Rilind shkolla “Kosova”

Pak vite më parë, shkolla 4-vjeçare “Kosova” ishte përcaktuar për t’u bërë pallat. Pas shkatërrimit, për disa vjet shërbeu si një parking makinash. Por sot, shkolla simbol e historisë së Tiranës, çeli dyert e së ardhmes për fëmijët, jo vetëm si shkolla më e bukur në Shqipëri, por edhe me një kapacitet tre herë më të madh së më parë, e tashmë si 9-vjeçare.

Për të uruar nxënësit dhe stafin e mësuesve, në ditën e parë të vitit të ri shkollor, ishte i pranishëm Kryeministri Edi Rama, Ministrja e Arsimit, Sportit dhe Rinisë, Lindita Nikolla, kryetari i Bashkisë së Tiranës, Erion Veliaj, anëtarë të kabinetit qeveritar dhe deputetë. Në fjalën e tij, kryeministri Rama deklaroi se mori fund kalvari i një lufte afro pesëmbëdhjetë vjeçare, me ata që e dogjën dhe që donin ta kthenin këndin historik të shkollës “Kosova” në pallat.

“Në këtë truall u ngatërruan të gjitha së bashku, nga babëzia e deri te korrupsioni i gjykatave. Shkolla u dogj dhe trualli u kthye në mënyrë krejtësisht të paligjshme. Më pas u prenë pishat dhe territori u kthye në parkim. Nga të katër anët u bë çmos për të marrë lejen e pallatit, që do kishte zënë përfundimisht këtë kënd historik të arsimit të Tiranës. Pastaj, administrata e kaluar e bashkisë e vuri në plan të ndërtonte pallat, por më në fund ky makth mbaroi me ndryshimin në Bashkinë e Tiranës dhe me futjen në rrugë të projektit të ri, i cili sot nuk është më një projekt në 3D, por ndodhet para syve tanë. Është koha që së bashku me Erionin ta çlirojmë edhe pjesën djathtas, në mënyrë që të kemi një hapësirë të denjë midis shkollës “Kosova” dhe gjykatës, kurse fëmijët të përfitojnë më shumë mjedis publik”, tha Rama, teksa dha lajmin e mirë se është gati nisja e punës për ndërtimin e 17 shkollave të reja në kryeqytet.

“Brenda pak javësh, bashkë me Bashkinë e Tiranës, do të fillojmë projektin e 17 shkollave. Janë 17 shkolla që tanimë janë në fazën finale të fillimit të zbatimit të kontratave, të projektuara nga arkitektë të mëdhenj të huaj, që do jenë në vazhdën e kësaj godinë, me këtë cilësi të re për shkollat ku shkojnë fëmijët tanë”, tha Rama.

Ministrja e Arsimit, Sportit dhe Rinisë, Lindita Nikolla vlerësoi kryebashkiakun Erion Veliaj për ndërtimin e kësaj shkolle model. “Erion, ti se di sa më rreh zemra për këtë shkollë të re të Tiranës. Sot janë 10 mijë nxënës që po përjetojnë të njëjtin emocion. Investimet janë një vlerë e paçmuar dhe ne do të vijojmë me këtë ritëm”, u shpreh Nikolla.

Kryebashkiaku Veliaj uroi nxënësit e shkollës “Kosova” për fillimin e vitit të ri shkollor, të cilët këtë vit nuk u duhet të mësojnë me dy turne në shkolla të tjera. “Mua sot më gëzon zemra kur shoh ish-shkollën time e transformuar pas një kalvari shumë shumë të gjatë. Jam i sigurt se sot i gëzon zemra jo vetëm atyre që janë nxënës, por edhe prindërve, gjyshërve dhe gjysheve, që shohin se si një tokë të shkretë, një histori të dhimbshme të tranzicionit tonë, u transformua në një mrekulli. Të gjithë kemi qenë krenar dhe kemi thënë, kemi bërë shkollën ‘Kosova’”, u shpreh Veliaj, teksa tha se kjo shkollë përfaqëson edhe një histori që e përmbledh gjithë tranzicionin e saj në pak metra katrorë, që nga djegia dhe përpjekjet për ta bërë pallat, e deri tek rindërtimi i saj me kushte moderne.

“Kjo shkollë pa edhe rrumpallën e viteve ’90, edhe ndërtimet pa leje rreth saj, madje edhe në oborr kemi pasur disa ndërtime pa leje, që ju e dini fare mirë me sa mund janë prishur. Kjo shkollë pa edhe kazino-kapitalizmin e dikujt që ishte gati jo vetëm ta digjte shkollën, por të mbyllte letrat në gjykatë me një efiçencë që askush s’e kish parë ndonjëherë në gjykatat shqiptare, duke përgatitur një grabitje të madhe. Ja ku jemi sot! Pavarësisht se çfarë dëgjojmë, në fund veprat mbeten dhe ajo që vendosëm me kryeministrin, të cilin e falenderoj me gjithë zemër sot, si një nga meraqet e para kur ne fituam Bashkinë e Tiranës, ndërtimin e shkollës “Kosova”. Në fakt, bëmë një shpronësim që na vlejti pothuajse sa e gjithë vlera e shkollës e megjithatë thamë: ia vlen, duhet bërë! Është domosdoshmëri që Tiranës t’i japim jo vetëm një shkollë të re, por edhe një simbol të ri, se çfarë do të thotë të bësh punë publike”, u shpreh Veliaj.

Ai falenderoi kryeministrin Rama dhe qeverinë për vendimin e marrë për të mbështetur transformimin e kësaj shkolle, ku do të edukohen të rinjtë e gjeneratës tjetër. Veliaj ftoi nxënësit që pas mësimit të shfrytëzojnë mjediset e shkollës së rindërtuar për aktivitete komunitare. Shkolla “Kosova” nuk është më vetëm për ciklin e ulët 4-vjeçar, por ka klasa për parashkollorin, deri në klasën e 9. “Për herë të parë kemi filluar edhe nga klasat parashkollore, nga kopshtet. Kemi filluar me një klasë parashkollore pilot, e cila më pas do të vazhdojë edhe më tej. Lajmi tjetër i mirë është se nuk është më një shkollë ushtrimore 4-vjeçare, as 6-vjeçare, është në fakt një 9-vjeçare e plotë. Kështu që, për herë të parë do të jetë gjenerata e re, të cilët do të thonë jemi te shkolla 9-vjeçare “Kosova” dhe jo shkolla ushtrimore 4-vjeçare”, deklaroi Veliaj.

Një nga të parët që mbërriti sot te shkolla “Kosova” ishte edhe kantautori i njohur Ardit Gjebrea. Jo për të filluar klasën e parë, por për të kujtuar shkollën e tij fillore dhe për të parë se si është transformuar ajo. “Shumë mësuese nuk janë më, por tradita vazhdon. Shkolla ka qenë 1-katëshe, në formë U-je, kanë qenë disa pemë aty mbrapa, nuk ka qenë e shtruar dhe ne vinim me shumë zell. Mësonim se donim që t’u bënim së pari qejfin prindërve, se nuk kuptonim kur ishim të vegjël se çdo të thotë të mësosh mirë dhe çfarë do të bëhesh në të ardhmen. Vitet kalonin dhe më shumë kuptonim se sa e dashur ishte shkolla. Unë do të doja shumë që të kthehesha edhe njëherë dhe të bëhesha fëmijë. Kam nostalgji për atë shkollë, por në fakt do të doja shumë të studioja te kjo shkolla e re këtu”, u shpreh i emocionuar Ardit Gjebrea.

Shkolla Kosova është një godinë me 4 kate, 3 kate mbi tokë dhe 1 kat nëntokë, ku është vendosur biblioteka e shkollës, një sallë leximi, si dhe një zonë për ruajtjen e librave. Gjithashtu, disa ambiente të shkollës, si auditoriumi, do të jenë edhe në shërbim të komunitetit. Shkolla ka laboratorë dhe të gjitha lehtësirat e tjera për procesin mësimor, ndërsa tarraca është e gjelbëruar, kurse fasadat janë veshur me elementë hidroizolues dhe termoizolues.