me një turn. Do të vazhdojmë me këtë ritëm”, tha kryetari i bashkisë. Veliaj falenderoi edhe komunitetin e prindërve që e kanë mirëkuptuar dhe mbështetur punën e bërë nga bashkia, si në drejtim të çerdheve dhe kopshteve, ashtu edhe të shkollave. “Prindërit s’kanë detyrë të kuptojnë politikën dhe të kuptojnë kush i la gjërat pa bërë, kjo nuk është puna e tyre, por i falenderoj shumë për kurajën që na kanë dhënë, për fjalët frymëzuese, sepse besoj se secili meriton një fjalë të mirë për t’u siguruar që çdo shkollë të ishte në një performancë dinjitoze me pritshmëritë tona”, u shpreh Veliaj, teksa shtoi se është e rëndësishme që këto investime të mirëmbahen.
Ai theksoi se pavarësisht fluksit të shtuar të lëvizjeve që zakonisht ndodh me nisjen e vitit të ri shkollor, trafiku në kryeqytet ka qenë i menaxhueshëm dhe mbi të gjitha, punimet që po kryhen në Sheshin “Skënderbej” nuk sollën shtimin e tij. “Sot kemi pasur një ditë relativisht të mirë, pavarësisht se prisnim një trafik më të rënduar. Por puna ka qenë e mirë, kemi pasur edhe vullnetarë nëpër kryqëzime që kanë ndihmuar fëmijët të kalojnë rrugën. Besoj se, sot nuk e ka humbur njeri orën e parë të mësimit. Sigurisht që ditët dhe javët e para marrin pak kohë sepse njerëzit kthehen nga pushimet, shtohet fluksi i makinave. Megjithatë, prova e parë gjenerale shkoi me sukses, sheshi “Skënderbej” nuk u bllokua dhe besoj se me pak mirëkuptim nga të gjithë, si një familje që po rregullojmë një shtëpi, i biem anës së pjesës së shtëpisë që po rregullohet, kështu edhe kur rregullojmë Tiranën mundohemi të gjejmë mënyra alternative”, tha Veliaj.
Ndërkohë, ministri Bushati teksa falenderoi Bashkinë e Tiranës për vëmendjen që i ka kushtuar çerdheve, kopshteve dhe shkollave, theksoi se ky është investimi më i mirë që mund të bëhet në një shoqëri. “Unë e di situatën për shkak të prezencës politike që kam në këtë zonë. Kjo shkollë është rikonstruktuar totalisht. E kemi thënë edhe herë të tjera se ky është investimi më i mirë për gjeneratën dhe brezat e ardhshëm. Faleminderit të gjithë prindërve për durimin e treguar gjatë kohës që shkolla ishte në rikonstruksion, janë detyruar që t’i çojnë fëmijët në shkolla të tjera. Falënderoj nga zemra stafin e përkushtuar të shkollës, të cilët janë po aq të lumtur sa prindërit dhe të gjithë ne, për këtë investim fantastik”, deklaroi Bushati.
Rikonstruksioni i shkollës “1 Maji” përfshiu krijimin e ambienteve të reja sanitare, palestrës, zëvendësimin e dyerve dhe dritareve, rikonstruksionin e sistemit elektrik, të furnizimit me ujë dhe kanalizimeve, por edhe të sistemit të ngrohjes dhe rrjetin kundra zjarrit.
Shpërndaje