Prezantohet projekti i rijetëzimit të Piramidës në një qendër të madhe të teknologjisë

Nga një relike e së shkuarës, Piramida e Tiranës do t’i kthehet kryeqytetit si një tjetër xhevahir i çmuar, e shndërruar në qendrën më të madhe invoacionit dhe zhvillimit të inteligjencës artificiale në rajon. Në prani të kryeministrit Edi Rama, kryetarit të Bashkisë së Tiranës, Erion Veliaj, kreut të AADF-së, Michael Granoff, u prezantua sot projekti final i rijetëzimit të një prej godinave ikonë të Tiranës, i realizuar nga arkitekti me famë botërore, Winy Mass, i cili e kthen atë në qendrën më të madhe ICT në rajon për aftësimin e të rinjve me njohuri në kodim dhe teknologjinë e informacionit.

Kryeministri Edi Rama vlerësoi projektin dhe theksoi se ai do ta kthejë Tiranën në një pikë referimi jo vetëm për Ballkanin, por edhe më gjerë. “Më rezulton se jemi vendi i tretë që e përqafojmë këtë model, e sigurisht në këtë konfiguracion nuk mund të mungojë Lali Eri dhe ambicia e tij për ta bërë gati këtë godinë për Samitin Digjital të vitit të ardhshëm. Kjo godinë, për shkak jo thjesht arkitekturës, por edhe të programit që do përmbajë, mund të jetë në të ardhmen një pikë referimi jo vetëm në rajon, por edhe më gjerë, se si një shoqëri dhe një vend i vogël pa shumë fuqi i drejtohet botës së re digjitale dhe ndërton një shembull që ka impakt global, për nga mënyra e afrimit te e reja dhe e të rinjve drejt kësaj bote”, tha Rama.

Kreu i qeverisë shtoi se përmes këtij projekti zgjidhet edhe një dilemë torturuese për vite të tëra në mes të Tiranës, që do rilindë në një potencial të jashtëzakonshëm. “Duke i falenderuar të gjithë për punën e bërë deri tani, sepse na jep mundësi të zgjidhim një dilemë shumë torturuese për vite të tëra, një varr i hapur në mes të Tiranës, një godinë me barrë të rëndë historie dhe trashëgimie, por dhe me potencial të jashtëzakonshëm për të rilindur, që rilind falë këtij ekipi, e nuk diskutohet edhe falë fuqisë së imagjinatës dhe dorës mjeshtërore të Winy Mass-it, që unë pretendoj se e kam karakterizuar më mirë nga të gjithë ata që kanë shkruar për të, kritikë të famshëm: një rrobaqepës i pagabueshëm ëndrrash. Më vjen shumë mirë që më në fund ia kemi dalë që të zgjidhim një dilemë që na ka munduar tani prej 30 vjetësh me këtë godinë”, theksoi Rama.

Në fjalën e tij, kreu i Bashkisë së Tiranës, Erion Veliaj tha se nisja e këtij projekti është fillimi i realizimit të një ëndrre për të gjithë të rinjtë shqiptarë. “A do jemi gjithmonë çentralistët e botës në call-center, edhe pse ajo është një punë shumë e nderuar? A do jemi gjithmonë fasonët e botës, për këpucë dhe t-shirt, edhe pse është një punë shumë e nderuar? Apo mund të fillojmë sot një ëndërr se si një gocë, një Zana ose një Mira që rritet në Tiranë ose nga qytete të tjera të Shqipërisë, t’i ketë fillimet e veta në këtë hapësirë? Nëse fillojmë ta vizatojmë këtë ëndërr, atëherë mund t’ia arrijmë këtij projekti. Por, nëse për ne kjo është thjesht puna tjetër e infrastrukturës, atëherë nuk kemi kuptuar asgjë”, tha Veliaj.

Ai theksoi se për këtë projekt janë bërë bashkë të gjithë faktorët për ta shndërruar atë në një tjetër histori suksesi në Tiranë, pas sheshit “Skënderbej” dhe Pazarit të Ri. “I kemi të gjithë përbërësit për një tjetër histori suksesi: Mbaj mend që Pazarin e Ri e bëmë për 7 muaj - vërtet morëm një vit ta konceptonim, por mbaroi për 7 muaj. Sheshi mori 10 vite të konceptohej, por mbaroi për më pak se një vit. Unë besoj se kur ne shqiptarët bashkëpunojmë, kur nuk i vëmë stërkëmbësha njëri-tjetrit, mund të bëjmë mrekulli. Jam i bindur se Piramida, jo vetëm nga ana arkitekturore, do të jetë një tjetër mrekulli e një muzeu shëtitës, siç po kthehet sot Tirana, por do të jetë ndoshta epiqendra më kreative për të rinjtë shqiptarë, që duan të marrin këtë shkollim alternativ”, u shpreh Veliaj.

Ndërkohë, sa i përket kalendarit të punimeve, Veliaj bëri të ditur se në dy muajt e ardhshëm do të finalizojmë detajet dhe skicat finale dhe për të vazhduar më pas me pastrimin dhe heqjen e të gjitha objekteve të tepërta dhe për të filluar punën.

Kryetari i Bordit të Drejtorëve të Fondacionit Shqiptaro-Amerikan të Zhvillimit, Michael Granoff, vlerësoi bashkëpunimin me qeverinë shqiptare dhe me Bashkinë e Tiranës, duke krijuar një mundësi unike për të rinjtë shqiptarë. Ai shprehu besimin se sikurse projektet e mëparshme, edhe ky investim i ri do të jetë një histori suksesi.

“Kemi pasur mundësi të krijojmë projekte kaq të suksesshme. Dimë se çfarë duhet bërë për të sjellë ndryshime revolucionare, për të përmbushur njerëzit dhe aspiratat e tyre. Duam ta kthejmë jo vetëm në një element të gjithë shqiptarëve, por të brezit të ardhshëm. Jam i bindur se kur të takohemi në muajt e ardhshëm do t’u ofrojmë shqiptarëve diçka që do të jetë vërtet revolucionare, jo vetëm për të përmbushur aspiratat e tyre, por edhe për të konkurruar në botë”, tha Michael Granoff.

Projekti i rivitalizimit të Piramidës së Tiranës synon transformimin e saj në një qendër multifunksionale në qytet, duke siguruar hapësirë për të rinjtë dhe njerëzit që të angazhohen në art, kulturë dhe teknologji krijuese. Plani synon të krijojë simbolin e ri për Tiranën, ku ndërtesa është e arritshme nga të gjitha anët. Risia e rivitalizimit të qendrës qëndron në faktin se TUMO është një lloj i ri i përvojës arsimore në kryqëzimin e teknologjisë dhe dizajnit. Të rinjve do t'u jepen veglat dhe njohuritë që kanë nevojë për të arritur potencialin e tyre dhe ata do të jenë në gjendje të krijojnë rrugën e tyre të të mësuarit. TUMO i ndihmon këta fëmijë të fuqizojnë kreativitetin e tyre dhe i mbyllin ato me aftësitë e shekullit 21 dhe i përgatit ato për punë globale në të ardhmen.

Programet që do të ofrohen nga TUMO janë:
- Animation
- Zhvillimi i Lojërave
- kinematografia
- Web Design
- Music
- Shkrimi
- Vizatim
- Dizajn Grafik
- Modelimi 3D
- Programim
- Robotics
- Grafika e lëvizjes
- Fotografi
- Media e re