Plani vjetor Bashkia Tiranë - Viti 2023

Misioni i Bashkisë Tiranë (BT) është garantimi i një qeverisje të drejtë dhe efikase me qytetarët, duke njohur dhe respektuar ekzistencën e identiteteve dhe vlerave të ndryshme të komunitetit, respektimin e të drejtave dhe lirive themelore të tyre, duke përkrahur dhe siguruar mirëqenie e duke promovuar standarde bashkëkohore në ofrimin e shërbimeve, mjedis të shëndetshëm, vlera të larta të bashkëjetesës komunitare dhe një ndjenjë të pronësisë/zotërimit mes banorëve mbi të mirat publike.

Për të përmbushur këtë mision Bashkia Tiranë, Drejtoria e Përgjithshme e Integrimit, Planifikimit Strategjik dhe Zhvillimit Ekonomik ka hartuar Planin vjetor të Bashkisë Tiranë për vitin 2023 (PVBT). Ky dokument shpalos objektivat dhe prioritetet e institucionit në mënyrë të hollësishme ku për çdo drejtori të përgjithshme janë përcaktuar objektivat dhe projektet/aktivitetet që do të zhvillohen përgjatë vitit. Mbështetur tek detyrat dhe misionet që ka çdo drejtori, janë përcaktuar indikatorët që do të shërbejnë për matjen e realizimit të këtij plani.

PVBT 2023 përcakton në mënyrë të hollësishme të gjithë veprimet që duhen ndërmarrë për të arritur objektivat dhe prioritetet strategjike. Ky dokument është hartuar sipas:

I. Funksioneve, kompetencave dhe detyrave të përcaktuara nga kuadri ligjor;
II. Rregullores për organizimin, funksionimin, detyrat dhe kompetencat e administratës së Bashkisë Tiranë;
III. Planeve të drejtorive të Aparatit Qendror;
IV. Buxhetit për vitin 2023 të miratuar në Këshill Bashkiak.

Në këtë dokument janë përcaktuar prioritetet e aparatit të Bashkisë Tiran për vitin 2023, detajuar në objektiva, projekte/aktivitete dhe indikatorë të monitorueshëm për të gjitha drejtoritë përkatëse. Hartimi dhe ekzekutimi i këtij plani do të japë një kontribut jo vetëm në përmbushjen e prioriteteve dhe synimeve që ka Bashkia Tiranë për vitin 2023, por gjithashtu do të lehtësojë bashkëpunimin mes strukturave, si edhe do të përmirësojë procesin e transparencës me qytetarët, këta të fundit përfitues të drejtpërdrejtë nga përmbushja e këtyre objektivave.