Promovohet libri "Çfarë ka qenë Tirona"

Libri me titull “Çfarë ka qenë Tirona”, i gazetares Rezarta Delisula, i financuar nga Bashkia e Tiranës, u promovua në  qendrën Reja, në prani të Kryetarit të Bashkisë së Tiranës, Erion Veliaj dhe të Prefektit të Tiranës Afrim Qendro. Merrnin pjesë gjithashtu  gazetarë, historianë dhe qytetarë.
“Çfarë ka qenë Tirona” është një botim dokumentar për historinë e Tiranës, me dokumente që dalin nga arkivat osmane për herë të parë e që kanë vlerë të padiskutueshme në historinë e kryeqytetit. Të përfshira në botim janë dokumentet, kur kazaja e Elbasanit shkëputet nga varësia administrative e Prizrenit dhe fiton një lloj pavarësie, kazaja e Matit vazhdon të jetë më vete dhe kërkohet ndërhyrja ushtarake për mosbindje, dokumenti i Shëngjergjit për t’u quajtur nahie më vete. Zbulohen dokumente të rëndësishme për luftën mes pashallarëve shqiptarë dhe shkushmërinë mes tyre, eliminimin e Mahmud Pashë Bushatlliut dhe mënyrën si u bënin emërimet apo propozimet për emërime. Një tjetër dokument me rëndësi është zbulimi i minierës së Krrabës me një potencial të madh qymyrguri, por të shfrytëzuar vetëm në kohën e austro-hungarezëve. Në botim gjendet një dokument unikal, ku Sami bej Vrioni, i martuar me një ndër tri vajzat e Esat Pashë Toptanit kërkon në emër të bashkëshortes një shumë që duhet të përfitonte nga shitja e sendeve me vlerë të vjehrrit të tij, një nga profilet e rralla të parisë së Tiranës. Përmes dokumenteve do të shohim se si funksiononte sistemi financiar, me çfarë tregtie merreshin tironasit e hershëm, si ka qenë bashkëjetesa fetare mes komuniteteve, si organizohej Paria e Qytetit, investimet dhe arsimi si dhe një pjesë të funksionimit të sistemit gjyqësor, si kopja e deponimit të Gani Toptanit, i akuzuar si bashkëpunëtor i Greqisë për nxitjen e revolucionit antiosman në Shqipëri. Një kapitull të rëndësishëm në libër zë një regjistër i gjendjes civile të vitit 1849, si dhe një tjetër regjistër i viteve 1895-1896 për Tiranën e fshatrat përreth, ku shënohen me detaje të lindurit, të martuarit, divorcuarit, të vdekurit, ushtarët si dhe një kategorizim të familjeve jomyslimane dhe komuniteteve egjiptiane e rome. Në botim përcillen përmes dokumenteve osmane, kontributi i popullsisë tiranse në ndërtimin e institucioneve arsimore, si dhe detaje e kuriozitete të panjohura më parë mbi funksionimin e qytetit e qytetarëve. Të gjitha dokumentet përkthyer në gjuhën osmane gjenden të grupuara në fund të këtij botimi, që është në vazhdën e botimeve për historinë e qytetit dhe përpjekjeve për të treguar të shkuarën e tironasve, këtyre njerëzve të mençur dhe bujarë.
Rezarta Delisula me një eksperiencë të gjatë në media, publikoi në dhjetor të 2018 librin e saj të parë ”Tirana Mahnia”,  një guidë historike, etnografike e zakonore e kryeqytetit, për të cilin u vlerësua me çmimin “Mirënjohja e qytetit”, akorduar nga Bashkia e Tiranës.