Rindërtimi i shkollës “Sami Frashëri”, Veliaj: “E përjetoj me emocion, por do të jetë më e madhe dhe më e bukur; I rikthehemi 100% kantiereve të punës”

Shkolla e re “Sami Frashëri” do të jetë më e madhe dhe më e sigurt për nxënësit që do të ulen në bankat e saj. E ndërtuar në vitet ‘60, gjimnazi “Sami Frashëri” është shkolla e parë që do të rindërtohet pas dëmeve të rënda që pësoi në kolonat mbajtëse nga tërmeti i 26 Nëntorit. Godina e re pritet t’i japë fund edhe mësimit më 2 turne.

Kryetari i Bashkisë së Tiranës, Erion Veliaj, i cili ka studiuar vetë në këtë shkollë në vitet ‘90, tha se godina e vjetër do t’ia lërë vendin një godine të re moderne. “Është një ditë e rëndësishme për qytetin, një ditë e rëndësishme edhe për mua personalisht. Kjo është shkolla ime e vjetër, kam shumë kujtime këtu, shumë nostalgji. Shkolla është një vend fantastik, një vend ku ti kupton se, pavarësisht se mund të ndahemi me bindje, mund të jemi të majtë e të djathtë, por ky vend na bashkon. Është një ditë e mbushur me emocione për shumë prej nesh, që kanë kujtimet e rinisë së tyre nga kjo shkollë. Unë e kam mbaruar shkollën në vitin 98-të; viti 97-të ka qenë viti më kritik dhe formimin tim politik ia dedikoj debateve dhe frymës që ka pasur “Sami Frashëri”. Por, vjen një moment kur duhet t’i themi lamtumirë nostalgjisë edhe kujtimeve”, tha Veliaj.

Kreu i Bashkisë u shpreh se për shkak të amortizimit, shkolla “Sami Frashëri” e kishte të domosdoshme rindërtimin, ndërsa sqaroi se nxënësit do të transferohen përkohësisht tek shkolla “Çajupi”. “Shkolla është ndërtuar në vitet 60-70, e patë sesi zgavella e krijuar nga prishja doli që s’kishte asnjë kolonë betoni dhe çeliku, por vetëm mur. Sigurisht, në vitet e vështira të komunizmit, edhe materialet ishin të varfra. Shpeshherë kemi ndërhyrë për estetikë, por të ndryshosh banjot, çezmat, rrjetin elektrik, të bësh palestër, të bësh koshat e basketbollit, nuk do të thotë zëvendësim i themeleve dhe i kolonave, që janë po ato që kanë qenë. Këtu besoj jemi të gjithë dakord që pasi u pa nga grupet e huaja të inxhinierëve të Institutit të Ndërtimit dhe inxhinierët e bashkisë, u arrit në përfundimin se nostalgjive do t’u themi mirupafshim, për t’i hapur udhën një projekti të ri. Shkolla ‘Sami Frashëri’ përkohësisht është transferuar tek shkolla ‘Çajupi’”, tha ai.

Veliaj theksoi se brenda verës do të nisë puna edhe për ndërtimin e godinës së re të shkollës, e cila pritet që të jetë gati shtatorin e vitit të ardhshëm. “Brenda verës do të fillojmë ndërtimin e shkollës, që në shtatorin ri të kemi shkollën më të bukur, më të mirë dhe më të madhe në Republikë. Duke qenë se “Sami Frashëri” tashmë ishte një shkollë me dy turne - në Tiranë kishin mbetur vetëm dy shkolla të mesme me dy turne, “Sami Frashëri” dhe “Ismail Qemali”, - kjo ulje presioni, pra transferimi në një shkollë tjetër, do të bëjë që në regjistrimet e reja, “Sami Frashëri” të mos ketë të njëjtin fluks, çka do na mundësojë që kur të fillojmë shtatorin tjetër, të mos kemi një tjetër shkollë me dy turne. Është një ditë plot me emocione dhe me shumë kujtime që i përcjellim njëherë e mirë, por besoj se do të hapim rrugë për shumë kujtime të tjera për djem dhe vajza që, ndoshta do e çojnë më lart emrin e kësaj shkolle se ne që kemi mbarur te “Sami Frashëri”, theksoi Veliaj.

Bashkia e Tiranës do t’i rikthehet të gjitha kantiereve të saj të punës, si për rindërtimin e shkollave, ashtu edhe në veprat e tjera infrastrukturore. “Me lirimin e qarkullimit dhe kantiereve, Bashkia e Tiranës do i kthehet 100% kantiereve. Për fëmijët, në 1 Qershor, do kemi një superdhuratë, “Parkun Rinia”. Dashtë Zoti çdo gjë shkon mirë, pra që fëmijët e nënat mund të lejohen të dalin, do kemi një qershor për t’u mbajtur mend. Siç e filluam mandatin, pra me një sherr dhe festuam 1 qershorin tek këndi i lojërave tek Liqeni, Parku Rinia do jetë një bizhu në qendër të Tiranës, sidomos në këto kohë ku na duhet gjithmonë e më shumë hapësirë publike për të ruajtur distancën”, tha ai, teksa shtoi se po punohet edhe për zgjerime trotuaresh si tek stadiumi “Dinamo”.

“Po bëjmë të njëjtën gjë që bëmë përballë Taiwan-i, po e trefishojmë trotuarin, sepse besoj që e ardhmja pas Covid19 do jetë e ardhmja e çiklistëve dhe e këmbësorëve. Do të shihni javën tjetër që korsi si kjo që jemi tani, do të lindin në shumë vende të qytetit”, tha ai.

Por, në kryeqytet janë në total rreth 11 shkolla që do i nënshtrohen procesit të ndërtimit. “Shkolla “Lasgush Poradeci” në Kombinat, kemi të njëjtin skenar, do të prishet për t’u bërë nga e para. Në disa shkolla të tjera si “Emin Duraku”, duke qenë se janë ndërtuar në kohë të ndryshme, ndërhyrja do të jetë e pjesshme, pra do prishet vetëm një pjesë e shkollës, ndërkohë që pjesa që i ka rezistuar edhe testimit që kanë bërë inxhinierët me studim të thelluar, do të vazhdojë të ekzistojë. Në total janë 11 shkolla, 7 prishen totalisht: “Lasgush Poradeci” në Kombinat, shkolla “Murat Toptani” dhe kemi disa shkolla në fshatra si në Pezë Pezë Helmës etj. Siç e patë, po ndërtojmë dy shkolla në Kodër-Kamzë, shkolla “Nënë Tereza” dhe “John F. Kennedy”, pra një 9-vjeçare dhe një e mesme”, deklaroi Veliaj.

Kreu i Bashkisë u shpreh se koha ka treguar se aty ku ka bashkëpunim edhe projektet ecin më shpejt. “Javën tjetër do të bëjmë një inspektim tek rreth rrotullimi “Shqiponja”. Po të kishin ecur punët siç ishin planifikuar, sot do ta kishim hapur nënkalimin atje, por humbëm dy vjet kot; nxënës të së njëjtës shkollë, ca në Presidencë, ca në Bashki, ca në opozitë, që ziheshin për Astirin. Ja ku jemi sot, në vend që të inauguronim hapjen e Astirit, pra bashkë me hapjen pas epidemisë, të bënim edhe hapjen e një nënkalimi modern, na detyron të inspektojmë fillimin e punimeve. Shpresoj që epidemia na ka bërë të reflektojmë sa kohë harxhojmë kot dhe sa shpejt ecin punët kur bashkëpunojmë. Kujtoni shkollën “Kosova”, gangrenë 12 vite, por kur kryeministri, kryetari i Bashkisë bashkëpunojnë dhe ecin përpara, mbaroi për një vit. Shpresoj të njëjtin fat do ketë “Sami Frashëri”, shpresoj që asnjë nga këto projekte nuk do bllokohet për teka politike sepse Astiri ishte një tekë e madhe politike”, nënvizoi Veliaj.