Projekti ‘’Rrjeti i Autoriteteve Lokale për Migracionin dhe Zhvillimin në Mesdhe, Integrimi i Migracionit në Zhvillim”

Projekti ‘’Rrjeti i Autoriteteve Lokale për Migracionin dhe Zhvillimin në Mesdhe, Integrimi i Migracionit në Zhvillim”, ka si synim të promovojë bashkëpunimin midis Bashkive të Tiranës, Milanos dhe Bolonjës, në lidhje me integrimin e migrimit në nivel lokal, nëpërmjet shkëmbimit të praktikave më të mira dhe pilotimit të veprimeve përkatëse. Ky projekt i IOM i financuar nga Ministria Italiane e Punëve të Jashtme, me mbështetjen e Organizatës Italiane CeSPI, është implementuar nga Bashkia Tiranë dhe Instituti për Bashkëpunim dhe Zhvillim (CDI).

Projekti bazohet në dy shtylla që janë si më poshtë,  

    • krijimi i një rrjeti të bashkive aktive në lidhje me integrimin e migracionit, si dhe
    • integrimi i migrimit në planet zhvillimore vendore të bashkive të përfshira. 

Në këtë kontekst, Bashkia Tiranë në bashkëpunim me Institutin për Bashkëpunim dhe Zhvillim kanë zhvilluar një Udhërrëfyes (Roadmap), aktivitetet e të cilit kanë për qëllim të udhëzojnë Bashkinë drejt realizimit të kompetencave vendore lidhur me migracionin. Përmes këtij Udhërrëfyesi (Roadmap), Bashkia Tiranë arrin të tregojë në mënyrë të qartë hapat konkretë që duhet të ndërmarrë në drejtim të planifikimit të politikave, në mënyrë që të zbatojë plotësisht kompetencat e reja në territorin përkatës. Në kuadër të Udhërrëfyesit, u realizuan produktet finale si vijon:

(a) Working Paper, një dokument që shpjegon në mënyrë të detajuar situatën aktuale në fushën e migrimit në Shqipëri, kompetencat lokale dhe bashkëpunimin ndërinstitucional qendror-vendor, si dhe jep rekomandime të qarta për Bashkinë për implementim;

(b) Fushatë komunikimi, e cila kishte si qëllim që të njoftojë audiencën rreth kompetencave lokale në këtë fushë dhe të ndërgjegjësojë në njohjen e emigrantëve si agjentë zhvillimi e kontribues të rëndësishëm në zhvillimin ekonomik, social dhe kulturor.

Dy momente shumë të rëndësishme përgjatë këtij projekti, kanë qenë Worshopet e realizuara, të cilat kanë shërbyer për komunikimin ndër institucional dhe integrimin e perspektivave institucionale, lokale dhe elementit rinor në procesin e implementimit. 

Workshopi i parë me temë "Drejt bashkëpunimit ndërinstitucional në fushën e migracionit" i cili është mbajtur në 11 Qershor 2021, ka pasur për qëllim fillimin e dialogut mes institucioneve qendrore dhe lokale, si dhe identifikimin e hapave konkretë që mund të zbatohen nga Bashkia e Tiranës, si rezultat i ndryshimeve ligjore në këtë fushë. 

Workshopi i dytë me temë ‘’Identifikimi i hapave për implementimin e kompetencave lokale në çështjet e migrimit’’, i mbajtur në 30 Qershor 2021, kishte për qëllim që të diskutohej mbi informacionet e mbledhura nga kërkimet e ekspertëve të përfshirë, si dhe finalizimi i rekomandimeve për Bashkinë e Tiranës. Një aspekt shumë i rëndësishëm i trajtuar në këtë workshop ishte edhe integrimi i elementit rinor gjatë implementimit të projektit. Duke qenë se Tirana ka fituar titullin European Youth Capital 2022, një sërë aktivitetesh që do të zhvillohen nga Kongresi Rinor Kombëtar do të kenë fokus të rinjtë migrantë dhe nga diaspora ashtu që të arrihet integrimi sa më i mirë në shoqëri/komunitet. 

Me finalizimin e Working Paper dhe Strategjisë së Komunikimit, Bashkisë Tiranë i është hapur rruga për nisjen e një procesi implementues efikas i cili arrin të jetë gjithëpërfshirës dhe në harmoni me të gjitha institucionet dhe aktorët e përfshirë në fushën e migrimit dhe diasporës në Shqipëri.

Gjatë këtij studimi si dhe duke qenë se Migracioni dhe Diaspora në vetvete janë procese komplekse, rekomandimet për këtë fushë përfshijnë shumë institucione, si dhe hapa që duhen të ndiqen  nga Bashkia e Tiranës, sic janë: ngritja dhe funksionimi i Strukturës përgjegjëse për Diasporën dhe Migracionin në Bashkinë e Tiranës siç parashikohet në ligjin nr.38/2019, bashkëpunim-institucional dhe ngritja e rrjetit të komunikimit mes institucioneve dhe aktorëve të përfshirë në çështjet e migracionit, hartimi i një Plani Veprimi Vendor për Migracionin, integrimi i migracionit si pjesë përbërëse e dokumenteve strategjike dhe sektoriale të Bashkisë, krijimi i platformave elektronike për informim, si dhe rritja e ndërgjegjësimit publik lidhur me grupet migratore .